Vakabauta me Tarovi na Waluvu
E a siga ni vulaitubutubu mai Helsinki e Finiladi. E totoka na rarama ni matanisiga, ka ra sa waicala sara vakatotolo na uca cevata. Sa vica vata na auwa na noqu cakacaka vata kei rau na cauravou, o Juha, yabaki walu, kei Hannu, yabaki ono, ka rau tarova tiko na uca cevata sa waicala me kakua ni luvuca na neitou rumu ni iyaya e ra. Se cevata tale tu ga na ikeli e dodonu me drodro yani kina na wai.
Ena mataka o ya sa gole sara ki cakacaka o watiqu, ka tukuna me keitou qarauna na rumu ni iyaya mai na wai. Keitou sa buno ca me yacova na yakavi, ka sa gauna ni Lalai. (Ena gauna o ya e dau vakayacori na Lalai ena loma ni macawa.) Ia, au a tukuna vei rau na noqu cauravou, ni rau sa na calata na Lalai me keitou tarova mada na wai me kakua ni curuma na rumu ni iyaya. Ni o watiqu talega e sega ni lewe ni Lotu, ka na sega tu ni kila o koya na bibi ni Lalai vei rau na luvei keirau tagane.
E duavata ga na nodrau vakadeitaka mai o Juha kei Hannu ni kevaka keitou na gole ki na Lalai, ena raica na Tamada Vakalomalagi me kakua ni curuma na rumu ni iyaya na wai. Au a raica yani na drodro ni wai kei na ituvaki ni vakabauta e matadrau na luvequ. A voqa mai ena tiki ni noqu vakasama “E sega ni rawa mo lako ni na sega ni tarovi rawa na kena curuma na rumu ni iyaya na wai.” Au a kerea e yaloqu vua na Tamada Vakalomalagi ena masu. Au a qai tauca e dua na vakatulewa dredre.
“Mai tou gole ki na Lalai!” Au sa biuta kina e ra na vokete. Se cava ga na ka ena yaco, au na sega ni vakacacana na nodrau vakabauta na luvequ.
Erau a laki marautaka sara na luvequ na Lalai. Ia ni keitou sa lesu tale tiko ki vale, keitou sa taqaya vakalevu ni keitou sa voleka tiko yani. Ni keitou yaco yani e mata ni vale, rau sa cici yani na gone ki na katuba ni rumu ni iyaya. Rau rai yani ki ra, rau qai kailavaka mai, “Nana, na cava keirau a tukuna?” Au a cici yani. Au na sega ni guilecava na ka au raica. Sa mamaca vinaka tu na vanua o ya, me vaka e sa vakamamacataki tu. Sa sega tale ni suasua. Ena gauna mada ga oqo, ni sa oti e 40 na yabaki, au na sega ni guilecava rawa na ka au a raica o ya.
E laurai e matadrau na luvequ na marau kei na nuitaka tiko na Tamada Vakalomalagi. E vakasinaita na yaloqu—na vakavinavinaka—kei na reki!
Ena sega ni dua na kaukauwa e vuravura me vakadruka rawa na nodra vakabauta na gone. E tukuna na ivolanikalou ni kevaka eda na vakabauta ka sega ni vakatitiqa, eda na rawa ni tosoya na ulunivanua (raica Maciu 17:20). Ena siga o ya a tarova na waluvu na nodrau vakabauta na luvequ.