iTokani ki na iTokani
Vakavakarau ki na Kaulotu
“Vakarautaka na yalomuni vei Jiova” (1 Samuela 7:3).
Ni oti e vica na yabaki ni ratou sa papitaiso oti na noqu matavuvale, rau sa dau mai vakasigalevu tikoga e vale o rau na daukaulotu. Au sa tekivu dau lomani rau na daukaulotu, kau vinakata meu vakataki rau.
Niu sa yabaki 11, a kacivi au ki na dua na veivakatarogi o bisopi ki nona valenivolavola. A kaya, “Ulisses, sa gauna oqo mo vakavakarau ki na kaulotu.” Au a kurabui niu se qai yabaki 11 tikoga kina! Ia a kaya mai, “Me sa tekivu sara ga oqo”
A kaya o bisopi, “Au na dau vakatarogi iko tiko me baleta na nomu vakavakarau.”A qai vakasalataki au. A vakavulici au ena veika vakaivunau, na matabete, bula kilikili, kei na yalodina. Au a vakauqeti vakalevu ena nona raici au vakadodonu ka kaya mai, “Ko na laki kaulotu kevaka o na vakamuria na noqu ivakasala oqo.”
Au dau nanuma tiko na veika a tukuna, vakabibi niu dau bolei. Me kena ivakaraitaki, e dua na gauna a talai au o tinaqu meu laki volia mai na sitoa eso na vuata. E vakacalaka ga nona solia tale mai o kesia e levu cake na ilavo mai na isau ni vuata. Au sa tekivu gole sara ivale, ka raica na ligaqu, ni sa levu cake na ilavo mai na kena au a kauta taumada.
A vosa vaqaseqasea mai o Setani me sa noqu ga na ilavo. Au a vakasama, “Sa tu oqo na ilavo meu volivolitaka, ka meu la’ki solia ga na veisau dina vei tinaqu.” Ia au a vakasama tale, “Sega, o bisopi e sega ni tukuna o ya. Na daukaulotu e yalodina.” Au a vakila na Yalotabu ena gauna o ya kau lesu ki na sitoa ka vakasuka na ilavo. E vakacegu na yaloqu. Au a vakasamataka, “Au a yalodina, au sa muria na ivunau, kau sa vakavakarau tiko meu kaulotu. Au na laki kaulotu, ka meu sa yalodina.”
Niu sa laki vuli torocake, au a cakacaka ka tekivu maroroi ilavo. Erau dravudravua o noqu itubutubu ka rau sega ni sauma rawa na veika kecega. Au sega ni rawa ilavo vakalevu, ia niu sa sauma na noqu ikatini, au sa tekivu voli noqu isulu ni kaulotu tiko ena veivula. Ena imatai ni vula au a volia e dua na sote, na neketai ena vula e tarava, ka dua tale na sote ena vula e tarava. Ena loma ni tolu na yabaki o ya, sa levu na noqu ilavo au a maroroya meu volia na veika kece sara au gadreva. Au sa rawata rawa na ilavo ni noqu kaulotu. Au sa vulica kina na ivakavuvuli ni mamaroroi. Au sa vulica kina na ivakavuvuli ni talairawarawa ki na lawa ni soli ikatini kei na vuqa ni kena veivakalougatataki ni da sauma na ikatini.
Sa vuli levu vei au na noqu kaulotu baleta ni a vukei au meu kila na ivakavuvuli ni bula oqo kei na noqu bulataka na kosipeli ena veisiga.
Kemuni na gonetagane kei na goneyalewa, vakavakarau ki na dua na kaulotu vinaka kei na dua na bula e vinaka. Sa waraki keda tiko na Turaga me solia mai na veivakalougatataki eda gadreva tu.