iKuri ni Vakasama ni Gauna ni Veiwasei, Okotova 2008

Sa rawa vei ira na iliuliu ni Lalai me ra vakayagataka na ikuri ni vakasama oqo vata kei na Gauna ni Veiwasei e tiko ena Liaona ni Okotova 2008. Me baleta na lesoni, ivakasala, kei na itaviqaravi e salavata kei na veivakasama oqo, raica na “I Will Be His Servant” ena tabana T4 kei na T5 ena nodra tikina na gone ena ilavelave oqo.

1. Ni bera na gauna ni veiwasei, vakarautaka rawa toka e dua na kedratou itaba na Mataveiliutaki Taumada kei iratou na Kuoramu ni iApositolo Le Tinikarua. Vakabira ena papanivolavola. Vola na yacadra yadua ena tiki ni pepa lalai, ka vakabira e yasadra ena papanivolavola.

   Kerei ira na gone me ra laki vakabira donu na yacadra ki na kedra itaba na Mataveiliutaki Taumada kei iratou na Kuoramu ni iApositolo Le Tinikarua. Vukei ira na gone ena kena tuvai vakadodonu na veitarataravi ni nodra ilesilesi kei na balavu ni gauna ni nodra veiliutaki.

   Digitaka mai na koniferedi raraba se qai oti toka ga oqo se mai na Liaona, na veivosa eso ni Mataveiliutaki Taumada kei na Kuoramu ni iApositolo Le Tinikarua ka baleta tiko na veiqaravi. Wasea na itukutuku oqo, ka veivosakitaka na sala e rawa vei ira na gone me ra bulataka, na veika era sa vulica me vukei ira me ra dau veiqaravi yani vei ira na tani. Raica na Vunau kei na Veiyalayalati 4:2, me vakadeitaka vei ira na gone me da na veiqaravi ga ena yaloda taucoko, kaukauwa taucoko, kei na nanuma kecega. Me lagati e dua na sere se serenilotu, me baleti ira na parofita. Wasea nomu ivakadinadina, me baleta na veivakalougatataki ni ra sa tiko vata kei keda edaidai o ira na parofita, daurairai, kei na daunivakatakila, era sa vunauci keda tiko ka ivakaraitaki bula ena sala me da na veiqaravi kina vakaikeda yadudua.

2. Vola e cake ena papanivolavola na ivakavuvuli ni kosipeli vakamacawa oqo: “Au na veiqaravi talega ni ra sa qaravi au vakakina o ira na tamata.” Sureti ira na gone me ra laga sere me ra kila kina o cei sa qaravi ira tiko. Me ra qai lagata na sere se serenilotu me baleta na iVakabula, o ira na parofita, matavuvale, itokani, kei na so tale. Volai ira era vakamacalataki tiko ena sere se serenilotu o ya ena ruku ni malanivosa Ni ra sa qaravi au vakakina o ira na tani.

   Vakatautauvatataka na Vunau kei na Veiyalayalati 4:2 kei na 59:5. Vukei ira na gone me ra raica rawa na veivosa oqo yalomudou, lomamudou, nanuma, kei na kaukauwa ena ivolanikalou e rua oqo. Vakamacalataka ni sa dodonu me da lomana ka qarava na Kalou kei ira na tamata ena yaloda, lomada, nanuma kei na noda kaukauwa. Vakarautaka na veiyaya e gadrevi me ra vakacavara rawa kina na gone na ivakatakarakara e tiko ena tabana T4.

   Ni sa caka oti na ivakatakarakara, sureti ira na gone me ra na lagata na sere e tukuna tiko na sala me ra veiqaravi rawa kina. Me ra qai lagata na sere se serenilotu e baleta tiko na veiqaravi. Vola na veika era sa kila rawa mai na sere se serenilotu o ya ena ruku ni malanivosa Au na veiqaravi talega. Wasea nomu ivakadinadina me baleta na veivakalougatataki ena yaco mai ni da qaravi ira na tani kei na nodra qaravi keda mai.