Tudei Ena Vakabauta: E Matata ka Veivakavukui na Kena iVakavuvuli Vakosipeli
Ena gauna e dau sotava kina o When Robert Lund, e dua na bisopi mai Kaysville, Utah, e Amerika na vakatataro se lomaleqa vakosipeli, e dau raica o koya e dua na ivurevure o ya na Tudei ena Vakabauta.
“Kevaka e dua me tarogi au, au na kaya vua, ‘Me daru raica mada na cava e tukuni tiko ena Tudei ena Vakabauta,’ ” e kaya o Bisopi Lund, me baleta na veitokanitaki ni vulici ni ivolanikalou kei na nodra ivakavuvuli na parofita edaidai.
A tabaki vakaivola taumada ena 2004, na Tudei ena Vakabauta ka tuvanaki vakaiulutaga tu kina vakamatata sara na itukutuku vakosipeli. E dina ga ni a tuvanaki na ivola oqo me baleti ira vakatabakidua na itabagone, itabagone qase cake, kei ira na lewenilotu vou, sa inaki tiko ni Tudei ena Vakabauta me ra vukei o ira era na wilika me qaqaco cake na nodra “toro voleka yani vua na iVakabula ka muria na Nona ivakaraitaki,” ni sa nodratou ivakamacala taumada na Mataveiliutaki Taumada.
E sega ni o Bisopi Lund duadua ga e vakacerecerea tiko na ivola oqo. Era sa maqusa tiko na lewenilotu e vuravura taucoko me ra vakayagataka ena veisala eso na Tudei ena Vakabauta me tarai cake kina na nodra vulica na kosipeli, qaqaco cake na yavu vakila ka vakosipeli, bulataka na ivakavuvuli ni kosipeli ena nodra bula, ka vakavakarau ena nodra wasea ka vakavulica na kosipeli.
Tarai Cake na Vulici ni Kosipeli
E dau vakayagataka na Tudei ena Vakabauta o Donna Heßling, mai na Tabana o Münster, ena iteki o Dortmund Germany, me kila vakavinaka sara kina na Lotu sa vakalesuimai kei na kena ivakavuvuli.
E kaya o Sister Heßling, “E matata ka rabailevu sara na kena itukutuku, kei na iulutaga yadua sa mai vakarabailevutaka ka vakadeitaka na noqu ivakadinadina me baleta na dina ni Lotu i Jisu Karisito ni Yalododonu Edaidai.”
Sa tuvai vakamatanivola tu ena Tudei ena Vakabauta e volekata ni 170 na itukutuku ena veiulutaga mai na Matabete i Eroni ki na Yavu ni Veivakabulai [Zion]. Me ikuri ni kena vakavulici vakarawarawa ka me veivakauqeti vakayalo na ivakavuvuli ni kosipeli, na itukutuku yadua era sa tiko talega na kena ivolanikalou me vulici kina na veiulutaga tale eso.
Eratou dau vakayagataka vakalevu na Tudei ena Vakabauta o Mark Ellison kei na nona matavuvale, mai Saratoga Springs, Utah, e Amerika, me ratou raica vakatabakidua kina e dua na iulutaga ni ratou vulica tiko e vale na kosipeli.
“Ni ratou vakaitavi na luvequ ena vakavulici ni lesoni ni lotu vakamatavuvale, eratou na digitaka e dua na iulutaga mai na Tudei ena Vakabauta me veivakadeitaki,” e kaya o Brother Ellison. “Eso na gauna keitou dau digia e dua na iulutaga ka kerea e dua vei keitou me tukuna e dua na ka me baleta na iulutaga o ya. Keitou dau rai sara ki na veika e tukuna tiko na Tudei ena Vakabauta, kei na veika keitou a sega ni raica rawa.”
Eratou yabaki 7 ki na 18 na luvena, ia e kaya o Brother Ellison ni sa tu na veitukutuku ena Tudei ena Vakabauta e sotava na nodratou gagadre kei na ivakatagedegede ni kila ka vakosipeli na lewe yadua ni nona matavuvale.
“E rawarawa wale tu ga ia e umani tu kina na itukutuku bibi duadua,” e kaya o Brother Ellison. “Au vakabauta ni ratou sa kila vakavinaka tiko na noqu matavuvale ni sai koya oqo e dua na ivurevure vakosipeli me saumi kina na nodratou vakatataro se gagadre ni ratou vakavakarau veivakavulici se wasea e dua na iulutaga.”
Tarai Cake ni Yavu ni Kila Ka
Ena yabaki 2007, e a vakaitavi ena dua na bolebole mai vei bisopi o Jake McKell yabaki 17 mai na ika 21 ni Tabanalevu o Grandview ena iTeki o Provo Utah Grandview (e Amerika), vata kei ira na nona icaba kei na iliuliu me ra wilika tasevu na Tudei ena Vakabauta ena yabaki o ya. E kaya o David Tueller, na peresitedi ni Cauravou ena tabanalevu, ni ra sa vakayagataka sara tikoga na Tudei ena Vakabauta.
“Sa dua na veivakalougatataki levu ni da wilika na kena matata, savasava, ka da kila vakavinaka na veivunau era tiko ena ivola oqo,” e kaya o Brother Tueller. “Sa kilai tu e vuravura taucoko na kaukauwa kei na kena sa vakayagataki tiko na ivola oqo me ivurevure ni vosa, vulici ni ivolanikalou, kei na wasei ni kosipeli vei ira na tani.”
Mai na Tabana o Allentown, ena iTeki o Reading Pennsylvania (e Amerika), e a vakayagataka na Tudei ena Vakabauta o Tracy Norton, na peresitedi ni Goneyalewa, kei ira na goneyalewa ena nona tabanalevu ni ra vulica tiko na Yavu ni Vakabauta, ka ra nuitaka tiko ni ra na yalonuidei me ra wasea yani na kosipeli mera kila vakavinaka cake kina na veiyavu taumada ni vakabauta ni Lotu.
“Au saga meu dau vakayagataka vakavuqa na Tudei ena Vakabauta ka vakayaloqaqataki ira na goneyalewa me ra raica kina na isau ni nodra vakatataro,” e kaya o Sister Norton. “Era sa umanaki tu e vuqa na iulutaga, ena Tudei ena Vakabauta me baleta na iwali ni veika dredre era sotava tiko na itabagone kei na veivakasalataki ni Lotu kei na iulutaga bibi tale eso. Au vakabauta ni sa ka bibi na kena mai tauyavutaki rawa e dua na ivurevure ni isau ni nodra vakatataro.”
E vakabauta o Sister Norton me baleta ga ni sa rawa me ra raica vakatabakidua na iulutaga yadua, era sa rawa me ra kila vakavinaka na ivakavuvuli yadua na goneyalewa a vakavulica.
“Au sa mai kila vakavinaka cake na kosipeli, ka sa qaqaco na noqu ivakadinadina niu vakayagataka na Tudei ena Vakabauta,” e kaya o Genesis Felix yabaki 14, e lewe tiko ni Tabana o Allentown. “Au dau kauta voli tiko na ivola oqo kei na noqu ivolanikalou ka dau raica kina na veiulutaga au sega tu ni kila vakavinaka.”
Bulataki Tiko na iVakavuvuli ni Kosipeli
Sa itovo tu ni nona bula me wilika, vulica, ka bulataka na kosipeli o Daniel Jauslin mai na Tabanalevu o Pratteln, ena iTeki o Bern Switzerland, ka kaya ni Tudei ena Vakabauta sa dua vei ira na ivola e taleitaka dina.
“Oqo e dua na ivola e vukei au sara vakalevu,” e kaya o Brother Jauslin. “Ni ko wilika, ko na rawata se vaqaqacotaka na ivakadinadina ni veika e tukuna tiko, ko na vakalougatataki kina. Oqo e dua dina na idusidusi ni kena bulataki na kosipeli.”
Me kena ivakaraitaki, a vakamacalataka o Brother Jauslin na wase ni ivolanikalou ka vakasalataka me ra vulica vakayadudua ka vakamatavuvale.
“Au kila ni dau dredre toka vei ira e vuqa na lewenilotu e vuravura taucoko, me ra wilika na ivolanikalou ena veisiga, ia … eda vakasalataki ena Tuidei ena Vakabauta ni sa dodonu ga me da wilika ena veisiga, ka me da cakacaka vakaituvatuva, ka me da kila tiko na ibalebale dina ni veika eda wilika tiko,” a kaya.
E kaya o Legrand Laing, e dua na qasenivuli ni semineri e Springville, Utah, e Amerika, ni sa vakadinadinataka o koya na veivuke dina ni Tudei ena Vakabauta vei ira na tamata ni ra sa vulica, ka laki bulataka sara na kosipeli ena nodra bula.
“E soli vakasama ka veivakayaloqaqataki na Tudei ena Vakabauta ni sa mai vakayacori dina ena bula na vunau kei na ivakavuvuli sa vakatavulici tiko,” e kaya o Brother Laing. “E dina ni sa vakakina ,vei ira e vuqa na veiivola ni Lotu ka vaka sara talega kina ena ivolanikalou, ia ena Tudei ena Vakabauta sa vakarautaki tu kina vakarawarawa, vakavinaka, ka vakamatata na veika kece oqo—ena dua ga na vanua.”
Vakavakarau ni kena Wasei
Ena yabaki 2004 a tauyavutaki na Tudei ena Vakabauta me sa ivola talega ni kaulotu, vata kei na Vunautaka na Noqu Kosipeli.
“Ni a se vakarautaki tiko na Vunautaka na Noqu Kosipeli, sa mani lewai kina me sa na vakarawarawataki ka vakavoui na veivola ni kaulotu” a kaya o Greg Droubay mai na Tabacakacaka ni Kaulotu ena Lotu. “A digitaki kina na Tudei ena Vakabauta me sa dua na ivola e matata, lekaleka, ka rawarawa na nona vakayagataka o daukaulotu ni vulica tiko na kosipeli.”
E dina ga ni Tudei ena Vakabauta e taurivaki tiko me ivola veitokoni vei rau na ivolanikalou kei na Vunautaka na Noqu Kosipeli, era sa raica na daukaulotu e vuravura taucoko ni yaga vakakina ena vulici kei na wasei ni kosipeli.
“Au a vakayagataka na Tudei ena Vakabauta ena noqu kaulotu ka vulica mai kina na noqu vosa se lesoni,” a kaya o Paul Epperson mai Woodbridge, Virginia, e Amerika, ka a kaulotu ena tabana ni kaulotu mai Belgium Brussels/Netherlands. “E veimuataki vakavinaka na Vunautaka na Noqu Kosipeli ena kena vulici na veiulutaga eso, ia au dau raica talega na kena tasereki toka ena Tudei ena Vakabauta, ka ra vakamacalataki tu kina vakarawarawa sara na veitikina kei na veivakasama eso.”
Sa taurivaki sara tale tikoga na Tudei ena Vakabauta me sa nodra ivolavakarau na gonevuli ena kalasi ni inisitute kei na semineri.
“Keimami sa dau vakavouya tikoga na veivolavakarau ni inisitute kei na semineri ka keimami vakabauta ni Tudei ena Vakabauta sa ivola totoka dina ka sega walega ni sa vakadonui ia sa vakatututaki tiko ka rawarawa,” a kaya o Brian Garner, na manidia ni lewenivuli ni koliji ena Lotu.
Ena kena sa mai vakacokotaki na veivolavakarau ni kalasi ni inisitute kei na vuli lotu, e kaya o Brother Garner ni ra sa cakava o ira era vola me na vakayagataki e vuravura raraba—ka me sa ivurevure ni vakasaqaqara kei na veivukei.
“Sa voleka ni tamata kecega era sa vakayagataka tiko na Tudei ena Vakabauta,” a kaya. “Era na raica kina na veitikina, vakasaqaqara ena ivola oqo, ka wilika kina na veitukutuku. Sa tu vakarawarawa ka veivukei dina.”
Sa volai tu na Tudei ena Vakabauta ena 46 na veimataqali vosa, ka sa talevi ira yani na lewenilotu vakatekivu mai Sipeni ki Finiladi ka yaco ki Cambodia. E rawa ni vakauta talega na Lotu na ivola oqo ena ldscatalog.com se mai vei ira na iliuliu ni matabete ni veivanua. E kune talega na kena vakavalagi ni ivola oqo ena lds.org ka tiko ena Gospel Library, Media Formats, PDF, ka digitaka sara na True to the Faith.
Mo Dina Tiko ka Tudei ena Vakabauta
A veiwalitaka o Bisopi Lund ni diva mada ga me sa vakabiri na Tudei ena Vakabauta vata kei na ivolanikalou, ka sa yalonuidei tiko ni na yaga sara vakalevu na ivola oqo ka na walia na nodra vakatataro se nodra leqa na tamata yadudua.
“Sa tu kina na veika kece oqo— na papitaiso, ciqomi ni matabete, bula savasava, kei na veivutuni,” a kaya o Bisopi Lund, ni vola tiko na veiulutaga era tiko ena Tudei ena Vakabauta.
Ena kena ivakamacala taumada, eratou sa nuitaka tiko kina na Mataveiliutaki Taumada ni ra na vulica na lewenilotu na ivola oqo ka bulataka na ivakavuvuli ni kosipeli, era na vaqaqacotaki tikoga.
“Ni o vulica na dina ni kosipeli, ena tubu na nomu kila ka me baleta na Nona ituvatuva tawamudu na Tamada Vakalomalagi,” eratou kaya. “Ni yavutaki na nomu bula ena kila ka oqo, sa na rawa kina mo dau digidigi vakayalomatua, bula ka muria na lewa ni Kalou, ka kune marau ena nomu bula. Ena tubu me kaukauwa cake na nomu ivakadinadina. Ena yaco mo na dina tiko ena tudei ena vakabauta.”