Veivuke ko na Bula Marau
“Mo qarava vakavinaka kina na nomu i lesilesi mai Saioni” (V&V 24:7).
E dabe vakacudrucudru ga yani o Jonathon ki na motoka e yasai Mike, na tacina. A vinakata o koya me tikoga e vale me qitora na qito vou a lolomataki vua ena nona siganisucu ena macawa sa oti. Ia a vinakata o tinana me ratou gole kece sara ivalenilotu me ratou laki veivuke ki na nodra sasamaki vaka-lewe ni tabanalevu.
“Na cava na vuna me datou lako kina?” a tarogi tinana o Jonathon ni vakarau biuta ki na motoka na misini ni sasamaki.
“Eda na lasa,” a kaya dredredre mai o tinana. “Ni oi keda kece eda vakayagataka tiko na valenilotu. Sa dodonu ga me datou veivuke tiko ena kena dau samaki.”
A wanonova voli ga o Jonathon na veivale kei na veikau ni ratou sa vodo tiko yani ki valenilotu. Ni sa vakelea yani na motoka o tinadratou e yasa ni valenilotu, a kurabui sara o Jonathon ni raica na motoka nei Baraca Lawson e kele tikiva toka na nodratou motoka.
“Na cava e mai cakava o Baraca Lawson?” a taroga o Jonathon.
Sa tauvi Baraca Lawson tiko e dua na mataqali kenisa e vakatokai na leukemia. Sa dede na nona a laki qaravi tu e valenibula. E vakasamataka lesu o Jonathon ni a tukuni vei koya kei Mike mai vei nodrau itubutubu me ratou dau masulaki Baraca Lawson vakayadua kei na matavuvale talega. Sa dede na nona yali tu mai vale o Baraca Lawson ni a tiko mai valenibula.
E dau taleitaki Baraca Lawson o Jonathan. E qase cake o koya mai vei rau na tukai Jonathon, ia e dau kauwaitaki Jonathon ka dau vakataroga na nona vuli kei na nona timi ni qito. E dua na gauna a mai sarava ni qito tiko o Jonathon.
Ni sa sobu mai na motoka o Jonathon, a yaloyalo mai o Baraca Lawson ka kaya, “Yadra, Jonathon.” A gole ki na mua imuri ni nona motoka o Baraca Lawson ka taura mai e dua na misini ni sasamaki. A taubale yani ka biliga vakamalua na nona misini ki valenilotu.
“Jonathon,” a kaci mai o tinana, “mai vukei au mada?” A saga tiko me biuta mai tuba na nodratou misini ni sasamaki.
“Io, Na,” a kaya o Jonathon. A laki vukei tinana ka biliga sara yani na misini.
Eratou a cakacaka vata tikoga ena yakavi taucoko o ya o Jonathon kei Mike kei Baraca Lawson. Sa wale ena so na gauna o Jonathon ka cegu vakalailai, ia a raica ni sasamaki tikoga o Baraca Lawson. Ka matadredredre tiko! “Sa ka vinaka na veivuke, se vavei,”a kaya o Baraca Lawson.
E a vakila e dua na ka o Jonathon “Kevaka e marautaka tiko vakaoqo o Baraca Lawson na nona veivuke, e rawa talega vei au,” a vakasamataka. Sa tekivu me kaukauwa sara na nona sasamaki.
“Vinaka vakalevu na veitomani,” a kaya o tinana ni ratou sa lesu tiko i nodratou.
“Sega na leqa,” a kaya o Jonathon. “Vosoti au niu a cudruvaka na noqu lako mai. Au sega ni kila ni levu na ka e vulici ena vakayagataki ni misini ni sasamaki.”