Na iLavelave ni Dua na Soli iTukutuku: Ni Maji 2008

E rua na yabaki na kena tuvanaki ka vakarautaki vakaivola.

E a veisoliyaki e sivia na 2.3 na milioni na kena ilavelave ena 51 na veimataqali vosa.

Ena kena a vinakati vakalevu a gadrevi me rua tale na kena tabaki vakaivola.

Era a veitaratara yani e sivia e 340,000 na tamata ki na kena Mataveilawa (Web site).

E rokovi dina, ia na iwiliwili oqo e sega ni tukuna dina tiko na levu ni cakacaka oqo. Na bibi ni ilavelave ni mekesini Ensign kei na Liaona ni Maji 2008, o ya “Na Turaga o Jisu Karisito,” ena vakadinadinataki walega vua e dua ni sa veisautaki na nona bula.

Ki na Tamata Yadudua

Ena nodra a sureti eso me ra wasea na nodra nanuma kei na veika era sa sotava me baleta na ilavelave ni Maji 2008, era a vola mai e vuqa na lewenilotu ni sa laki veisautaki kina na nodra bula yadudua. A vola mai vakaoqo o Maria Felina Ferrer mai na Filipaini: “Sa qai imatai ni gauna oqo ena loma ni 29 na yabaki, ni noqu dau tukuna ka vola na veika e baleti Koya, meu sa vakila vakaidina sara na iVakabula ki na noqu bula. E sega ni dua walega na iulutaga o Koya, se dua walega na italanoa. E bula dina tiko o Koya… . E veisautaka sara ga vakadua na noqu bula. Na veivanua kecega au lako kina se ka au cakava, au vakila e yagoqu kei na yaloqu, ni Turaga o Jisu Karisito, ena Nona kaukauwa taucoko, e raici au tiko ka tu e yasaqu. E vakavuna na noqu gadreva meu tamata uasivi sara.”

E kaya vaqo o Tom Kunz e Magnolia, Texas, e Amerika: “E vakacegu sara ga na yaloqu niu wilika oti na mekesini oqo kau sa vinakata me sa daumaka na kequ ituvaki taucoko… . Au sa vakila ni lomani au na iVakabula kei na cecere ni Nona Veisorovaki ki na tamata yadudua.”

Wasea Vei Ira na Tani

E qasenivuli tiko ni gonelalai e Belgium o Linda Buysse-Vergauwen, ena nodrau lako vakavuli a solia vua o nona itokani e dua na ilavelave ni vula o Maji vata kei na dua na ivola ka veisureti tiko me laki rogoci nona itokani ni vosa ena Sigatabu ni Siganimate. A gole na itokani oqo ka sotava na veika vinaka. “Na ilavelave talei o ya ni Liaona a solia veiau edua na gauna meu teivaka kina e dua na sorenikau lailai ki na yaloi noqu itokani,” a kaya o Sister Buysse-Vergauwen.

E California, Amerika, e laki wilika tiko o Lori Larson ena vale ni caka ulu na nona Ensign ni Maji ka vakayavalata sara na yalona. E vakasamataka tikoga o koya ni mekesini oqo ena caka mana sara ni wasei yani vua e dua na lewe ni matalotu tale eso, ka na rawa me na vakadodonutaka na raici vakatani tiko ni noda Lotu. A taroga sara vua o daucakaulu na mekesini e wilika tiko. Ni mai cava na cakaulu kei na veivosaki o ya, sa kerea sara ga o daucakaulu me rau sa sikovi koya yani na daukaulotu.

A volia o Telma Chacón mai Guatemala City, e Guatemala, e 12 tale na ilavelave ni Liahona ka laki veisoliyaka ena Siganimate na mekesini oqo ka wasea vei iratou na tacina na nona ivakadinadina. A vakauta o Patricia Hegedus e Cardston, Alberta, Canada, e dua na kena ilavelave vua e dua na veiwatini mai Jamani eratou a veikilai ena vica na yabaki sa oti. Erau a marautaka sara ka yalataka me rau na wilika. Eratou a volia na matavuvale na Allan Harvey e Krugersdorp, Sauca Aferika, e 12 tale na ilavelave ka veisoliyaka yani vei ira na matavuvale e batinisala.

Sasaga ni Tabanalevu kei na iTeki

E solia wale na Lotu na ilavelave ni Ensign se Liaona me vakayagataki ena gauna ni veisikovi, veivakabulabulataki, kei na cakacaka ni kaulotu. E Igiladi, a vakayacora na iteki mai Chorley e dua na veivakabulabulataki ni Siganimate ka ra sureti mai na itokani, veiwekani ena itikotiko, lewenilotu luluqa, kei ira na vulagi dokai. Era a yadua kina na iVola i Momani kei na ilavelave ni Ensign ni Maji 2008.

Me tiki tiko ni yabaki ni vakananumi ni iSoqosoqo ni Veivukei, era a laki veisiko na iSoqosoqo ni Veivukei ni tikina o Ile-Ife, e Nigeria, ki na valeniveivesu mai kea ka veisoliyaka kina na ilavelave ni vula o Maji. Era a lomavata na iteki o Newcastle-Under-Lyme e Igiladi me ra sa yadua na nodra veimatavuvale na ilavelave oqo, ka ra sureti ki na dua na soqoni digitaki ni sakaramede ena Sigatabu ni Siganimate. A yaco kina me tarai na bula ni dua na turaga a luluqa tu vakalotu, ni oti ga na nona a se papitaiso sara ena 1980, ka sa marautaka tale tu oqo o koya na veivakalougatataki ni kosipeli ena nona bula.

Io, Eda Lotu Vakarisito

E vuqa era vola mai ni mekesini oqo e vakadodonutaka sara ga na veivakasama cala me baleta na Lotu i Jisu Karisito ni Yalododonu Edaidai. E tukuna mai o Barbara Mayes e Flagstaff, Arizona, e Amerika, ni kaya vaqo o koya na marama e dau samaka na nona vale: “Sa vuqa sara ga na ka au raica rawa ka tukuna tiko ni ko ni vakabauti Jisu. E rawa vakacava o ya? O drau vakabauta Vakamomani. O drau lotu Vakarisito?” A qai solia vua o Sister Mayes e dua na ilavelave ni Ensign ni Maji ka rau veitalanoa sara. “Ni sa wilika, sa vakataroga sara eso na taro bibi, ka sa tadola kina e dua na yalo a sogolati tu,” a kaya o Sister Mayes.

Erau a cakava na matavuvale nei Mike kei Shaz Kramer e Garwood, New Jersey, e Amerika, e dua na kanavata ena itekivu ni yabaki oqo ka ra sureti kina e vica na matavuvale sega ni lewe ni Yalododonu Edaidai. A yaco yani vakatotolo e dua na tagane vakawati me laki vakataroga na Lotu. E dua na nona itokani e italatala tiko a kaya vua ni da sega ni vakabauti Jisu Karisito. A kaya o Brother Kramer, “Au a qai taura mai e dua na ilavelave ni Ensign ni Maji, ka tiko e waqana na iyaloyalo kei Karisito, ka taroga vua, ‘Oqo beka na irairai ni lotu e sega ni vakabauti Jisu?’ ” A mani kauta na mekesini na turaga oqo, ka laki sotavi rau na daukaulotu ena macawa o ya me vakatataro tale kina.

E Dua na iTukutuku ni Veigauna Tawamudu

Sa veisoliyaka tikoga na Lotu na ilavelave ni Ensign kei na Liaona ni Maji 2008. E sega ni yaga duadua ga me wasei na itukutuku ni veigauna tawamudu oqo me baleta na iVakabula ena Siganisucu kei na Siganimate, ia sa rawa talega vei ira na lewenilotu me ra veivakacegui kina, vakavulica na ivakavuvuli dina, ka wasea vei ira na tani e dua na ivakadinadina qaqa ni Turaga o Jisu Karisito. E mana sara, ka rawa ni tara na bula ni vuqa tale na tamata.