Kadi ni Taro kei na Kadi ni Me iSakisaki ni iTabagone

NA CAVA EDA SEGA KINA NI GUNU SE KANA TAVAKO?

Na Tamada Vakalomalagi sa vakasalataki ira na Luvena mera dau qarauna vakavinaka na yagodra. E dodonu meda kania na veikakana bulabula, vakaukauwa yago, ka moce vakavinaka. Ni da vakayacora oqo, eda na galala tani mai na veika e veivakatotogani ka rawa meda vakatulewataka noda bula. Eda na vakalougatataki ena dua na yago e tuvaki vinaka, cariba ni vakasama, kei na veidusimaki ni Yalo Tabu.

Na alakaolo, kei na tavako ena dau vakacacana na yagoda kei na yaloda. Era veivakatotogani ka ra dau vakarusa na yagoda, vakamalumalumutaka na noda vakatulewa kei na qaqarauni, ka tagutuva koso na noda bula. Me baleta ga ni da gadreva me qaqaco kaukauwa tu na yagoda, vakasama, kei na ituvaki vakayalo, eda sega kina ni gunu kofi se ti se vakayagataka na veika ni veivakamatenitaki se kemikali.

NA CAVA EDA SEGA KINA NI VOSA CA?

E dua vei ira na vunau e tini e kaya ni Turaga ena sega ni vakadonuya e dua e vakacacana na Yacana, o koya gona eda na cavuta na yaca ni Kalou kei Jisu Karisito ena vakarokoroko kei na veidokai. Na vosa se itovo e ca, velavela, se vakatani, ka vakakina na veiwali dukadukali, sa ka tawa kilikili vua na Turaga kei ira na tani.

Na iwalewale ni nomuni vosa ena vakaraitaki kemuni tiko. Na vosa e savasava ka vuku e vakaraitaka tiko ni savasava ka tu vinaka na nomuni vakasama. Eda na cavuta ga na vosa e veivakayaloqaqataki ka veivakavinavinakataki vei ira na tani me rawa kina ni da bulataka na vunau meda tiko veilomani. Eda na vakayaloqaqataki ira na tani mera dau vosa savasava.

ME DA VAKAITAU BEKA NI BERA NI DA YABAKI 16?

E totoka na veitokani, ia na vakaitau koso e rawa ni veimuataki ki na itovo tawa savasava, ena yalani kina na iwiliwili ni nomuni icaba dina mo ni na sotava, ko ni na sega talega ni sotava na veika me na vukei kemuni mo ni na laki sota kei koya dina mo ni vakamautaka. E sega ni ra gadreva se vinakataka kece tu na itabagone mera vakaitau. Ia, sa dodonu meda tauyavutaka na veimaliwai vinaka ena veiyabaki ni bula kecega.

Ni da tekivu vakaitau, eda na vakaitau vakailawalawa se vaka i sa ka tuvanaka na itaviqaravi e dodonu, sega ni sau levu, ka vukei keda meda veikilai vakavinaka sara. Vei rau e dua na veitau cauravou kei na goneyalewa e dodonu me rau veivukei tiko ena kena maroroi tikoga na ivakatagedegede ka rau veitaqomaki ena dodonu kei na veidokai.

ERA LOTU VAKARISITO BEKA NA MOMANI?

Eda vakabauta ni o Jisu Karisito sa Luve ni Kalou ka Dauniveibuli. Ena gauna a bula tiko kina e vuravura o Jisu, a savasava dina na Nona bula ka bulataka ka vakaraitaka na veika e vakavulica meda tiko veilomani kina. Eda vakabauta ni Veisorovaki nei Karisito, sa na rawa kina meda vakabulai mai na noda ivalavala ca ni da bula vakataki Koya.

Ena veimacawa ni da laki vakaivotavota ena sakaramede e valenilotu, eda sa vakavouya kina na noda yalayala meda dau nanumi Koya tikoga ka muria na Nona ivunau.

Eda sa lomani Jisu Karisito. Eda qaravi Jisu Karisito. Sa iKoya na noda iVakabula ka Dauveivueti.