iVaqa ni Veisiko

Na Tagane kei na Yalewa Sa iTuvaki Bibi ni iVakatakilakila kei na iNaki Tawamudu

Vakavulica na ivolanikalou kei na veimalanivosa e sotava na nodra gagadre na marama o sikova. Wasea na nomu ivakadinadina ni vunau. Sureti ira ko vakavulica me ra wasea na veika era sa vakila ka vulica.

Na Mataveiliutaki Taumada kei na Kuoramu ni iApositolo Le Tinikarua: “Oi keda na tamata yadua—na tagane kei na yalewa—eda a buli meda ucuya na Kalou. Oi keda yadua eda sa luvedrau tagane se yalewa lomani vakayalo na noda itubutubu vakalomalagi, ka sa vakalou na noda bula kei na ilesilesi yadua e baleti keda. Sa nakiti ena noda bula taumada me dua e mai tagane se yalewa, ena nona bula vakayago e vuravura me vakarautaki kina ena inaki sa virikotori tu me baleti koya” (“Na Matavuvale: Ai Vakaro ki Vuravura Raraba,” Liaona, Okot. 2004, 49).

Na Cava e Bibi Kina me Tagane se Yalewa?

Elder David A. Bednar ena Kuoramu ni iApositolo Le Tinikarua: “Na veivakarautaki cecere ni [tagane se yalewa] ena vakatakilaitaki keda tiko, na vuna eda mai tiko kina ena vuravura oqo, na veika meda na cakava kei na keda icavacava. Ena inaki vakalou, erau na duidui tiko na yalo ni tagane kei na yalo ni yalewa, vakatakilakilataki, ka talei… . Na nodra isema cecere na tagane kei na yalewa ena veika vakayalo, vakayago, vakasama, kei na vakanananu sa gadrevi dina sara me tauyavutaki kina na ituvatuva ni bula marau” (“Marriage Is Essential to His Eternal Plan,” Liahona, June 2006, 51).

Julie B. Beck, peresitedi raraba ni iSoqosoqo ni Veivukei: “O ira na luvena yalewa vakayalo na Kalou ‘era a sa tekivu vakavulici mai na vuravura ni yalo, ni ra sa bera ni mai sucu’ (V&V 138:56) e vuravura. Era a maliwai ira talega ‘na turaga kei ira na tamata yalodina’ (V&V 138:55) ka ra ‘kaila ena reki’ (Jope 38:7) ni sa buli tiko ko vuravura baleta ni ra na mai vakayago ka yaco me ra vakatovolei vakakina ena dua na vuravura vakaoqo (raica Eparaama 3:25). Era gadreva tu mera mai cakacaka vata kei ira na tamata ivalavala dodonu me rawati kina na inaki tawamudu ka ra na sega ni rawata rawa vakai ira ga. A sega ni qai mai tekivu ga e vuravura na ilesilesi ni yalewa, ka na sega ni mai cava ga eke. Na yalewa ena rokova na itutu vakamarama ena vuravura oqo ena laki rokova na itutu vakamarama ena vuravura sa roro tiko mai” (“A ‘Mother Heart,’” Liahona, May 2004, 76).

Na Cava Meu Na Cakava Ena Vuku ni Noqu iLesilesi ena iTuvatuva ni Tamada Vakalomalagi?

Margaret D. Nadauld, peresitedi raraba vakacegu ni Goneyalewa: “Era duatani na marama e nona na Kalou mai vei ira na marama era vakavuravura. Sa sinai vutucoqa tu o vuravura ena marama era yalokaukauwa; eda gadrevi ira ga na marama era yalomalua. Sa sinai tu na marama era veivakacacani; eda gadrevi ira ga na marama era yalovinaka… . Era sa levu na marama rogo ka vutuniyau, eda gadrevi ira vakalevu cake ga na marama era vakabauta” (“The Joy of Womanhood,” Liahona, Jan. 2001, 18).

Elder M. Russell Ballard ena Kuoramu ni iApositolo Le Tinikarua: “A vakayacora sara ga na Kalou na nodrau ituvaki na tagane kei na yalewa ni vuravura taumada kei na kena oqo… . [O ira na yalewa] era dau taroga: ‘Sa kena yaga beka ga o yalewa me mai vakawati ka susu gone?’ na kena isau e rawarawa ka matata: e Sega… . Sa tu na ilesilesi yadua ki na yalewa se tagane ivalavala dodonu ena cakacaka ni kena muataki ki liu na matanitu ni Kalou… .

“… Kemuni na ganequ lomani, keimami vakabauti kemuni. Kemami vakabauta ka sa nuitaka tiko na nomuni cakacaka vinaka kei na nomuni yaloqaqa, … Ka keimami vakabauta ni ituvatuva ni Kalou e baleti kemuni o ya me yaco mo ni ranadi ka ciqoma na veivakalougatataki cecere e rawa ni ciqoma e dua na yalewa ena bula oqo kei na bula tawamudu” (“Women of Righteousness,” Liahona, Dec. 2002, 36–37).