Sa Tua Vua na iSau ni Taro
Ni ra lomatarotaro na itokani nei Christian Monzón, era kila ni sa tu vua na kena isau me ratou vukei kina.
Na cava mo na cakava ni ko raica vakasauri na iyaloyalo vakasisila? E dua na siga a kerea o Christian Monzón mai Asunción e Paraguay, e dua na talevoni veikauyaki mai vua e dua na nona itokani e koronivuli me qito kina. E raica ni tu kina na iyaloyalo vakasisila.
E sega tale ni lomalomarua o Christian ki na veika me na cakava kina o nona itokani, ka vukei kina o Christian me vakarusa laivi na iyaloyalo vakasisila o ya. A qai vakamacalataka vakamalua vua o Christian na rerevaki ni veivakacacani ni iyaloyalo vaka o ya. A kaya, “Kevaka o tama, o na sega ni vinakata me sarava o luvemu na ka oqo.”
Na veika eso e kaya vua o Christian era tiko ena Me iSakisaki ni iTabagone. E kaya o Christian ni vukea sara vakalevu na nona bula na ivola oqo. “Au na sega ni mai tuvaki tu vakaoqo ke sega na ivola oqo,” a kaya. Sa veisoliyaka talega o koya na ivola oqo. Era kaya vua ni ra sa dusimaki kina ena nodra dui leqa era sotava.
Ko na vukei vakacava ni ko sotava na veitemaki ni bula oqo? E kila tu o Christian ni Me iSakisaki ni iTabagone ena veivuke me baleta na vuqa ni veitemaki era coriti tu kina na nona itokani—o ya na waigaga kei na gunu, me kena ivakaraitaki. Eso vei ira na nona itokani e tiko na nodra Initaneti e nodra vale, ia e rawarawa sara na nodra sarava—na iyaloyalo vakasisila –ena sitoa ni Initaneti.
Era dau kere veivuke na itokani e koronivuli vei Christian kei Jimmy, na tuakana, baleta ni ra vakabauta ni sa tu vei rau na Yalododonu oqo na isau ni taro. Era dau rokova na gonevuli na nodrau vakabauta. Era dokai Christian vakalevu na nona lewe ni kalasi ka ra digitaki koya me nodra mata. Me kena ikuri, sa nodra mata talega ke ra sotava e dua na leqa e koronivuli.
Ko na tuvanaka vakacava na veisiga ni mataka? E kaya o Christian ni nona kila me tuvanaka na nona laki kaulotu e vukea me raica kina vakadodonu na nona bula. Ni oti na nona vuli torocake, ena laki vulica na iwalewale ni veika vakaitukutuku. Ia ni ko sa kila tiko mo vakarau ciqoma na Matabete i Melikiseteki, gole ki na valetabu, laki kaulotu, ka vakamau, ena vukea mo kila na iwalewale ni vakavakarau.
Ia vei Christian, sa vulica talega na vunau ni Lotu kei na kena itukutuku makawa. Kena ivakaraitaki, a vaqaqacotaki na veika a yaco ena 1834 ki na Keba e Saioni ni ra sa vakarau kaba na keba o ya na tamata ca ka a parofisai kina na Parofita o Josefa Simici ni na sega ni vakatara na Turaga me yaco. Ena yakavi ni siga o ya, era a vakasesei tani na tamata ca mai na dua na cava.1 Sa matata kina vei Christian ni sega ni rere me tuvanaka na nona bula ni veisiga ni mataka ni sa dauveitaqomaki na Turaga vei ira era qaravi Koya.
Mo na vaqaqcotaka vakacava na nomu ivakadinadina? E dua na kena sala e kila o Christian me dau vulica na bula ni Parofita o Josefa Simici. E nanuma o koya na Vunau kei na Veiyalayalati 135:3, ni tukuni Josefa Simici ni “sa levu ka bibi sara na ka a vakayacora… me vakabulai ira kina na kai vuravura; io e levu cake mai vei ira kecega na tamata; raica a ka oqo sa taravi Jisu walega kina.” a tomana o Christian, “E sa veisautaki na noqu bula ena noqu kilai Josefa Simici.”
E kaya ni nona vulica na itukutuku makawa ni Lotu “ko na kila kina na nomu ilesilesi o ya mo mai matanataka nikua.” E dua tale na nona itukuni talei e baleta e dua na cauravou a veivuke ki na nodra vueti na kabani ni qiqidreti nei Martin ena 1856. E a colati ira yani na painia era sa wawale, ka viakana tu ena uciwai cevata batabata o Sweetwater.2 E nuitaka tiko o Christian me na vakaraitaka na mataqali yaloqaqa vaka o ya ke mani sotava na veivakatovolei vaka o ya.
Na cava na vuna e bibi kina na kosipeli ki na nomu bula? E rawa talega ni sauma oqo o Christian. O koya e dua na lewe ni Matabete i Eroni, ka dau tiko ena semineri ena veimataka lailai vata kei ira na nona icaba mai na Tabana o Cocuere, ena iTeki o Capiatá Paraguay. E vakayacori tiko na semineri e nodratou vale; ka kena qasenivuli o tinana.
A vukei koya na veika a vulica me baleta na yavu ni veivakabulai nei Tamada Vakalomalagi ena gauna a mate kina vakasauri o tukana lomani. E yalo vakacegu ka marau baleta “na inuinui e solia vei keda na kosipeli.”
E kaya ni kosipeli e vukea na ituvaki kece ni nona bula. “Au kila ni ivolanikalou sa ivakatakila sa mai vua na Tamada mai Lomalagi,” a kaya. “Au kila ni oqo na Lotu dina, kau kila ni bula tiko o Jisu Karisito.”