ថ្ងៃនេះ

ដោយអែលឌើរ រ៉ូណល អេ រ៉ាសបាន

ក្នុងកូរ៉ុមនៃពួកសាវកដប់ពីរនាក់

ព្យាការីនៅរស់របស់យើងកំពុងធ្វើចំណែករបស់លោកក្នុងការចែកចាយព្រះគម្ពីរមរមនឲ្យជោរជន់ពាសពេញលើផែនដី ។ យើងត្រូវធ្វើតាមការដឹកនាំរបស់លោក ។

បងប្អូនប្រុសស្រីជាទីស្រឡាញ់ នៅក្នុងព្រះគម្ពីរមរមន ឃ្លា « ថ្ងៃនេះ »^១ ត្រូវបានប្រើម្ដងហើយម្ដងទៀត ដើម្បីអំពាវនាវឲ្យយកចិត្តទុកដាក់ក្នុងការប្រឹក្សា ការសន្យា និងការបង្រៀន ។ ស្ដេចបេនយ៉ាមីន បានដាស់តឿនប្រជាជន នៅក្នុងការថ្លែងជាលើកចុងក្រោយថា « ស្ដាប់ឮសំឡេងយើង ដែលយើងនឹងនិយាយទៅកាន់អ្នកនៅថ្ងៃនេះ … សូមបើកត្រចៀកអ្នក ដើម្បីឲ្យអ្នករាល់គ្នាអាចបានឮ និងចិត្តអ្នក ដើម្បីឲ្យរាល់គ្នាអាចបានយល់ និងគំនិតអ្នក ដើម្បីឲ្យសេចក្ដីអាថ៌កំបាំងនៃព្រះ អាចបានលាតត្រដាងបង្ហាញដល់អ្នកចុះ » ។^២ សន្និសីទទូទៅ គឺមានលក្ខខណ្ឌស្រដៀងគ្នានេះដែរ ។ យើងមកដើម្បីស្តាប់ការប្រឹក្សាអំពី « ថ្ងៃនេះ » ដើម្បីយើងអាច « ស្មោះត្រង់គ្រប់ពេលវេលា »^៣ ចំពោះព្រះអម្ចាស់ និងដំណឹងល្អរបស់ទ្រង់ ។ រឿងដ៏ជ្រួតជ្រាបក្នុងគំនិតខ្ញុំ « ថ្ងៃនេះ » គឺសារៈសំខាន់នៃការតាំងចិត្តរបស់យើងសារជាថ្មីចំពោះព្រះគម្ពីរមរមន ដែលយ៉ូសែប ស្ម៊ីធ បានហៅថា « គម្ពីរដ៏ត្រឹមត្រូវបំផុតជាងគម្ពីរណាទាំងអស់នៅលើផែនដីនេះ » ។^៤

ខ្ញុំកាន់ព្រះគម្ពីរមរមនមួយក្បាលនៅក្នុងដៃរបស់ខ្ញុំ ។ នេះជាកំណែបុរាណឆ្នាំ ១៩៧០ របស់ខ្ញុំ ហើយវាមានតម្លៃចំពោះខ្ញុំណាស់ ។ តាមរូបរាងវា ចាស់ ហើយទក់មែន ប៉ុន្តែគ្មានសៀវភៅណាដែលសំខាន់ចំពោះជីវិតខ្ញុំ និងទីបន្ទាល់ខ្ញុំ ដូចសៀវភៅនេះទេ ។ អំណានសៀវភៅនេះ ខ្ញុំបានទទួលសាក្សីតាមរយៈព្រះវិញ្ញាណថា ព្រះយេស៊ូវគ្រីស្ទ ជាព្រះរាជបុត្រានៃព្រះ ^៥ថាទ្រង់ជាព្រះអង្គសង្គ្រោះរបស់ខ្ញុំ ^៦ថាបទគម្ពីរទាំងនេះគឺជាព្រះបន្ទូលនៃព្រះ ^៧ហើយថាដំណឹងល្អគឺបានស្ដារឡើងវិញ ។^៨ សេចក្ដីពិតទាំងនោះដក់ជាប់យ៉ាងជ្រាលជ្រៅនៅក្នុងខ្លួនខ្ញុំ ។ ដូចព្យាការីនីហ្វៃបានថ្លែងថា « ព្រលឹងខ្ញុំត្រេកអរចំពោះការណ៍ទាំងឡាយនៃព្រះអម្ចាស់ » ។^៩

អែលឌើរ រ៉ាស់បាន ជាមួយប្រធានបេសកកម្មរបស់លោក និង អែលឌើរ ហាងស៍ — រូបពីឆ្វេងទៅស្ដាំ ៖ អែលឌើរ រ៉ូណល អេ រ៉ាសបាន ជាអ្នកផ្សព្វផ្សាយសាសនាកាលពីក្មេង ប្រធាន ហារ៉ូលដ៍ វាលឃីនសុន ជាប្រធាននៃបេសកកម្មរដ្ឋភាគខាងខាងកើត និងអែលឌើរ ម៉ារ៉ុន ឌី ហាងស៍ អ្នកមានសិទ្ធិអំណាចទូទៅនៃពួកចិតសិបនាក់ ។

នេះគឺជាប្រវត្តិនៃរឿងនេះ ។ ក្នុងនាមជាអ្នកផ្សព្វផ្សាយសាសនាវ័យក្មេងមួយរូប ខ្ញុំបានទទួលការទូន្មានពីអែលឌើរ ម៉ារ៉ុន ឌី ហាងស៍ ដែលបានមកសួរសុខទុក្ខយើងនៅក្នុងបេសកកម្ម រដ្ឋភាគខាងកើត ។ លោកគឺជាអតីតប្រធានបេសកកម្មចក្រភពអង់គ្លេស ហើយពួកអ្នកផ្សព្វផ្សាយសាសនាពីររូបរបស់លោកគឺឈរនៅលើវេទិកាថ្ងៃនេះ ៖ បងប្អូនប្រុសជាទីស្រឡាញ់របស់ខ្ញុំ នោះគឺ អែលឌើរ ជែហ្វ្រី អ័រ ហូឡិន និងអែលឌើរ ឃ្វីនថិន អិល ឃុក ។^១០ លោកបានអញ្ជើញយើងឲ្យអានព្រះគម្ពីរមរមនឲ្យបានយ៉ាងហោចណាស់ពីរចប់ ដូចជាពួកអ្នកផ្សព្វផ្សាយសាសនារបស់លោកនៅអង់គ្លេសផងដែរ ។ ខ្ញុំទទួលយកការអញ្ជើញនោះ ។ អំណានលើកទីមួយ ខ្ញុំបានគូសចំណាំ ឬគូសបន្ទាត់ពីក្រោមគ្រប់កន្លែងដែលបានចង្អុលប្រាប់ ឬធ្វើបន្ទាល់ពីព្រះយេស៊ូវគ្រីស្ទ ។ ខ្ញុំបានប្រើខ្មៅដៃពណ៌ក្រហម ហើយខ្ញុំគូសបន្ទាត់ពីក្រោមវគ្គបទគម្ពីរជាច្រើន ។ លើកទីពីរ អែលឌើរ ហាងស៍ ប្រាប់ឲ្យគូសពណ៌ចំណាំគោលការណ៍ និងគោលលទ្ធិនៃដំណឹងល្អ ហើយលើកនេះ ខ្ញុំបានប្រើពណ៌ខៀវគូសលើខគម្ពីរម្ដង។ ខ្ញុំអានព្រះគម្ពីរមរមនពីរដង ដូចដែលបានស្នើសុំ ហើយអានពីរដងទៀត ដោយប្រើពណ៌លឿង និងពណ៌ខ្មៅដើម្បីគូសចំណាំវគ្គដែលសំខាន់ចំពោះខ្ញុំ ។^១១ ដូចដែលបងប្អូនបានឃើញខ្ញុំបានធ្វើកំណត់ចំណាំជាច្រើន ។

ការអានរបស់ខ្ញុំសំខាន់ជាងការគ្រាន់តែគូសចំណាំខគម្ពីរទៅទៀត ។ រាល់លើកដែលខ្ញុំអានព្រះគម្ពីរមរមន ពីដើមដល់ចប់ ខ្ញុំបានពេញដោយក្ដីស្រឡាញ់ដ៏ខ្លាំងចំពោះព្រះអម្ចាស់ ។ ខ្ញុំទទួលអារម្មណ៍ចាក់ឫសយ៉ាងជ្រៅនូវសាក្សីនៃសេចក្ដីពិតចំពោះការបង្រៀនរបស់ទ្រង់ និងរបៀបដែលវាអនុវត្តចំពោះ « ថ្ងៃនេះ » ។ ចំណងជើងពិតជាត្រូវជាមួយនឹងព្រះគម្ពីរណាស់ ៖ « សក្ខីបទមួយទៀតអំពីព្រះយេស៊ូវគ្រីស្ទ » ។^១២ តាមរយៈការសិក្សា និងសាក្សីខាងវិញ្ញាណដែលខ្ញុំបានទទួល នោះខ្ញុំបានក្លាយជាអ្នកផ្សព្វផ្សាយសាសនាព្រះគម្ពីរមរមន និងជាសិស្សរបស់ព្រះយេស៊ូវគ្រីស្ទម្នាក់ ។^១៣

« ថ្ងៃនេះ » អ្នកផ្សព្វផ្សាយសាសនាមួយរូបក្នុងចំណោមអ្នកផ្សព្វផ្សាយសាសនាដ៏អស្ចារ្យបំផុតនៃព្រះគម្ពីរមរមនគឺប្រធាន រ័សុល អិម ណិលសុន ។ នៅពេលលោកទើបបានហៅឲ្យធ្វើជាសាវកថ្មីៗ លោកបានផ្ដល់ការបង្រៀនពិសេសមួយនៅ អាក់រ៉ា ប្រទេសហ្គាណា ។^១៤ មានការចូលរួមពីឥស្សរជនជាច្រើន រួមមានស្តេចក្នុងកុលសម្ព័ន្ធអាហ្វ្រិក ដែលទ្រង់មានបន្ទូលដោយមានអ្នកបកប្រែ ។ ទ្រង់គឺជាអ្នកសិក្សាព្រះគម្ពីរប៊ីបយ៉ាងឧស្សាហ៍ ហើយមានសេចក្តីស្រឡាញ់ដល់ព្រះអម្ចាស់ ។ បន្ទាប់ពីសុន្ទរកថារបស់ប្រធានណិលសុន ស្ដេចអង្គនោះបានយាងមកជួបនឹងលោក ហើយទ្រង់បានសួរជាភាសាអង់គ្លេសយ៉ាងស្ទាត់ថា « តើលោកជានរណា ? » ប្រធានណិលសុនបានរៀបរាប់ថា លោកគឺជាសាវកដែលបានតែងតាំងមួយរូបរបស់ព្រះយេស៊ូវគ្រីស្ទ ។^១៥ សំណួរបន្ទាប់ទៀតរបស់ទ្រង់គឺ « តើលោកអាចបង្រៀនខ្ញុំអ្វីខ្លះអំពីព្រះយេស៊ូវគ្រីស្ទ ? »^១៦

ប្រធានណិលសុនបានយកព្រះគម្ពីរមរមន ហើយបានបើកទៅ នីហ្វៃទី៣ ១១ ។ ប្រធានណិលសុន និងស្ដេចអង្គនោះបានអានរួមគ្នានូវការបង្រៀនរបស់ព្រះអង្គសង្គ្រោះដល់ពួកសាសន៍នីហ្វៃ ៖ « មើលចុះ យើងគឺព្រះយេស៊ូវគ្រីស្ទ ដែលពួកព្យាការីបានធ្វើបន្ទាល់ថា នឹងយាងមកឯលោកិយ ។… យើងជាពន្លឺ ហើយជាជីវិតនៃពិភពលោក » ។^១៧

ប្រធានណិលសុនបានថ្វាយព្រះគម្ពីរមរមនជូនព្រះអង្គ ហើយទ្រង់បានមានបន្ទូលតបថា « លោកអាចជូនពេជ្រ ឬត្បូងទទឹមដល់ខ្ញុំបាន ប៉ុន្តែគ្មានអ្វីដែលមានតម្លៃចំពោះខ្ញុំជាងចំណេះដឹងបន្ថែមអំពីព្រះអម្ចាស់ ព្រះយេស៊ូវគ្រីស្ទឡើយ » ។^១៨

នោះមិនមែនជាគំរូតែម្ដងពីរបៀបដែលព្យាការីជាទីស្រឡាញ់របស់យើងចែកចាយព្រះគម្ពីរមរមននោះទេ ។ លោកបានឲ្យព្រះគម្ពីរមរមនទៅកាន់មនុស្សរាប់រយនាក់ លោកតែងតែថ្លែងទីបន្ទាល់របស់លោកពីព្រះយេស៊ូវគ្រីស្ទជានិច្ច ។ ពេលប្រធានណិលសុនជួបជាមួយភ្ញៀវ ប្រធានាធិបតី ស្ដេច ប្រមុខរដ្ឋ និងអ្នកដឹកនាំអាជីវកម្ម និងអង្គការនានា និងអ្នកដឹកនាំនៃជំនឿផ្សេងគ្នា មិនថានៅទីស្នាក់ការកណ្តាលនៃសាសនាចក្រ ឬនៅទីតាំងរបស់ពួកគេនោះទេ លោកជូនសៀវភៅនៃការបើកសម្តែងព្រះគម្ពីរនេះ ដោយគារវភាពជានិច្ច ។ លោកអាចជូនអំណោយជាច្រើនដល់ពួកគេ ដែលរុំនឹងខ្សែបូរ ដែលវត្ថុនោះអាចដាក់តាំងលើតុ ឬក្នុងទូទុកជាការរំឭកដល់ទស្សនកិច្ចរបស់លោកបាន ។ ប៉ុន្តែផ្ទុយទៅវិញ លោកជូនអ្វីដែលមានតម្លៃបំផុតចំពោះលោក ដែលលើសពីពេជ្រ និងត្បូងទទឹមទៅទៀត ដូចដែលស្តេចក្នុងកុលសម្ព័ន្ធបានពិពណ៌នា ។

ប្រធានណិលសុនបានថ្លែងថា « សេចក្ដីពិតនៃព្រះគម្ពីរមរមន មាននូវ អំណាចដើម្បីព្យាបាល លួងលោម ស្ដារឡើងវិញ ជួយ ពង្រឹង លើកទឹកចិត្ត ហើយធ្វើឲ្យព្រលឹងយើងរីករាយ » ។^១៩ ខ្ញុំបានឃើញព្រះគម្ពីរមរមនទាំងនេះត្រូវបានកាន់យ៉ាងណែននៅក្នុងដៃអស់អ្នកដែលបានទទួលវាពីព្យាការីនៃព្រះរបស់់យើង ។ ពុំមានអំណោយណាដែលមានតម្លៃជាងនេះនោះទេ ។

ប្រធានណិលសុនជាមួយស្រ្តីទីមួយនៃប្រទេស ហ្គាំប៊ី

ថ្មីៗនេះ លោកបានជួបជាមួយស្ត្រីទីមួយនៃប្រទេសហ្គាំប៊ីនៅការិយាល័យរបស់លោក ហើយបានជូនព្រះគម្ពីរមរមនទៅស្ត្រីទីមួយដោយរាបសា ។ លោកពុំបានឈប់នៅត្រឹមនេះទេ ។ លោកបានបើកគម្ពីរនេះអានជាមួយស្ត្រីទីមួយ ដើម្បីបង្រៀន និងធ្វើទីបន្ទាល់ពីព្រះយេស៊ូវគ្រីស្ទ ពីដង្វាយធួនរបស់ទ្រង់ និងពីសេចក្ដីស្រឡាញ់របស់ព្រះចំពោះបុត្រាបុត្រីទាំងអស់របស់ទ្រង់—នៅគ្រប់ទីកន្លែង ។

ព្យាការីនៅរស់របស់យើងកំពុងធ្វើចំណែករបស់លោកក្នុងការចែកចាយព្រះគម្ពីរមរមនឲ្យជោរជន់ពាសពេញលើផែនដី ។^២០ ប៉ុន្តែលោកមិនអាចធ្វើឲ្យជោរជន់តែម្នាក់លោកបានទេ ។ យើងត្រូវធ្វើតាមការដឹកនាំរបស់លោក ។

ដោយបានបំផុសគំនិតតាមរយៈគំរូរបស់លោក ខ្ញុំបានព្យាយាមបន្ទាបខ្លួន និងចែកចាយព្រះគម្ពីរមរមនកាន់តែក្លាហានជាងមុន ។

អែលឌើរ រ៉ាសបានជាមួយនឹងប្រធានាធិបតីរបស់ប្រទេស ម៉ូហ្សំប៊ិក<nb/>។

ថ្មីៗនេះខ្ញុំបានចាត់តាំងឲ្យទៅប្រទេសម៉ូហ្សំប៊ិក ។ ប្រជាជននៃប្រទេសដ៏ស្រស់ស្អាតនេះកំពុងពុះពារនឹងភាពក្រីក្រ សុខភាពមិនល្អ គ្មានការងារធ្វើ រងព្យុះភ្លៀង និងភាពចលាចលខាងនយោបាយ ។ ខ្ញុំមានកិត្តិយសក្នុងការជួបជាមួយ លោក ហ្វីលីព ណៃយ៉ូស៊ី ដែលជាប្រធានាធិបតីរបស់ប្រទេសនេះ ។ តាមការស្នើសុំរបស់លោក ខ្ញុំបានអធិស្ឋានសម្រាប់លោក និងប្រជាជាតិរបស់លោក ខ្ញុំបានជម្រាបលោក ថាយើងកំពុងសាងសង់ព្រះវិហារបរិសុទ្ធនៃព្រះយេស៊ូវគ្រីស្ទ^២១ក្នុងប្រទេសរបស់លោក ។ នៅចុងបញ្ចប់ដំណើរទស្សនកិច្ចរបស់យើង ខ្ញុំបានជូនព្រះគម្ពីរមរមនជាភាសាព័រទុយហ្គាល់មួយក្បាលដល់លោក ដែលជាភាសាកំណើតរបស់លោក ។ កាលដែលលោកទទួលយកព្រះគម្ពីរដោយអំណរគុណ ខ្ញុំបានថ្លែងទីបន្ទាល់ថាសេចក្ដីសង្ឃឹម និងការសន្យាសម្រាប់ប្រជាជនរបស់លោក មាននៅក្នុងព្រះបន្ទូលរបស់ព្រះអម្ចាស់ ដែលនៅលើសន្លឹកទំព័រនៃព្រះគម្ពីរនេះ ។^២២

អែលឌើរ រ៉ាស់បាន ជាមួយ ស្តេច និងម្ចាស់ក្សត្រីនៃអាណាចក្រ ឡិតស៊ូថូ

មានគ្រាមួយទៀត ភរិយារបស់ខ្ញុំ មេឡានី និងខ្ញុំបានចូលគាល់ស្ដេច ឡិតស៊ី ទីIII នៃអាណាចក្រ ឡិតស៊ូថូ និងម្ចាស់ក្សត្រីរបស់ទ្រង់នៅព្រះដំណាក់របស់ទ្រង់ ។^២៤ សម្រាប់ពួកខ្ញុំ គោលបំណងនៃទស្សនកិច្ចរបស់យើងគឺថ្វាយព្រះគម្ពីរមរមនទៅទ្រង់ទាំងពីរអង្គ បន្ទាប់មកចែកចាយទីបន្ទាល់របស់ខ្ញុំ ។ នៅពេលខ្ញុំគិតពីបទពិសោធន៍នោះ និងបទពិសោធន៍ផ្សេងទៀត ខគម្ពីរមួយក្នុងបទគម្ពីរពួកបរិសុទ្ធថ្ងៃចុងក្រោយផុសឡើងក្នុងគំនិត ៖ « ភាពពោរពេញនៃដំណឹងល្អរបស់យើង អាចបានប្រកាសប្រាប់ ដោយពួកកម្សោយ និងពួករាបទាប ដល់អស់ចុង [ ផែនដី ] និងនៅចំពោះពួកមហាក្សត្រ និងពួកអ្នកត្រួតត្រាទាំងឡាយ » ។^២៤

អែលឌើរ រ៉ាសបានជាមួយឯកអគ្គរដ្ឋទូត ផានឌីយ<nb/>។

ថ្នាក់ដឹកនាំសាសនាចក្រជាមួយជាមួយលោកអយ្យកោ បាថូឡូមេវ ដ៏បរិសុទ្ធរបស់លោក

ខ្ញុំបានចែកចាយព្រះគម្ពីរមរមនជូនឯកអគ្គរដ្ឋទូតឥណ្ឌា លោកផានឌីយ^២៥ប្រចាំអង្គការសហប្រជាជាតិនៅទីក្រុងហ្សឺណែវ និងលោកអយ្យកោដ៏បរិសុទ្ធរបស់លោក គឺលោកបាថូឡូមីវ^២៦នៃព្រះវិហារអូស្សូដក់ខាងកើត និងមនុស្សជាច្រើនទៀត ។ ខ្ញុំទទួលអារម្មណ៍ពីព្រះវិញ្ញាណនៃព្រះអម្ចាស់គង់នៅជាមួយយើង នៅពេលខ្ញុំបានថ្វាយដោយផ្ទាល់ដៃនូវ « មូលដ្ឋាននៃសាសនារបស់យើង »^២៧ហើយថ្លែងទីបន្ទាល់របស់ខ្ញុំអំពីព្រះយេស៊ូវគ្រីស្ទ ជាថ្មជ្រុងយ៉ាងឯកនៃជំនឿរបស់យើង ។^២៨

ឥឡូវ បងប្អូនប្រុសស្រី បងប្អូនមិនចាំបាច់ទៅប្រទេសម៉ូហ្សំប៊ិក ឬឥណ្ឌា ឬគាល់មហាក្សត្រ និងអ្នកគ្រប់គ្រងទាំងឡាយ ដើម្បីជូនព្រះគម្ពីរនៃការបង្រៀនដ៏ពិសិដ្ឋ និងការសន្យានេះ ទៅនរណាម្នាក់នោះទេ ។ ខ្ញុំសូមអញ្ជើញបងប្អូន ថ្ងៃនេះ ឲ្យជូនព្រះគម្ពីរមរមនទៅមិត្តភក្ដិ និងគ្រួសារ មិត្តភក្តិធ្វើការជាមួយគ្នា គ្រូបង្វឹកបាល់ទាត់ ឬអ្នកលក់ដូរនៅផ្សាររបស់បងប្អូន ។ ពួកគាត់ត្រូវការព្រះបន្ទូលនៃព្រះអម្ចាស់ដែលមាននៅក្នុងព្រះគម្ពីរនេះ ។ ពួកគាត់ត្រូវការចម្លើយចំពោះសំណួរជីវិតប្រចាំថ្ងៃ និងជីវិតដ៏អស់កល្បជានិច្ចនាពេលខាងមុខ ។ ពួកគាត់ត្រូវតែស្គាល់ផ្លូវនៃសេចក្ដីសញ្ញាដែលលាតសន្ធឹងនៅចំពោះមុខពួកគាត់ និងសេចក្ដីស្រឡាញ់ដ៏ឋិតថេររបស់ព្រះអម្ចាស់ចំពោះពួកគាត់ ។ វាមានទាំងអស់នៅក្នុងព្រះគម្ពីរមរមន ។

នៅពេលបងប្អូនជូនព្រះគម្ពីរមរមនទៅពួកគាត់ បងប្អូនកំពុងបើកគំនិត និងដួងចិត្តរបស់ពួកគាត់ឲ្យទទួលយកព្រះបន្ទូលរបស់ព្រះហើយ ។ បងប្អូនមិនចាំបាច់យកព្រះគម្ពីរដែលបានបោះពុម្ពតាមខ្លួនបងប្អូននោះទេ ។ បងប្អូនគ្រាន់តែចែកចាយវាចេញពីទូរសព្ទដៃរបស់បងប្អូន ពីផ្នែកព្រះគម្ពីរក្នុងកម្មវិធីបណ្ណាល័យដំណឹងល្អប៉ុណ្ណោះ ។^២៩

សូមគិតដល់អស់អ្នកដែលអាចបានទទួលពរជ័យតាមរយៈដំណឹងល្អនៅក្នុងជីវិតរបស់ពួកគាត់ រួចផ្ញើព្រះគម្ពីរមរមនពីទូរសព្ទរបស់បងប្អូនទៅពួកគាត់ ។ សូមកុំភ្លេចបញ្ចូលទីបន្ទាល់របស់បងប្អូន និងរបៀបដែលព្រះគម្ពីរនេះបានប្រទានពរដល់ជីវិតរបស់បងប្អូនផងដែរ ។

មិត្តជាទីស្រឡាញ់របស់ខ្ញុំ ក្នុងនាមជាសាវកនៃព្រះអម្ចាស់មួយរូប ខ្ញុំសូមអញ្ជើញបងប្អូនឲ្យធ្វើតាមព្យាការីជាទីស្រឡាញ់របស់យើង គឺប្រធានណិលសុន ក្នុងការចែកចាយព្រះគម្ពីរមរមនឲ្យជោរជន់ពាសពេញលើផែនដី ។ តម្រូវការនេះគឺធំធេងណាស់ យើងត្រូវតែចូលរួមឥឡូវនេះ ។ ខ្ញុំសូមសន្យាថា បងប្អូននឹងចូលរួមក្នុង « កិច្ចការដ៏ធំបំផុត លើផែនដី » ការប្រមូលផ្ដុំវង្សអ៊ីស្រាអ៊ែល ^៣០កាលដែលបងប្អូនបានបំផុសគំនិតឲ្យឈោងទៅរកអស់អ្នកដែលត្រូវបាន « លាក់ពីសេចក្ដីពិត ពីព្រោះពួកគេមិនដឹងជាទៅរកសេចក្ដីពិតឯណាទេ » ។^៣១ ពួកគាត់ត្រូវការសាក្សី និងទីបន្ទាល់របស់បងប្អូន ពីរបៀបដែលព្រះគម្ពីរនេះបានផ្លាស់ប្ដូរជីវិតរបស់បងប្អូន ហើយនាំបងប្អូនឲ្យខិតទៅជិតព្រះ ភាពសុខសាន្តរបស់ទ្រង់ ^៣២និង « ដំណឹងពីសេចក្ដីអំណរដ៏អស្ចារ្យ » របស់ទ្រង់ ។^៣៣

ខ្ញុំសូមថ្លែងទីបន្ទាល់ថា តាមរយៈការរចនាដ៏ទេវភាព ព្រះគម្ពីរមរមនត្រូវបានរៀបចំឡើងនៅទ្វីបអាមេរិកកាលពីបុរាណ ដើម្បីចេញមកប្រកាសព្រះបន្ទូលរបស់ព្រះ ដើម្បីនាំព្រលឹងជាច្រើនមករកព្រះអម្ចាស់ ព្រះយេស៊ូវគ្រីស្ទ និងដំណឹងល្អដែលបានស្ដារឡើងវិញរបស់ទ្រង់ « ថ្ងៃនេះ » ។ នៅក្នុងព្រះនាមនៃព្រះយេស៊ូវគ្រីស្ទ អាម៉ែន ៕