ITOKANI
A Rawa ni Yaco Vei Au
Digitaki ira na itokani era duavata kei na cecere ni nomu ivakatagedegede. Mo dau lomana ka dokai ira na tamata kecega. Sureti ira na itokani mai na veimatalotu eso ki na itaviqaravi ni Lotu. Sikovi ira yani na lewenilotu vou kei ira era sega tiko ni mai lotu.
Niu se yabaki vitu, a toki yani ena neimami itikotiko e dua na goneyalewa, ka keirau sa veikilai sara. E dua vata ga na veika keirau taleitaka, ka keirau dau veivakayaloqaqataki. Keirau digitaka ga na veika dodonu baleta ni vakavulici keirau kina na neirau itubutubu.
Ni keirau sa kalasi ono, keirau sa digitaka na veika cala me keirau duavata kina kei ira na neirau itokani e ca na nodra itovo. Ena yabaki tarava, au sa nanuma meu sa veisautaka na noqu itokani meu digidigi dodonu tale kina ena ivakatagedegede cecere cake. Na leqa e tiko ni keirau se veitokani vinaka tiko kei noqu itokani, kau sega ni vinakata meu lako tani mai vua.
E dredre sara meu vakayacora na ka au a gadreva o ya. Na noqu bula taucoko e tukuni vei au meu digitaki ira na itokani vinaka ka bulataka na ivakatagedegede e cecere cake. Ia a sega vei au na ivakadinadina na vuna e bibi kina oqo, kau sa vakabauta ga ni sa dodonu. Niu sa kalasi walu ni oti toka na vulaikatakata, keirau sa sega soti ni veigadivi ka keirau sa dui lakolako.
Au raica na veivakalougatataki ni digidigi oqo ena mua ni yabaki o ya. Era sa tekivu kauta ki koronivuli na gunu o ira na noqu itokani. Era marici ira na goneyalewa mera gunu, ka ra leqa kece kina. Au qai raica ni rawa meu a oka kei ira na goneyalewa o ya. Keu a tiko vata beka kei ira, au sega ni kila keu na tutaka beka kina na noqu ivakatagedegede ni lotu se sega.
E luvuci na lomaqu niu vakasamataka na veika ca e a rawa ni yaco vei au. E a rawa niu vakatotoganitaki tu ena waigaga, voroka na lawa, rau sega ni vakabauti au na noqu itubutubu, ia ka kena ca duadua, niu a rawa ni vakacacana na veivakabauti ni Tamada Vakalomalagi vei au.
Au sa kila vakavinaka tu ni veika e tukuna na parofita sa baleta na noda taqomaki. Eda dau vakawalena tu ga, ia e vukea na noda bula vakayalo, vakayago, vakasama, ka so na gauna eda sega tu ni kauwaitaka.