Taro kei na Kena iSau
“E tiko edua na leqa veiau kei ira na noqu ilawalawa a ni keimami daukakase. Na cava meu cakava me keimami muduka kina?”
Sa rawa mo tarova na nomu kakase ni o vakamuria na ivakasala e tiko ena Me iSakisaki ni Tabagone me baleta na vosa ca: “Vukei ira era tiko volekati iko mera vakayagataka na vosa vinaka, ena nomu ivakaraitaki vinaka vata kei na nomu vakauqeti ira mera digitaka eso tale na vosa. Lako laivi vakamalua se veisautaka na iulutaga ni veivosaki kevaka eso era tiko kei iko era vakayagataka tiko eso na vosa tawa kilikili.
“Kevaka o sa vakamatautaka na vosavosa ca [se kakase], sa rawa ni o vorolaka. Tekivu ni o sa vakadeitaka ni o sa na veisau. Masulaka na veisau. Kevaka o vakayagataka e dua na vosa o kila ni cala, vagaluya se tukuna na ka o via tukuna ena dua tale na kena gaunisala.”
E vakamacalataka tale tikoga na ivola oqo na vuna e bibi kina na noda vakacaucautaki ira na tamata: “Dau vosa vinaka baleti ira na tani me rawa ni o vakavatukanataka kina na iVakaro ni Turaga meda dau veilomani. Ni o vakayagataka na vosa e vinaka o sa sureta tiko na Turaga me tiko vata kei iko” (“iVosavosa” [2001], 22–23).
Ni ko cavuta na vosa ni veilomani ko sa bula tiko Vakarisito ka na vukea cake na nomu veiwekani ka yaco vei iko na yalo vakacegu.
Na iDusidusi Talei
Sa vakayacori tu ga e yasada ena veisiga na veikaseti, ka dau vakararawataka na yalo. E rairai ka talei beka na wasei “ni itukutuku buta katakata” vei nomu itokani, ia mo dau nanumi koya o sa talanoataka tiko. Ko na cavuta beka na ka oqori ni tiko beka o koya? E a kaya beka o koya mo laki wasea yani vei ira na tamata? Mo vakasamataka mada ni dua e laki kaseti iko. “Ia na ka vakayadua ga dou sa vinakata me ra kitaka vei kemudou na tamata, dou kitaka vakatalega kina vei ira” (3 Nifai 14:12). Kevaka era daukakase o ira na nomu itokani, veisautaka ga vakamalua na iulutaga.
Jessica J., 16, Arizona, USA
iWali ni Kakase
E tolu na ilawalawa era vakaitavi tiko ena dua na kakase: oi keda, o ira era vakarorogo tiko, kei ira na tamata eda talanoataka tiko. Mo yalataka mo kakua tale ni kakase, ka vakayacora sara. Oqo eso na iwali me tagutuvi kina na mate ca ni kakase: (1) Veisautaka na iulutaga ni ra sa tekivu kakase na nomu itokani. (2) Mo vagalui iko me kakua kina ni dua era vosa kina. (3) Tukuna vakadodonu vei ira me ra “kakua ni dau veikaseti” (Jemesa 4:11).
But A., 22, Phnom Penh, Cambodia
Drotani Mai na Vosa Tawa Kilikili
E kaukauwa na veivakarusai ni kakase ka na rawa me vakararawataka na yalodra na tamata. Ni da kakase, eda sa dolava kina e dua na katuba vei vuni meca me vakarusa na irogorogo vinaka ni dua na tamata. Ni da saga meda vakarusa na itovo ca oqo, meda kakua ni cavuta e dua na vosa ca baleta na nona bula e dua. Ni da rogoca na veika oqori, ke ra dina se sega, sa dodonu ga meda tarova. Kevaka era tomana tikoga, meda lako tani mai (raica Maciu 12:36).
Eda rawa ni vukei ira na noda itokani ni da vakasalataki ira mera kakua ni vakaitavi tale ena mataqali veivosaki vaka o ya ka meda vakamasuti ira, ni ra sa lewe ni Lotu ka ra tamata yalodina nei Karisito, ka kakavaki meda tutaka na dina kei na ivalavala dodonu, ka dau ivakaraitaki vinaka ka vakacaucautaki ira na tamata (raica Yavu ni Vakabauta 1:13).
Ismael S., 18, São Paulo, Brazil
Dau Nanuma na Veika Oqo
Ni da drotani mai na kakase, sa rawa meda cavuqaqataka e dua na ivolanikalou me vaka na Vunau ni Soro 19:18 e vakavulica na noda lomani ira na kai noda me vakataka eda sa lomani keda ka cavuqaqataka tiko ena noda vakasama ni da vakarau saga meda kakase. Sa rawa talega meda cavuqaqataka e dua na sere me vakataka na “I’m Trying to Be like Jesus” (Children’s Songbook, 78–79) ka lagata ena noda vakasama. E dua tale na kena iwalewale o ya meda cavuta e rua na ka vinaka baleti koya na tamata o ya. Ni vakayacori oqo ko na guilecava kina na nona caka ca ka yaco mo raica rawa na nona cakavinaka.
Rhodora M., 19, Luzon, Philippines
Mo Raica Ga na Nodra Vinaka na Tani
Ena dau dredre toka na valuti ni kakase. Ia au nanuma ni gauna o nanuma kina na nona vinaka o wekamu, ko na rawa ni vakasama vakarua ni bera ni ko cavuta na vosa o na sega ni vinakata. E sega ni dodonu meda vakalelewa. Au nanuma ni rawa ni veivuke na noda raica ga na nodra vinaka na tamata, ka sega ni vakaraica tiko na ka ca.
Haylee B., 15, Utah, USA
E Gadrevi Kina na Yaloqaqa
Eso era kaya “ni gusuda, eda na tara cake kina na keda ilati mai vei ira na noda daulomani.” Au vakabauta ni rawa ni tarovi na ka oqo, ena noda yaloqaqa vakaikeda yadua ka vakayalo e cecere sara. Ke da kila vakavinaka tu na kosipeli, sa sega ni dodonu vei keda na lewe ni Lotu meda kakase baleta ni sa vakarota mai na Kalou meda dolava ga na gusuda meda kaburaka na kosipeli ki vuravura taucoko, ka kakua ni vakalewa se kaseta e dua.
Vanessa P., 19, Tahiti, French Polynesia
Masuta na Veidusimaki
Mo ni nanuma tiko ni kakase e rawa ni laki vakacacana tu vakadua na yalodra na tamata. Ni tovolea mada mo ni vakataki ira, ka vakasamataka mada ke ra sa na kaseti kemuni tiko. Sa qai nomuni gagadre dina mo ni veisautaka na nomuni itovo oqo. Ena vakalougatataki kemuni na Turaga mo ni qaqa ka veisau na yalomuni mo ni vakasaqara ga na Nona veidusimaki ena masu.
Brittney H., 12, Utah, USA