ក្លាហានក្នុងការប្រកាសសេចក្តីពិត

ដោយ អែលឌើរ ដេណេសុន ស៊ីលវ៉ា

នៃពួកចិតសិបនាក់

នៅពេលយើងរៀនអំពីសេចក្តីពិត ព្រះអម្ចាស់ប្រទានឱកាសដល់យើងឲ្យធ្វើអ្វីដែលទ្រង់នឹងធ្វើ បើទ្រង់គង់នៅទីនេះនាថ្ងៃនេះ ។

នៅឆ្នាំ ១៩៨២ ខ្ញុំបានបញ្ចប់បរិញ្ញាបត្ររងផ្នែកភូមិសាស្រ្តនៅឯសាលាបច្ចេកទេសមួយកន្លែង ។

នៅចុងឆ្នាំនោះ មិត្តរួមថ្នាក់ម្នាក់បានអញ្ជើញខ្ញុំឲ្យមានការសន្ទនាមួយ ។ ខ្ញុំចាំថាយើងបានចេញពីមិត្តរួមថ្នាក់ផ្សេងទៀត ដើរទៅកន្លែងមួយនៅជិតទីលានកីឡា ។ នៅពេលយើងទៅដល់ទីនោះ គាត់បាននិយាយមកខ្ញុំអំពីជំនឿសាសនា គាត់មិនត្រឹមតែបង្ហាញគម្ពីរដល់ខ្ញុំទេ ថែមទាំងឲ្យគម្ពីរនោះមកខ្ញុំទៀតផង ។ តាមពិត ខ្ញុំមិនចាំពាក្យដែលគាត់និយាយទេ ប៉ុន្តែខ្ញុំចាំគ្រានោះបានយ៉ាងល្អ ហើយចាំពីអារម្មណ៍ដែលខ្ញុំមាន ពេលគាត់បាននិយាយថា « ខ្ញុំចង់ថ្លែងទីបន្ទាល់របស់ខ្ញុំទៅកាន់ឯងថា គម្ពីរនេះពិត ហើយថាដំណឹងល្អនៃព្រះយេស៊ូវគ្រីស្ទត្រូវបានស្តារឡើងវិញ » ។

បន្ទាប់ពីការសន្ទនារបស់យើង ខ្ញុំបានត្រឡប់ទៅផ្ទះវិញ បានបើកមើលគម្ពីរនោះពីរបីទំព័រ ហើយទុកវានៅលើធ្នើរ ។ ដោយសារវាជិតបណ្តាច់ឆ្នាំ ហើយវាគឺជាឆ្នាំចុងក្រោយនៃសញ្ញាបត្រភូមិសាស្រ្តរបស់ខ្ញុំ នោះខ្ញុំមិនសូវយកចិត្តទុកដាក់ចំពោះគម្ពីរ ឬក៏មិត្តរួមថ្នាក់ដែលបានចែកចាយគម្ពីរនោះជាមួយខ្ញុំប៉ុន្មានទេ ។ ឈ្មោះគម្ពីរនោះបងប្អូនអាចស្មានដឹងហើយ ។ បាទ ! គឺជាព្រះគម្ពីរមរមន ។

ប្រាំខែក្រោយមក ពួកអ្នកផ្សព្វផ្សាយសាសនាបានមកដល់ផ្ទះខ្ញុំ ជួនពេលគ្នាដែលខ្ញុំត្រឡប់មកពីធ្វើការវិញ ។ ខ្ញុំបានអញ្ជើញពួកគេឲ្យចូលក្នុង ។ ពួកយើងអង្គុយនៅទីធ្លាតូចមួយខាងមុខផ្ទះ ហើយពួកគេបានបង្រៀនខ្ញុំ ។

ដោយខ្ញុំស្វែងរកសេចក្តីពិត ខ្ញុំក៏បានសួរពួកគេថាតើព្រះវិហារណាមួយពិត ហើយតើខ្ញុំអាចរកឃើញព្រះវិហារពិតដោយរបៀបណា ។ ពួកអ្នកផ្សព្វផ្សាយសាសនាបានបង្រៀនខ្ញុំថា ខ្ញុំអាចទទួលចម្លើយនោះផ្ទាល់ខ្លួន ។ ខ្ញុំបានទទួលយកសំណូមពររបស់ពួកគេឲ្យអានបីបួនជំពូកក្នុងព្រះគម្ពីរមរមន ដោយសារមានការរំពឹងទុក និងបំណងប្រាថ្នាដ៏ធំ ។ ខ្ញុំបានអធិស្ឋានដោយស្មោះអស់ពីចិត្ត និងដោយបំណងពិត ( សូមមើល មរ៉ូណៃ ១០:៤–៥ ) ។ មានចម្លើយច្បាស់ចំពោះសំណួរខ្ញុំ ហើយបីបួនថ្ងៃក្រោយមក—នៅថ្ងៃទី ១ ខែឧសភា ឆ្នាំ ១៩៨៣ គឺវាកាន់តែច្បាស់— ខ្ញុំបានទទួលបុណ្យជ្រមុជទឹក ហើយបានបញ្ជាក់ជាសមាជិកនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។

សព្វថ្ងៃនេះ ពេលខ្ញុំគិតអំពីលំដាប់ព្រឹត្តិការណ៍ដែលបានកើតឡើង ខ្ញុំមើលឃើញយ៉ាងច្បាស់ថា ភាពក្លាហានរបស់មិត្តរួមថ្នាក់ខ្ញុំវាសំខាន់យ៉ាងណា នៅពេលគាត់បានថ្លែងទីបន្ទាល់ពីសេចក្តីពិតដែលបានស្តារឡើងវិញ ហើយបានបង្ហាញដល់ខ្ញុំនូវភស្ដុតាងពីការស្តារឡើងវិញនៃដំណឹងល្អរបស់ព្រះយេស៊ូវគ្រីស្ទ គឺព្រះគម្ពីរមរមន ។ វាជាទង្វើដ៏សាមញ្ញ តែសំខាន់ខ្លាំងចំពោះខ្ញុំ ដែលវាបានបង្កើតទំនាក់ទំនងរវាងខ្ញុំ និងពួកអ្នកផ្សព្វផ្សាយសាសនានៅពេលខ្ញុំបានជួបពួកគេ ។

សេចក្តីពិតនេះបានបង្ហាញដល់ខ្ញុំ ហើយបន្ទាប់ពីខ្ញុំបុណ្យជ្រមុជទឹក ខ្ញុំបានក្លាយជាសិស្សរបស់ព្រះយេស៊ូវគ្រីស្ទ ។ នៅឆ្នាំក្រោយៗមកដោយមានជំនួយពីមនុស្សល្អៗ ដូចជា ថ្នាក់ដឹកនាំ គ្រូបង្រៀន និងមិត្តភក្តិ និងតាមរយៈការសិក្សាផ្ទាល់ខ្លួនខ្ញុំផងដែរ ខ្ញុំបានដឹងថា ពេលខ្ញុំសម្រេចចិត្តធ្វើជាសិស្សរបស់ព្រះយេស៊ូវគ្រីស្ទ គឺខ្ញុំមិនត្រឹមតែទទួលយកការងារការពារសេចក្តីពិតប៉ុណ្ណោះទេ ប៉ុន្តែត្រូវប្រកាសអំពីសេចក្តីពិតផងដែរ ។

នៅពេលយើងយល់ព្រមជឿសេចក្តីពិត ធ្វើតាមសេចក្ដីពិត និងពេលយើងខិតខំដើម្បីធ្វើជាសិស្សដ៏ពិតរបស់ព្រះយស៊ូវគ្រីស្ទ នោះយើងមិនទទួលសញ្ញាបត្រដែលធានាថា យើងនឹងមិនធ្វើខុស នឹងមិនត្រូវបានល្បួងឲ្យដើរចេញពីសេចក្តីពិត ដែលយើងនឹងមិនរិះគន់ ឬ ថាយើងនឹងមិនដកពិសោធន៍ទុក្ខលំបាកនោះទេ ។ ប៉ុន្តែចំណេះដឹងពីសេចក្តីពិតបង្រៀនយើងថា នៅពេលយើងដើរនៅលើផ្លូវតូច និងចង្អៀត ដែលនឹងនាំយើងត្រឡប់ទៅទីវត្តមានរបស់ព្រះវរបិតាសួគ៌វិញ នោះរបៀបដើម្បីគេចចេញពីបញ្ហានេះ យើងគួរ ( សូមមើល កូរិនថូស ទី១ ១០:១៣សង្ស័យដែលយើងមានមន្ទិល មុនពេលយើងសង្ស័យអំពីជំនឿរបស់យើង ( សូមមើល ឌៀថើរ អេហ្វ អុជដូហ្វ « Come, Join with Us »Liahonaខែ វិច្ឆិកា ឆ្នាំ ២០១៣ ទំព័រ ២១ ) ហើយនៅទីបំផុត យើងមានការអះអាងថា យើងនឹងមិននៅឯកោទេ នៅពេលយើងឆ្លងកាត់ទុក្ខលំបាក ដ្បិតព្រះយាងមកជួបប្រជាជនរបស់ទ្រង់នៅគ្រាដែលពួកគេមានទុក្ខ ( សូមមើល ម៉ូសាយ ២៤:១៤ ) ។

នៅពេលយើងរៀនអំពីសេចក្តីពិត ព្រះអម្ចាស់ប្រទានឱកាសដល់យើងឲ្យធ្វើអ្វីដែលទ្រង់នឹងធ្វើ បើទ្រង់គង់នៅទីនេះនាថ្ងៃនេះ ។ ពិតណាស់ទ្រង់បានបង្ហាញដល់យើងតាមការបង្រៀនរបស់ទ្រង់អំពីអ្វីដែលយើងត្រូវធ្វើ ៖ « អ្នករាល់គ្នាត្រូវចេញទៅ ដោយនូវព្រះចេស្ដានៃព្រះវិញ្ញាណរបស់យើង ដោយផ្សាយដំណឹងល្អរបស់យើងពីរៗនាក់ដោយនូវព្រះនាមយើង ដោយបន្លឺសម្លេងឡើងហាក់ដូចជាសម្លេងត្រែដោយប្រកាសប្រាប់ព្រះបន្ទូលយើង ដូចជាពួកទេវតានៃព្រះ » ( គោលលទ្ធិ និងសេចក្តីសញ្ញា ៤២:៦ ) ។ ឱកាសសម្រាប់ការបម្រើជាអ្នកផ្សព្វផ្សាយសាសនានៅក្នុងយុវវ័យរបស់យើងគឺ ពិសេសណាស់ !

យុវជនសូមមេត្តាកុំពន្យាពេលរៀបចំខ្លួនដើម្បីបម្រើព្រះអម្ចាស់ជាពួកអ្នកផ្សព្វផ្សាយសាសនាឡើយ ។ នៅពេលក្មួយៗប្រឈមមុខនឹងស្ថានភាពពិបាកសម្រេចចិត្តទៅបម្រើបេសកកម្ម ដូចជា អាក់ខានការសិក្សាមួយរយៈ ឃ្លាតពីមិត្តស្រីដោយពុំធានាថានឹងអាចដើរលេងនឹងនាងបានម្តងទៀត ឬត្រូវដើរចេញពីការងារមួយ—តែសូមចងចាំពីគំរូរបស់ព្រះអង្គសង្រ្គោះ ។ អំឡុងការងារបម្រើរបស់ទ្រង់ ទ្រង់ក៏បានប្រឈមនឹងការលំបាក រួមទាំងការរិះគន់ ការធ្វើទុក្ខបុកម្នេញ និងទីបំផុត ទទួលពែងល្វីងនៃការពលិកម្មដ៏ធួនរបស់ទ្រង់ ។ ប៉ុន្តែនៅគ្រប់ស្ថានភាព ទ្រង់ខិតខំធ្វើតាមព្រះទ័យនៃព្រះបិតាទ្រង់ ហើយថ្វាយសិរីល្អដល់ទ្រង់ ។ ( សូមមើល យ៉ូហាន ៥:៣០; ៦:៣៨–៣៩; នីហ្វៃទី ៣ ១១:១១; គោលលទ្ធិ និង សេចក្ដីសញ្ញា ១៩:១៨–១៩ ) ។

យុវនារី សូមស្វាគមន៍ បើសិនជាក្មួយមានបំណងប្រាថ្នាធ្វើការនៅក្នុងចម្ការទំពាំងបាយជូររបស់ព្រះអម្ចាស់ ហើយកាលដែលក្មួយរៀបចំខ្លួនដើម្បីបម្រើជាអ្នកផ្សព្វផ្សាយសាសនាពេញម៉ោង នោះក្មួយក៏នឹងជួបការប្រឈមមុខដូចគ្នានេះដែរ ។

ខ្ញុំសូមសន្យាចំពោះក្មួយទាំងអស់ដែលសម្រេចចិត្តបម្រើទ្រង់ថា រយៈ ២៤ ខែ ឬ ១៨ ខែនៃការបម្រើនៅក្នុងតំបន់បេសកកម្ម វានឹងកន្លងផុតទៅដូចជាក្មួយនៅផ្ទះផងដែរ ប៉ុន្តែឱកាសដែលរង់ចាំយុវជន និងយុវនារីដែលមានភាពស័ក្តិសមនៅក្នុងសាសនាចក្រទៅតំបន់បេសកកម្មគឺពិសេស ។ ឯកសិទ្ធិនៃការធ្វើជាតំណាងរបស់ព្រះអង្គសង្រ្គោះ ព្រះយេស៊ូវគ្រីស្ទ និងសាសនាចក្ររបស់ទ្រង់ ពុំអាចថាមិនខ្វល់ខ្វាយនោះទេ ។ ក្មួយត្រូវចូលរួមអធិស្ឋានច្រើនរាប់មិនអស់ ហើយអភិវឌ្ឍ និងថ្លែងទីបន្ទាល់ជាច្រើនដងក្នុងមួយថ្ងៃៗ ត្រូវសិក្សាព្រះគម្ពីរជាច្រើនម៉ោង ត្រូវជួបមនុស្សដែលក្មួយមិនធ្លាប់ជួប បើក្មួយនៅផ្ទះមិនទៅបម្រើទេ នោះហើយគឺជាបទពិសោធន៍ដែលពុំអាចពិពណ៌នាបាន ។ បទពិសោធន៍ដូចគ្នានេះគឺបម្រុងទុកសម្រាប់យុវវ័យ ដែលព្រះអម្ចាស់បានហៅឲ្យបម្រើបេសសកម្មផ្នែកសេវាកម្មផងដែរ ។ សូមស្វាគមន៍ក្មួយៗ ហើយវាចាំបាច់ណាស់ ។ សូមកុំគិតថាបេសកកម្មផ្នែកសេវាកម្មពុំសូវសំខាន់នោះឡើយ ដ្បិតបេសកកម្មផ្នែកសេវាកម្មក៏ផ្តល់នូវបទពិសោធន៍ដែលពុំអាចពិពណ៌នាបានផងដែរ ។ « តម្លៃនៃព្រលឹងទាំងឡាយ គឺមហិមាណាស់ចំពោះព្រះនេត្រនៃព្រះ » ( គោលលទ្ធិ និងសេចក្ដីសញ្ញា ១៨:១០ ) រួមទាំងតម្លៃនៃព្រលឹងក្មួយ ។

ពេលត្រឡប់មកពីការមប្រើវិញ ប្រហែលជាមិត្តស្រី ឬមិត្តប្រុសរបស់ក្មួយៗពុំនៅរង់ចាំក្មួយទៀតទេ ប៉ុន្តែក្មួយៗច្បាស់ជាបានរៀនយ៉ាងល្អអំពីរបៀបធ្វើការទាក់ទងយ៉ាងមានប្រសិទ្ធភាពហើយ ។ ការសិក្សារបស់ក្មួយៗនឹងកាន់តែមានន័យដោយក្មួយៗមានបទពិសោធន៍អំពីការរៀបចំខ្លួនឲ្យកាន់តែល្អសម្រាប់កន្លែងធ្វើការផងដែរ ហើយចុងក្រោយ ក្មួយៗនឹងមានភាពក្លាហានច្បាស់លាស់ប្រកាសដំណឹងល្អនៃសេចក្តីសុខសាន្ត ថ្លែងទីបន្ទាល់អំពីសេចក្តីពិតដែលបានស្ដារឡើងវិញ ។

សម្រាប់បងប្អូនដែលបានរៀបការហើយ ហើយស្ថិតនៅក្នុងដំណាក់កាលផ្សេងនៃជីវិតរបស់ បងប្អូនសំខាន់ណាស់នៅក្នុងកិច្ចការរបស់ព្រះអម្ចាស់ ។ សូមរៀបចំខ្លួនរបស់បងប្អូន ។ សូមរស់នៅក្នុងជីវិតល្អ ស្វែងរកភាពទីពឹងខ្លួនខាងសាច់ឈាម និងខាងវិញ្ញាណ ពីព្រោះឱកាសដើម្បីធ្វើអ្វីដែលព្រះអម្ចាស់នឹងធ្វើសម្រាប់បុត្រាបុត្រីរបស់ទ្រង់គឺមានសម្រាប់មនុស្សគ្រប់វ័យ ។ បទពិសោធន៍ដ៏រីករាយបំផុតដែលភរិយាខ្ញុំ និងខ្ញុំមាននៅប៉ុន្មានឆ្នាំមុននេះ បានកើតឡើងខណៈកំពុងបម្រើជាមួយគូស្វាមីភរិយាល្អៗ បម្រើនៅកន្លែងដ៏ល្អ និងបម្រើមនុស្សពិសេសៗ ។

បទពិសោធន៍ដែលខ្ញុំមាននៅពេលជិតរៀនចប់ បានបង្រៀនខ្ញុំថា យើងក៏ត្រូវការពារសេចក្តីពិត នៅពេលយើងប្រកាសពីសេចក្តីពិត ហើយការការពារសេចក្តីពិតគឺជារឿងដ៏សកម្មមួយ ។ ការការពារសេចក្តីពិតមិនគួរធ្វើឡើងតាមរបៀបដែលឃោរឃៅនោះទេ ប៉ុន្តែ គួរតែធ្វើឡើងដោយចាប់អារម្មណ៍ពិតដើម្បីស្រឡាញ់ ចែកចាយ និងអញ្ជើញមនុស្សដែលយើងថ្លែងទីបន្ទាល់អំពីសេចក្តីពិត ដោយគិតតែអំពីសុខុមាលភាពខាងសាច់ឈាម និងខាងវិញ្ញាណនៃបុត្រាបុត្រីរបស់ព្រះវរបិតាសួគ៌ដែលពេញដោយក្តីស្រឡាញ់ប៉ុណ្ណោះ ( សូមមើល ម៉ូសាយ ២:៤១ ) ។

នៅក្នុងសន្និសីទទូទៅនាខែ តុលា ឆ្នាំ ២០២១ ប្រធានរ័សុល អិម ណិលសុន ព្យាការីជាទីស្រឡាញ់របស់យើងបានបង្រៀនថា ការផ្ទុយទៅនឹងអ្វីដែលមនុស្សខ្លះគិត គឺជាអ្វីដែលយើងហៅថា ត្រូវ និងខុស ។ ពិតជាមានសេចក្តីពិត—ជាសេចក្តីពិតដ៏អស់កល្បជានិច្ច ។ ( សូមើល « Pure Truth, Pure Doctrine, and Pure Revelation »Liahonaខែ វិច្ឆិកា ឆ្នាំ ២០២១ ទំព័រ ៦ ) ។

ព្រះគម្ពីរបរិសុទ្ធបង្រៀនយើងថា « សេចក្ដីពិតគឺជាការចេះដឹងអំពីការណ៍ទាំងឡាយដែលមាននៅពេលនេះ និង ការណ៍ទាំងឡាយដែលមានមកហើយ ហើយនឹងការណ៍ទាំងឡាយដែលនឹងមានខាងមុខ » ( គោលលទ្ធិ និងសេចក្តីសញ្ញា ៩៣:២៤ ) ។

ចំណេះដឹងនៃសេចក្តីពិតពុំមែនធ្វើឲ្យយើងជាមនុស្សអស្ចារ្យជាងអ្នកផ្សេងនោះទេ ប៉ុន្តែវាបង្រៀនយើងពីអ្វីដែលយើងត្រូវធ្វើដើម្បីត្រឡប់ទៅទីវត្តមានរបស់ព្រះវិញ ។

កាលបងប្អូនបន្តឆ្ពោះទៅមុខយ៉ាងរឹងមាំនៅក្នុងព្រះគ្រីស្ទ ហើយមានភាពក្លាហាន មិនត្រឹមតែប្រកាសសេចក្តីពិតប៉ុណ្ណោះទេ ប៉ុន្តែនឹងរស់នៅតាមសេចក្តីពិតផងនោះ នោះបងប្អូននឹងទទួលបានការលួងលោម និងសេចក្តីសុខសាន្តនៅអំឡុងនៃចលាចលដែលបងប្អូននឹងជួបប្រទះនៅសម័យចុងក្រោយនេះ ។

ឧបសគ្គនៃជីវិតអាចធ្វើឲ្យយើងចុះចាញ់ ប៉ុន្តែសូមដឹងថា នៅពេលយើងអនុវត្តសេចក្តីជំនឿលើព្រះយេស៊ូវគ្រីស្ទ« សេចក្ដីទុក្ខលំបាក[ របស់យើង ] នោះគ្រាន់តែមួយភ្លែតប៉ុណ្ណោះទេ » ( គោលលទ្ធិ និង សេចក្ដីសញ្ញា ១២១:៧ )នៅក្នុងវិសាលភាពដ៏ធំនៃភាពអស់កល្បជានិច្ច ។ សូមកុំដាក់ពេលកំណត់ដើម្បីបញ្ចប់ទុក្ខលំបាក ឬឧបសគ្គរបស់បងប្អូនឡើយ ។ សូមទុកចិត្តលើព្រះវបិតាសួគ៌ា ហើយកុំបោះបង់ចោលឡើយ ដ្បិតបើយើងបោះបង់ចោល នោះយើងនឹងមិនអាចដឹងថា ទីបញ្ចប់នៃដំណើររបស់យើងនឹងមានសភាពបែបណានៅក្នុងនគររបស់ព្រះឡើយ ។

សូមប្រកាន់ខ្ជាប់នូវសេចក្តីពិត ដោយការរៀនពីប្រភពនៃសេចក្តីពិត ៖

ព្រះគម្ពីរ ( សូមមើល នីហ្វៃទី ២ ៣២:៣ ) ។
ប្រសាសន៍របស់ពួកព្យាការី( សូមមើល អេម៉ុស ៣:៧ ) ។
ព្រះវិញ្ញាណបរិសុទ្ធ ( សូមមើល យ៉ូហាន ១៦:១៣ ) ។

ខ្ញុំសូមថ្លែងទីបន្ទាល់ពីព្រះយេស៊ូវគ្រីស្ទ ហើយថានេះគឺជាសាសនាចក្ររបស់ទ្រង់ ។ យើងមានព្យាការីដែលនៅរស់ ហើយយើងនឹងមានសេរីភាពជានិច្ច នៅពេលយើងប្រកាសសេចក្តីពិតដោយក្លាហាន ។ នៅក្នុងព្រះនាមនៃព្រះយេស៊ូវគ្រីស្ទ អាម៉ែន ៕