NA DIGIDIGI KEI NA ILESILESI
E Dela ni O
Mo ivalavala dodonu ka bula marau tiko, se cava ga na kemu ituvaki. Sa nomu ilesilesi na nomu digidigi. Vakatorocaketaka na nomu rawa ka kei na taledi, ka mo veiqaravi kina. Kakua ni dau vucesa ka mo dau cakacaka vakaukauwa.
Ena dua na gauna sa oti au a vuka kina ena dua na waqavuka lailai. Ni keitou sa vakarau vuka, sa tarogi pailate sara e dua na pasidia na yawa ni vanua e cake keitou na vukaca. A kaya mai ni keitou na vuka tiko ena 9,500 na fute (2,900 m). a kaya o koya, “Qori tou na vuka toka e dela ni o.” A qai vakamacalataka, “Kevaka tou na vuka ena ruku ni o, tou na vakayavalati vakalevu. Ia, kevaka me tou na botea yani na o ka laki toka e delana, ena maravu sara na nodatou ilakolako.”
O ya e dua na ivakavuvuli e vakaparofita dina. Vei keitou na pasidia, keitou na sasaga yani, me levu na waiwai, sotavi na cagi veitubuyaki ka botei na o. Ia, ni sa curumi oti na cagi veitubuyaki sa vaka me sa na maravu tu ga na ilakolako. E dina ga ni takoso mai eso na cagi veitubuyaki eso sa vakamuria ga vakavinaka o pailate na ivakarau ni vuka, e maravu vakavinaka kina na ilakolako.
Au vakasamataka toka na vosa nei pailate: “Ia kevaka me tou na botea yani na o ka laki toka e delana, ena maravu sara na nodatou ilakolako.” Au vakasamataka ni sa vaka tu o ya na noda bula oqo. Ni da sa mai bula voli tiko oqo, sa vakaitamera na veika tawa kilikili kei na yalolailai kei na veika butobuto meda botea yani meda bula vaka e dua na Yalododonu Edaidai. Ena sobuti keda na Yalotabu ka yalo vakacegu meda bula marau kina. Meda gu yani, me yaloda dina, ka yaloqaqa, kei na digidigi donu meda botea yani na cagi veitubuyaki ka laki toka e delana. Na cagi veitubuyaki oqo e oka kina na veika tawa savasava e tiko vakavolivoliti keda tu ena veika ni vakaraitaki ni itukutuku. E yaco talega mai na yalolailai, luluqa, kei na bolebole ni “itovo vakayago” (Mosaia 3:19).
Ia, ni da digidigi dodonu, ka bulataka na ivakatagedegede eratou vakasalataka mai na Mataveiliutaki Taumada ena iSakisaki ni iTabagone, ka da gugumatua tiko vakaidina ena veisiga yadua meda botea yani na veika sa vakavuravura, ena totoka cake sara na noda ilakolako ena bula oqo. Eda na kune vakacegu tiko ni da toso tiko yani, ka da na yaco bula ki na noda iyacoyaco.
E sega ni tukuni ni na maravu tu ga na ilakolako ka sega na rarawa. A sega ni yalataki o ya, ni da na bolei ga ena ilakolako oqo, ka me a vakayacora tikoga na veika sa dodonu ka yadra tiko ena ilakolako oqo. Ia, ni da digitaka meda tiko e yasa ni Turaga eda na botea rawa yani na veitemaki ni bula oqo, eda na taukena kina na vakacegu kei na marau ena bula oqo kei na bula sa roro tiko mai.