ចូរស្មោះត្រង់ចំពោះព្រះ និងកិច្ចការរបស់ទ្រង់

ដោយអែលឌើរ ឃ្វីនថិន អិល ឃុក

ក្នុងកូរ៉ុមនៃពួកសាវកដប់ពីរនាក់

យើងទាំងអស់គ្នាត្រូវស្វែងរកទីបន្ទាល់ផ្ទាល់ខ្លួនអំពីព្រះយេស៊ូវគ្រីស្ទដើម្បីទប់អស់ទាំងតណ្ហារបស់យើង ប្រែចិត្តពីអំពើបាប ហើយស្មោះត្រង់ចំពោះព្រះ និងកិច្ចការរបស់ទ្រង់ ។

កាលពីខែតុលាឆ្នាំមុន ខ្ញុំបានទទួលការចាត់តាំងអមដំណើរប្រធាន អិម. រ័សុល បាឡឺដ និង អែលឌើរ ជែហ្វ្រី អ័រ ហូឡិន ទៅទស្សនកិច្ចនៅចក្រភពអង់គ្លេស ជាកន្លែងដែលយើងទាំងបីនាក់ធ្លាប់បានបម្រើជាអ្នកផ្សព្វផ្សាយសាសនាកាលនៅវ័យក្មេង ។ យើងមានឯកសិទ្ធិដើម្បីបង្រៀន និងថ្លែងទីបន្ទាល់ ព្រមទាំងរំឭកអំពីប្រវត្តិសាសនាចក្រដំបូងនៅកោះអង់គ្លេសជាកន្លែងដែលតាលួត ហ៊ីប៊ើរ ស៊ី ឃិមបឹល របស់ខ្ញុំ និងមិត្តរបស់លោកធ្វើជាអ្នកផ្សព្វផ្សាយសាសនាដំបូងនៅទីនោះ ។^១

ប្រធាន រ័សុល អិម ណិលសុន បានចំអន់ពួកយើងអំពីការចាត់តាំងនេះ ដោយថ្លែងថា វាមិនធម្មតាទេ ដែលចាត់តាំងសាវកបីរូបឲ្យទៅទស្សនកិច្ចតំបន់នោះ ដែលពួកលោកបានបម្រើជាអ្នកផ្សព្វផ្សាយសាសនាកាលនៅយុវវ័យនោះ ។ លោកបានទទួលស្គាល់ថា យើងទាំងបីនាក់ប៉ងចង់ឲ្យចាត់ទៅទស្សនកិច្ចបេសកកម្មដើមរបស់ពួកយើង ។ លោកបានពន្យល់យ៉ាងច្បាស់ពីកាតព្វកិច្ចនេះទាំងទឹកមុខញញឹមថា បើមានសាវកបីនាក់ផ្សេងទៀតដែលបានបម្រើក្នុងបេសកកម្មដូចគ្នាកាលពីជាង ៦០ ឆ្នាំមុន នោះពួកលោកក៏អាចទទួលការចាត់តាំងស្រដៀងគ្នានេះផងដែរ ។

ពេលត្រៀមខ្លួនធ្វើតាមការចាត់តាំងនោះ ខ្ញុំបានអានអត្ថបទ ជីវិតរបស់ហ៊ីប៊ើរ ស៊ី ឃិមបឹលឡើងវិញ ដែលបានសរសេរដោយចៅប្រុស របស់លោកឈ្មោះ អ័រសុន អេហ្វ វីតនី ដែលក្រោយមកត្រូវបានហៅបម្រើជាសាវក ។ ម្តាយជាទីគោរពរបស់ខ្ញុំបានឲ្យសៀវភៅមួយក្បាលនេះមកខ្ញុំ កាលខ្ញុំមានអាយុជិតប្រាំពីរឆ្នាំ ។ យើងបានរៀបចំខ្លួនចូលរួមពិធីឧទ្ទិសឆ្លងវិមាន នេះគឺជាទីកន្លែងនោះហើយ នៅថ្ងៃទី ២៤ ខែ កក្កដា ឆ្នាំ ១៩៤៧ ដោយប្រធាន ចច អ័លប៊ើត ស៊្មីធ ។^២ ម្តាយខ្ញុំចង់ឲ្យខ្ញុំស្គាល់ ហ៊ីប៊ើរ ស៊ី ឃិមបឹល ដែលជាជីដូនជីតារបស់ខ្ញុំកាន់តែច្បាស់ ។

សៀវភៅនេះមានសេចក្តីថ្លែងការណ៍ដ៏ជ្រាលជ្រៅមួយ ជូនប្រធានឃិមបឹល ដែលវាសំខាន់សម្រាប់ជំនាន់យើងនេះ ។ ពីមុនពេលចែកចាយសេចក្តីថ្លែងការណ៍នេះ ខ្ញុំសូមប្រាប់អំពីប្រវត្តិរឿងនេះបន្តិច ។

ខណៈដែលព្យាការី យ៉ូសែប ស្ម៊ីធ ជាប់ក្នុងគុកលិបើធី នោះពួកសាវក ព្រិក ហាំយ៉ង់ និង ហ៊ីប៊ើរ ស៊ី ឃិមបឹល ទទួលខុសត្រូវមើលលើការជម្លៀសពួកបរិសុទ្ធចេញពីរដ្ឋមិសសួរី ក្រោមស្ថានភាពដ៏តានតឹងបំផុត ។ ការជម្លៀសនេះតម្រូវឲ្យធ្វើជាទ្រង់ទ្រាយធំ ព្រោះតែមានបញ្ជាឲ្យសម្លាប់ចោល មកពីលោក លិលបឺន ដ័បបុលយូ បកស៍ ជាអភិបាលរដ្ឋមិសសួរី ។^៣

ជិត ៣០ ឆ្នាំក្រោយមក ហ៊ីប៊ើរ ស៊ី ឃិមបឹល ដែលកាលនោះនៅក្នុងគណៈប្រធានទីមួយបានសញ្ជឹងគិតពីប្រវត្តិនេះសម្រាប់ជំនាន់ថ្មីលោកបង្រៀនថា « ខ្ញុំសូមនិយាយទៅកាន់អ្នកថា អ្នករាល់គ្នាជាច្រើននឹងឃើញគ្រា ដែលអ្នកនឹងមានបញ្ហា ការសាកល្បង និងការបៀតបៀនទាំងអស់ ដែលអ្នកអាចឈរការពារ និងមានឱកាសច្រើន ដើម្បីបង្ហាញថា អ្នក ស្មោះត្រង់ចំពោះព្រះ និងកិច្ចការរបស់ទ្រង់ »^៤

ហ៊ីប៊ើរ បានបន្តថា ៖ « ដើម្បីតទល់នឹងការលំបាកដែលនឹងកើតមានឡើង វាចាំបាច់ថា អ្នកត្រូវមានចំណេះដឹងអំពីសេចក្តីពិតនៃកិច្ចការនេះដោយខ្លួនឯង ។ ការលំបាកទាំងនោះនឹងមានខ្លាំងណាស់ ហើយបើបុរស ឬស្ត្រីណា គ្មានចំណេះដឹង ឬសាក្សីផ្ទាល់ខ្លួនទេ នោះពួកគេនឹងឃ្លាតចេញ ។ បើ អ្នកមិនទាន់មានទីបន្ទាល់ទេ សូមរស់នៅដោយត្រឹមត្រូវ ហើយអំពាវនាវដល់ព្រះអម្ចាស់កុំឈប់ឈឡើយ [ រហូតដល់ ] អ្នក [ ទទួលបាន ] ទីបន្ទាល់នោះជាមុនសិន ។ បើមិនដូច្នោះទេ អ្នកមិនអាចទប់ទល់នឹងវាបានឡើយ ។ … គ្រានោះនឹងមកដល់ គ្មានបុរស ឬស្ត្រីណាម្នាក់អាចកាន់ខ្ជាប់ដោយសារពន្លឺដែលខ្ចីគេនោះឡើយ ។ បុគ្គលម្នាក់ៗនឹងត្រូវដឹកនាំដោយពន្លឺដែលនៅក្នុងខ្លួនពួកគេផ្ទាល់ » ។ បើអ្នកគ្មានទីបន្ទាល់ទេ នោះអ្នកនឹងមិនអាចទប់ទល់នឹងវាបានឡើយ ដូច្នេះ ចូរស្វែងរកទីបន្ទាល់អំពីព្រះយេស៊ូវ ហើយតោងជាប់នឹងទីបន្ទាល់នោះ ហើយកាលគ្រាសាកល្បងនោះមកដល់ នោះអ្នកមិនអាចជំពប់ដួល ឃ្លាតចេញឡើយ » ។^៥

យើងម្នាក់ៗត្រូវការទីបន្ទាល់ផ្ទាល់ខ្លួនអំពីកិច្ចការរបស់ព្រះ^៦ និងតួនាទីដ៏ចម្បងរបស់ព្រះយេស៊ូវគ្រីស្ទ ។ គោលលទ្ធិ និង សេចក្តីសញ្ញាកណ្ឌទី ៧៦ ចែងអំពីលំដាប់ទាំងបីនៃសិរីល្អ និងប្រៀបធៀបសិរីល្អសេឡេស្ទាលទៅនឹងព្រះអាទិត្យ ។ បន្ទាប់មក កណ្ឌនោះប្រៀបធៀបនគរទេរេសទ្រាលទៅនឹងព្រះចន្ទ ។^៧

វាគួរឲ្យចាប់អារម្មណ៍ថា ព្រះអាទិត្យមានពន្លឺផ្ទាល់របស់វា ប៉ុន្តែព្រះចន្ទវិញគឺជាពន្លឺចំណាំងផ្លាត ឬ « ពន្លឺខ្ចីពីគេ » ។ និយាយអំពីនគរទេរេសទ្រាល ខទី ៧៩ ចែងថា « ពួកគេនេះហើយ ដែលពុំក្លាហានថ្លែងទីបន្ទាល់ពីព្រះយេស៊ូវ » ។ យើងមិនអាចទទួលបាននគរសេឡេស្ទាល និងរស់នៅជាមួយព្រះជាព្រះវរបិតា ដោយសារពន្លឺខ្ចីគេទេ យើងត្រូវការទីបន្ទាល់ផ្ទាល់ខ្លួនរបស់យើងអំពីព្រះយេស៊ូវគ្រីស្ទ និងដំណឹងល្អបស់ទ្រង់ ។

យើងរស់នៅក្នុងពិភពមួយ ដែលមានសេចក្ដីទុច្ចរិតច្រើន^៨ ហើយបែរចិត្តចេញពីព្រះ ព្រោះតែសិក្ខាបទនៃមនុស្សលោក ។^៩ គំរូមួយដ៏គួរឲ្យចាប់អារម្មណ៍ក្នុងព្រះគម្ពីរអំពីកង្វល់របស់ ហ៊ីប៊ើរ ស៊ី ឃិមបឹល ក្នុងការស្វែងរកទីបន្ទាល់នៃកិច្ចការរបស់ព្រះ និងព្រះយេស៊ូវគ្រីស្ទ គឺមានប្រកាសឲ្យដឹងនៅក្នុងការទូន្មានរបស់អាលម៉ា ទៅកាន់កូនប្រុសទាំងបីនាក់របស់លោកគឺ—ហេលេមិន ស៊ិបឡុន និង កូរីអានតុន ។^១០ កូនប្រុសពីរនាក់របស់លោកស្មោះត្រង់ចំពោះព្រះ និងកិច្ចការរបស់ទ្រង់ ។ ប៉ុន្ដែកូនប្រុសម្នាក់បានធ្វើការសម្រេចចិត្តមិនល្អមួយចំនួន ។ ចំពោះខ្ញុំការទូន្មានដ៏សំខាន់របស់អាលម៉ាគឺថា លោកបានទូន្មានពួកគេក្នុងនាមជាឪពុក ដើម្បីជាប្រយោជន៍ដល់កូនៗលោកផ្ទាល់ ។

កង្វល់ដំបូងរបស់អាលម៉ា ក៏ដូចជាកង្វល់របស់ ហ៊ីប៊ើរ ស៊ី ឃិមបឹល ដែរគឺថា ពួកកូនរបស់លោកម្នាក់ៗត្រូវមានទីបន្ទាល់អំពីព្រះយេស៊ូវគ្រីស្ទ ហើយ ស្មោះត្រង់ចំពោះព្រះ និងកិច្ចការរបស់ទ្រង់ ។

នៅក្នុងការបង្រៀនដ៏អស្ចារ្យរបស់អាលម៉ាដល់ កូនប្រុស ហេលេមិនលោកបានសន្យាយ៉ាងអង់អាចដល់អស់អ្នកដែល « ដាក់ទីទុកចិត្តរបស់ខ្លួនទៅលើព្រះ អ្នកនោះហើយ ដែលនឹងបានគាំទ្រនៅក្នុងការពិសោធន៍របស់គេ និងវិបត្តិរបស់គេ និងសេចក្ដីទុក្ខវេទនារបស់គេ ហើយនឹងត្រូវបានលើកឡើងនៅថ្ងៃចុងក្រោយបង្អស់ » ។^១១

ដោយសារអាលម៉ាបានទទួលការបើកបង្ហាញមួយ ដែលលោកបានឃើញទេវតាមួយអង្គ នោះវាជារឿងកម្រណាស់ ។ ការបំផុសគំនិតពីព្រះវិញ្ញាណបរិសុទ្ធគឺមានកាន់តែសាមញ្ញ ។ ការបំផុសគំនិតទាំងនេះអាចមានសារៈសំខាន់ស្មើគ្នាទៅនឹងការបង្ហាញពីទេវតាផងដែរ ។ ប្រធាន យ៉ូសែប ហ្វីលឌីង ស្ម៊ីធ បានបង្រៀន ៖ « ការបំផុសគំនិតដល់មនុស្សមកពីព្រះវិញ្ញាណបរិសុទ្ធ គឺមានសារៈសំខាន់ជាងការនិមិត្តមួយទៅទៀត ។ ពេលព្រះវិញ្ញាណមានបន្ទូលទៅកាន់វិញ្ញាណមនុស្ស នោះវាជាប់ក្នុងព្រលឹងពួកគេ ដែកពិបាកនឹងរលុបខ្លាំងណាស់ » ។^១២

ការណ៍នេះនាំយើងទៅរកការទូន្មានរបស់អាលម៉ាចំពោះកូនប្រុសទីពីររបស់លោកគឺស៊ិបឡុន ។ ស៊ិបឡុនសុចរិតដូចជាបងប្រុសរបស់លោកហេលេមិនដែរ ។ ដំបូន្មានដែលខ្ញុំចង់គូសបញ្ជាក់នោះគឺ អាលម៉ា ៣៨:១២ ដែកចែងថា « ចូរឲ្យឃើញថា កូនទប់អស់ទាំងតណ្ហារបស់កូន ដើម្បីឲ្យកូនអាចបានពោរពេញទៅដោយសេចក្ដីស្រឡាញ់ » ។

ការទប់គឺជាពាក្យមួយដែលគួរឲ្យចាប់អារម្មណ៍ ។ នៅពេលយើងជិះសេះ យើងប្រើបង្ហៀរដើម្បីនាំផ្លូវសេះនោះ ។ ពាក្យដ៏ល្អដែលមានន័យដូចនឹងពាក្យនេះគឺ ដឹកនាំ គ្រប់គ្រង ឬទប់ស្កាត់ ។ ព្រះគម្ពីរសញ្ញាចាស់ប្រាប់យើងថា យើងបានស្រែកដោយអំណរ ពេលយើងបានដឹងថា យើងនឹងមានរូបរាងកាយ ។^១៣ រាងកាយមិនទុច្ចរិតទេ—វាស្រស់ស្អាត ហើយសំខាន់—ប៉ុន្តែមានចំណង់មួយចំនួន បើមិនប្រើឲ្យសមស្រប ហើយទប់វាឲ្យត្រឹមត្រូវទេ នោះវាអាចបំបែកយើងចេញពី ព្រះ និងកិច្ចការរបស់ទ្រង់ ហើយវាជះឥទ្ធិពលអាក្រក់ដល់ទីបន្ទាល់របស់យើង ។

ចូរនិយាយអំពីចំណង់ពីរយ៉ាង ជាពិសេសគឺ—ទីមួយ កំហឹង និងទីពីរសេចក្ដីសម្រើប ។^១៤ វាគួរឲ្យចាប់អារម្មណ៍ថា បើ ទាំងកំហឹង និងសេចក្តីសម្រើបមិនអាចទប់ ឬគ្រប់គ្រងបានទេ នោះអាចបណ្ដាលឲ្យមានការឈឺចាប់យ៉ាងខ្លាំង ធ្វើឲ្យឥទ្ធិពលនៃព្រះវិញ្ញាណថយចុះ និងញែកយើងចេញពីព្រះ និងកិច្ចការរបស់ទ្រង់ ។ មារសត្រូវឆ្លៀតឱកាសគ្រប់ពេលដើម្បីដាក់អំពើហិង្សា និងរឿងអសីលធម៌ឲ្យមានពេញក្នុងជីវិតយើង ។

នៅក្នុងគ្រួសារមួយចំនួន វាជារឿងធម្មតាដែលស្វាមី ឬប្រពន្ធខឹងសម្បារ វាយប្រពន្ធ ឬប្តី ឬកូនរបស់ខ្លួន ។ នៅខែកក្កដា ខ្ញុំបានចូលរួមក្នុងវេទិកាសភាភាគីក្នុងចក្រភពអង់គ្លេស នៅទីក្រុងឡុងដ៍ ។^១៥ អំពើហិង្សាប្រឆាំងនឹងស្ត្រី និងយុវវ័យត្រូវបានលើកឡើងថា ជាបញ្ហាដ៏ធំមួយនៅទូទាំងពិភពលោក ។ ក្រៅពីអំពើហិង្សា អ្នកផ្សេងទៀតមានអំពើហិង្សាខាងពាក្យសម្តី ។ ការប្រកាសអំពីក្រុមគ្រួសារប្រាប់យើងថា អស់អ្នក « ដែលធ្វើបាបភរិយា ឬកូនចៅ…គង់តែថ្ងៃណាមួយនឹងទទួលខុសត្រូវនៅចំពោះព្រះ » ។^១៦

ប្រធាន ណិលសុន បានបញ្ជាក់យ៉ាងមុតមាំនៅព្រឹកម្សិលមិញនេះ ។^១៧ សូមសម្រេចចិត្តរបស់អ្នក ទោះបីជាឪពុកម្ដាយរបស់អ្នកបាន ឬមិនបានធ្វើបាបអ្នកក្ដី គឺអ្នកនឹងមិនបំពានស្វាមី ឬភរិយា ឬកូនៗខាងរូបកាយ ឬផ្លូវចិត្តឡើយ ។

នៅក្នុងជំនាន់របស់យើង ឧបសគ្គដ៏ចម្បងមួយគឺ ជម្លោះ និងអំពើហិង្សាខាងពាក្យសម្តី ទាក់ទងទៅនឹងបញ្ហាសង្គម ។ មានករណីជាច្រើនកំហឹង និងអំពើហិង្សាខាងពាក្យសម្តីបានជំនួសដោយហេតុផល ការពិភាក្សា និងសេចក្តីគួរសម ។ មនុស្សជាច្រើនបានបោះចោលការដាស់តឿនរបស់សាវករៀមច្បងនៃព្រះអង្គសង្គ្រោះគឺពេត្រុស ឲ្យស្វែងរកគុណសម្បត្តិដូចជាព្រះគ្រីស្ទ គឺ ចេះអត់សង្កត់ អត់ធ្មត់ ចេះគោរពប្រតិបត្តិដល់ព្រះ ចេះរាប់អានគ្នាជាបងប្អូន និងសេចក្ដីសប្បុរស ។^១៨ ពួកគេក៏បានបោះចោលនូវភាពរាបសាដែលជាគុណសម្បត្តិដូចជាព្រះគ្រីស្ទផងដែរ ។

ក្រៅពីការគ្រប់គ្រងកំហឹង និងការទប់អស់ទាំងចំណង់ យើងត្រូវដឹកនាំជីវិតឲ្យមានសីលធម៌ដ៏បរិសុទ្ធ គ្រប់គ្រងគំនិត ពាក្យសម្តី និងទង្វើរបស់យើង ។ យើងត្រូវចៀសវាងពីការណ៍អាសគ្រាម ត្រូវចេះវាយតម្លៃអំពីភាពសមរម្យនៃអ្វីដែលយើងកំពុងចាក់មើលតាមអ៊ិនធឺណិតនៅក្នុងផ្ទះយើង ហើយចៀសវាងពីការប្រព្រឹត្តអំពើបាបគ្រប់ទម្រង់ ។

រឿងនេះនាំយើងទៅការទូន្មានរបស់អាលម៉ាដល់ការីអានតុនជាកូនប្រុសរបស់លោក ។ កូរីអានតុន ខុសពីបងៗរបស់គាត់ គឺហេលេមិន និងស៊ិបឡុន គាត់បានពាក់ព័ន្ធនឹងការរំលងខាងសីលធម៌ ។

ដោយសារកូរីអានតុនបានពាក់ព័ន្ធក្នុងអំពើអសីលធម៌ វាចាំបាច់ដែលអាលម៉ាបង្រៀនកូនអំពីការប្រែចិត្ត ។ លោកត្រូវតែបង្រៀនកូនពីភាពធ្ងន់ធ្ងរនៃអំពើបាប រួចបង្រៀនពីរបៀបដើម្បីប្រែចិត្ត ។^១៩

ដូច្នេះការទូន្មានពីការទប់ស្កាត់របស់អាលម៉ា គឺជាការទប់អស់ទាំងចំណង់ ប៉ុន្តែការទូន្មានរបស់លោក គឺសម្រាប់អស់អ្នកដែលបានរំលង ឲ្យប្រែចិត្តចេញ ។ ប្រធានណិលសុនបានផ្តល់ដំបូន្មានដ៏អស្ចារ្យដល់សមាជិក អំពីការប្រែចិត្តនៅក្នុងសន្និសីទទូទៅខែមេសាឆ្នាំ ២០១៩ ។ លោកបានបញ្ជាក់យ៉ាងច្បាស់ថា ការប្រែចិត្តជារៀងរាល់ថ្ងៃ គឺជាកត្តាដ៏សំខាន់មួយក្នុងជីវិតរបស់យើង ។ លោកបានបង្រៀនថា « ការប្រែចិត្តពុំមែនជាព្រឹត្តិការណ៍ដែលកើតមានតែម្ដងនោះទេ វាគឺជាដំណើរការមួយ ។ វាគឺជាគន្លឹះឆ្ពោះទៅកាន់សុភមង្គល និងភាពសុខសាន្ដក្នុងគំនិត ។ « ការប្រែចិត្តប្រចាំថ្ងៃគឺជាច្រកទ្វារទៅកាន់បរិសុទ្ធភាព ហើយបរិសុទ្ធភាពនាំមកនូវកម្លាំង » ។^២០ បើ កូរីអានតុន បានធ្វើដូចអ្វីដែលប្រធានណិលសុនបានទូន្មាន នោះលោកអាចប្រែចិត្តភ្លាមៗ នៅពេលលោកបានចាប់ផ្តើមរីករាយនឹងគំនិតនានាដែលមិនបរិសុទ្ធ ។ ការរំលងធំៗនឹងមិនកើតមានឡើងទេ ។

ដំបូន្មានចុងបញ្ចប់ដែលអាលម៉ាបានទូន្មានដល់កូនប្រុសរបស់លោក គឺជាគោលលទ្ធិដ៏សំខាន់បំផុតមួយចំនួន នៅក្នុងព្រះគម្ពីរទាំងអស់ ។ វាទាក់ទងនឹងដង្វាយធួនដែលបានធ្វើឡើងដោយព្រះយេស៊ូវគ្រីស្ទ ។

អាលម៉ាបានថ្លែងទីបន្ទាល់ថា ព្រះគ្រីស្ទនឹងយកអំពើបាបទាំងឡាយចេញ ។^២១ ប្រសិនបើគ្មានដង្វាយធួនរបស់ព្រះអង្គសង្រ្គោះទេ នោះគោលការណ៍ដ៏អស់កល្បជានិច្ចនៃសេចក្តីយុត្តិធម៌ នឹងតម្រូវឲ្យមានការដាក់ទណ្ឌកម្ម ។^២២ ដោយសារតែដង្វាយធួនព្រះអង្គសង្គ្រោះ នោះសេចក្ដីមេត្តាករុណាអាចឈ្នះ ដល់អស់អ្នកដែលបានប្រែចិត្ត ហើយអាចអនុញ្ញាតឲ្យពួកគេត្រឡប់ទៅទីវត្តមានរបស់ព្រះវិញ ។ វាជាការណ៍ល្អដល់យើង ដើម្បីពិចារណាពីគោលលទ្ធិដ៏អស្ចារ្យនេះ ។

គ្មាននរណាម្នាក់អាចត្រឡប់ទៅព្រះវិញបាន ដោយសារតែកិច្ចការល្អរបស់ខ្លួនផ្ទាល់នោះទេ យើងទាំងអស់គ្នាត្រូវការអត្ថប្រយោជន៍នៃការបូជារបស់ព្រះអង្គសង្គ្រោះ ។ មនុស្សទាំងអស់មានបាប ហើយមានតែតាមរយៈដង្វាយធួនរបស់ព្រះយេស៊ូវគ្រីស្ទប៉ុណ្ណោះ ដែលយើងអាចទទួលបានសេចក្ដីមេត្តាករុណា ហើយរស់នៅជាមួយព្រះ ។^២៣

អាលម៉ាក៏បានផ្តល់ដំបូន្មានដ៏អស្ចារ្យដល់កូរីអានតុន សម្រាប់យើងទាំងអស់គ្នាដែលបានឆ្លងកាត់ត្រូវ ឬនឹងត្រូវឆ្លងកាត់ដំណើរការប្រែចិត្ត ទោះបីជាអំពើបាបទាំងនោះស្រាល ឬធ្ងន់ធ្ងរ ដូចអំពើបាបដែលបានប្រព្រឹត្តដោយកូរីអានតុនក្តី ។ ខទី ២៩ នៃអាលម៉ា ៤២ ចែងថា « ហើយឥឡូវនេះ កូនប្រុសរបស់ឪពុកអើយ ឪពុកពុំមានបំណងចង់ឲ្យរឿងទាំងនេះ ធ្វើឲ្យកូនកង្វល់ចិត្តតទៅទៀតទេ ហើយទុកឲ្យតែអំពើបាបរបស់កូនបារម្ភដល់កូនតែប៉ុណ្ណោះបានហើយ គឺការបារម្ភនេះហើយ ដែលអាចញ៉ាំងឲ្យកូនប្រែចិត្ត » ។

កូរីអានតុនបានស្តាប់តាមដំបូន្មានរបស់អាលម៉ា ហើយបានទាំងប្រែចិត្ត ហើយបម្រើប្រកបដោយកិត្តិយស ។ ដោយសារតែដង្វាយធួនរបស់ព្រះអង្គសង្គ្រោះ នោះការព្យាបាលគឺមានសម្រាប់មនុស្សទាំងអស់ ។

នៅជំនាន់របស់អាលម៉ា នៅជំនាន់របស់ ហ៊ីប៊ើរ ឃិមបឹល ហើយប្រាកដណាស់នៅជំនាន់របស់យើង នោះយើងទាំងអស់គ្នាត្រូវស្វែងរកទីបន្ទាល់ផ្ទាល់ខ្លួនរបស់យើងអំពីព្រះយេស៊ូវគ្រីស្ទ ទប់អស់ទាំងតណ្ហារបស់យើង ប្រែចិត្តពីអំពើបាបរបស់យើង និងស្វែងរកភាពសុខសាន្ត តាមរយៈដង្វាយធួនរបស់ព្រះយេស៊ូវគ្រីស្ទ ហើយស្មោះត្រង់ចំពោះព្រះ និងកិច្ចការរបស់ទ្រង់ ។

នៅក្នុងសុន្ទរកថា និងជាថ្មីម្តងទៀតនៅព្រឹកនេះ ប្រធាន រ័សុល អិម ណិលសុន បានមានប្រសាសន៍អំពីរឿងនេះ តាមរបៀបនេះ ៖ « ខ្ញុំសូមអង្វរបងប្អូនឲ្យទទួលខុសត្រូវចំពោះទីបន្ទាល់របស់បងប្អូនអំពីព្រះយេស៊ូវគ្រីស្ទ ។ សូមខិតខំដើម្បីមានទីបន្ទាល់នោះ ។ សូមមានវាផ្ទាល់ខ្លួន ។ សូមខ្វល់ខ្វាយពីវា ។ សូមចិញ្ចឹមបីបាច់វា ដើម្បីឲ្យវាលូតលាស់ ។ បន្ទាប់មក សូមមើលអព្ភូតហេតុកើតឡើងក្នុងជីវិតរបស់បងប្អូន » ។^២៤

ខ្ញុំមានអំណរគុណដែលឥឡូវនេះ យើងនឹងស្តាប់ពីប្រធានណិនសុន ។ ខ្ញុំសូមថ្លែងទីបន្ទាល់ថា ប្រធានណិលសុនគឺជាព្យាការីរបស់ព្រះនៅជំនាន់របស់យើង ។ ខ្ញុំស្រឡាញ់ និងផ្តល់តម្លៃដល់ការបំផុសគំនិត និងការណែនាំដ៏អស្ចារ្យ ដែលយើងទទួលបានតាមរយៈលោក ។

ក្នុងនាមជាសាវករបស់ព្រះអម្ចាស់ព្រះយេស៊ូវគ្រីស្ទម្នាក់ ខ្ញុំសូមថ្លែងទីបន្ទាល់ដ៏មុតមាំរបស់ខ្ញុំអំពីភាពជាព្រះរបស់ព្រះអង្គសង្គ្រោះ និងភាពពិតនៃដង្វាយធួនរបស់ទ្រង់ នៅក្នុងព្រះនាមនៃព្រះយេស៊ូវគ្រីស្ទ អាម៉ែន ៕