Kunei ni Noqu Vakabauta
E vica vata na vula, erau a sureti au tiko kina vakavica na daukaulotu meu papitaiso, ia au dau sega ni vakadonuya.
Ena dua na bogi ena imatai ni noqu yabaki ena koliji ena 1989–90, keirau a vuli lesoni tiko vakabogilevu kei noqu itokani baleta na veitarogi.
Vakasauri ga, sa tarogi au mai o Matt ka yaco me dua vei ira na gauna meu liaci au kina. “Na cava e vakavulica na nomu Lotu me baleta na ituvaki ni Kalou? Au tukuna tiko, na cava o nanuma ni vakacava tu na kena irairai?”
E a sega vei au na kena isau. Ni sa kila na noqu nanuma, a sega tale ni tomana. Ia au a sega ni guilecava rawa. Sa dua dina na gauna dredre: Au lotu Protestant ka vuli tiko e Brigham Young Univesiti, ka dina ga niu lomatarotarotaka voli ga na noqu vakabauta kei na lotu raraba, au sega ni vinakata meu veisautaka na noqu lotu. Ia, ena yabaki taucoko o ya au sa taqomaki au sara vakavinaka vakayalo ena noqu vakayawaki au mai na veivosaki vakalotu. Ena taro rawarawa ga o ya, sa dolava rawa kina o noqu itokani e dua na sala e yaloqu.
Vakasaqara na Vakabauta
Ena vica na vula ka tarava, au taroga voli e lomaqu, “Na cava beka na veika au vakabauta tu? Kena iusutu, au vakabauta tiko beka? E tiko dina beka na Kalou, ke dina, e vakacava beka na kena ituvaki? Au na kilai Koya beka? Ena rogoca beka na noqu masu? Ena tautauvata beka na noqu vakabauta kei ira na noqu itokani Yalododonu Edaidai ?”
Oqo e sega ni baleta niu a sega ni dau vakasamataka na mataqali taro titobu vaka o ya; ena vica vata na yabaki eso vei ira na noqu itokani era lotu YDE. O ira na itokani oqo a vakavuna meu laki vuli ki BYU. Ia e voleka ni veigauna kece au sega ni kauwai ki na nodra veivunauci vakosipeli. E vica na gauna au a vakarorogo vei rau na daukaulotu, au sega ga ni malele kina.
Au rerevaka meu veisau ki na veika e gadrevi, na veisau ka na kauti au tani mai na neitou veimaliwai vakayago ka vakayalo vakamatavuvale. Au sa sega ni via vakadinadinataka niu sa cala tu se sega ni dodonu na noqu ivakarau ni bula. Au sega ni vakabauta niu na ciqoma na ivakatakila mai vua na Kalou se na nodra ciqoma talega na tamata. E vaka me sega ni dodonu, sega ni rawa, se vakatani me rairai na Kalou kivua na gonetagane o Josefa Simici, ka me na vakatakila mai o Koya e dua na ivolanikalou vou, ka sa ikoya ga na Lotu sa ciqoma na veidusimaki vakalou me tauyavu kina na Lotu dina.
Kena ibalebale, niu sa sega tu ga ni vakabauta na dina ni veimatalotu, oka kina na noqu lotu. Ni sa yaco mai meu lomana kina vakalevu na noqu matavuvale kei ira na noqu itokani, na yalo me vakacegui, ni sa yaco mai na domo ni vakasolokakana ni Yalotabu, au sa vakaukauwataka na yaloqu.
Ni oti na imatai ni yabaki ni vuli au a lesu ki vale e Kentucky meu tomana kina na noqu vuli. Era sa biubiu sara o ira na noqu itokani mera laki kaulotu, kau sa galili sara ni ra sa gole. Au gadreva tu meu yaloqaqa vakataki ira ka a vakauqeta na nodra laki solibula me rua na yabaki. Ena gauna vata oqori, sa dau vakayavalati au tiko niu sega ni sauma rawa na taro nei Matt. Au vinakata meu kila ga vakaiau na ka dina. Sa yaco sara, ni oti na nodra volavola tiko mai vakavuqa vei au na noqu itokani o ya meu sotavi rau mada na daukaulotu, au sa sega ni rere ka vakadonuya.
Vakasamataki ni Saumaki ki na Lotu
Ia, au sega sara ni se vakabauta na vakasama ni veivakavuvuli ni kosipeli era umani vata ga mera cokoti vata. Me vaka ni nodrau itukutuku na daukaulotu ena rawa ni ka dina se cala taucoko, erau vakabauta ni gauna au na vakadinadinataka rawa kina e dua na kena ivakavuvuli, sa rawa vakaidina meu na ciqoma na nodrau ivakavuvuli kece sara.
Au a sega ni vakabauti rau. Au nanuma ga ni dodonu meu digia ga na ka au vinakata meu vakabauta me vaka niu digidigi mai na dua na ikanakana vakayalo ka vakaivunau.1 Ena gauna vata oqori, na noqu ile e gadreva na ivakadinadina sa laurai, ka sega ni saumaki mai ena vakabauta.
E ka ni rarawa, ni noqu ile a vakavuna meu yalorarawa ka loma bibi kina. Na veika kece vakalotu au sa kila tu era sa valuta tiko na inaki butobuto ka sega ni vakaibalebale vei au. Au sa gadreva e dua na ka e vinaka cake, e dua na ka me vakauqeta na yaloqu me vaka eratou a vakaraitaka na noqu itokani kei rau na daukaulotu ni ra vakauqeti ena Yalo Tabu. Au a vakarorogo sara vei rau na daukaulotu ka nuitaka tiko meu na kila na veika eratou kaya ni ka dina, se ke rawa mada ga meu kila ni ka lasu.
Erau vosota na daukaulotu ka yaloqaqa. E vica vata na vula, na nodrau sa vakavulici au vakavuqa ka sureti au vakavica me’u papitaiso, ia au dau sega ni vakadonuya. Au a waraka tiko e dua na ivakatakilakila se ka mana me na yaco me ivakadinadina vei au ni bera niu vakadonuya na nodrau veisureti. A sega ni yaco mai na ivakadinadina o ya, kau sa tomana tikoga meu vakadarodaro.
Ena dua na siga a qai wilika mai o rau na daukaulotu e dua na tikina mai na iVola i Momani: “Ia mo dou kakua ni vakatitiqataka ni dou sa sega ni raica, ka ni na vakatovolei taumada na nomudou vakabauta, dou na qai raica e muri na kena ivakadinadina” (Ica 12:6). Rau a qai kaya, “Josh, na veigauna kece keirau kerei iko mo papitaiso o vakadaroya tiko. Na ka mo na cakava o ya mo vakaio, ka na qai vakadinadinataka vei iko na Yalotabu.”
Ena dua tale na kena ibalebale, e se bera ni yaco mai vei au e dua na ivakadinadina baleta ni se bera ni vakatovolei na noqu vakabauta. Au sega mada ni vakasamataka ia meu kerea, kau vakabauta ni na yaco mai niu sega ni vakasaqara (raica V&V 9:7). Au sa tarova na Yalotabu me vakadinadinataka vei au baleta niu sega ni vinakata na toso ki liu. Na ka meu cakava o ya meu kalawa yani ena vakabauta ena butobuto me na qai rarama mai. Ena yaco na ivakadinadina ni oti na vakatovolei ni noqu vakabauta, e sega ni liu mai.2
Au a vakasamataka tiko ni o rau na daukaulotu erau saga tiko me rau vakasaurarataki au meu papitaiso. Sa qai votu mai vei au ni gauna sara ga au dau vakadaroya kina na veisureti ni papitaiso, e dau luluqa na yaloqu. A vakauqeti au tiko e dua na yalo vakacegu e vakanomodi, malumu, ka vinaka meu vakamuria na nodrau ivakasala na daukaulotu, ia au a sega ni kidava rawa me yacova ni sa yali mai vei au, ka yaco vei au na veilecayaki, sega ni marau, kei na rarawa.
Au vakadikeva ni ka e yali mai vei au o ya sa ikoya beka na Yalotabu kei na noqu veilecayaki sa ikoya beka na noqu yalo kaukauwa a vagolei Koya tani. Sa sega tale niu dro rawa, au sa vinakata meu tovolea na nodrau bolei au na daukaulotu, keu sa vakila kina na Yalotabu me vaka erau yalataka tiko, au sa na papitaiso. Ia, kevaka au na sega ni vakila na Yalotabu, au sa tu vakarau meu kaya vei rau na daukaulotu niu veiwali tu ga.
Vakatovolei ni Sorenikau
Ena yakavi ni lesoni e tarava keitou a sarava kina na vidio ni Lotu, The Prodigal Son. Sa yaco e dua na yalo veivakauqeti ena rumu; erau sa luvuci na daukaulotu, sa tonawanawa mai na matadrau.
Ni sa oti na iyaloyalo, keitou a wilika eso na tikini ivolanikalou. Sa oti sa qai vuki mai o Elder Critchfield ka taroga, “Josh, e rawa mo na papitaiso ena Vakarauwai, na ika 10 ni Noveba, ena 4:00 ena yakavi?”
Au a wawa vakalailai ka sauma, “Io.”
A curumi au na Yalotabu me vaka e dua na livaliva ni ra se sara ga na vuti ni ligaqu, kau voleka ni tagi. Sa sega tale ni vakabekataki ni sa cila na rarama ena butobuto. Au sa vakatovolea na noqu vakabauta, kau sa kila vakaidina sara ni sa dodonu meu papitaiso.
Au sa rawata kina na ivakadinadina ni vinaka ni dua na sorenikau ni vakabauta, ia au sa na vakarau raica me na tubu cake me laki vua (raica Alama 32:35–36), kau se bera ni ciqoma e dua na ivakadinadina ni ivakavuvuli tale eso ni kosipeli. E se bera ni oti na vakatovolei ni noqu vakabauta.
Ni oti toka ga vakalailai na noqu papitaiso kei na vakadeitaki, sa tekivu meu lomatarotaro. Au sa mai vakataotaki tu ena noqu ivakarau ni bula au sotava niu vakarau papitaiso tiko vata kei na noqu vakasama makawa, ni sega ni duavata kei na kila e yavutaki ena vakabauta.
Au sa baci vakatotogani tale ena lomalomarua kei na rarawa, kau sa sega ni kila na cava meu vakabauta. Ia, sa oti na noqu veiyalayalati, kau sa saga meu laki Lotu tikoga vakaukauwa ka bulataka na ivakavuvuli au sa vakavulici kina me yacova ni laki walia na noqu veilecayaki na kena a vakatovolei na noqu vakabauta.
Kunei ni Noqu Vakabauta
A sega ni laivi au na Turaga meu tu duadua. Au a kacivi meu nodrau itokani na daukaulotu, ka keitou dau gole vata ena veimacawa, ka rau dau vakavulici au tikoga. Era yalodina na noqu dauveituberi ni matavuvale. E dau maqusa ka daucakacaka o noqu itokani dauveituberi. Keimami sa veimaliwai vakavinaka sara kei ira e vuqa na lewe ni tabanalevu ni ra okati au meu wekadra, ka ra sureti au ki nodra veivale ena vakayakavi kei na lotu vakamatavuvale. Keimami dau masumasu vata. E kauwai mai ka veivakayaloqaqataki o bisopi kei na nona matavuvale. Au raica rawa ni ra yalodina tiko, ka vaqaqacotaka kina na yaloqu.
Ena dua na siga, ni oti e vica na vula, au raica sara ni gauna au dau wilika kina na iVola i Momani, e yaco mai vei au na yalo e veivakavukui, kei na vakacegu, me vaka ga a yaco vei au ena gauna ni lesoni kei na noqu sureti tiko meu papitaiso. Au sa kidava rawa kina: ni o ya na Yalotabu. Au sa qai vakasamataka—“Kevaka sa ikoya oqo na Yalotabu, sa qai dina beka na ivola oqo”—e vakauqeta na yaloqu na yalo veivakavukui o ya, sa vuki na noqu vakabauta meu vakavukui vakayalo ki na ivakavuvuli o ya.
Ni sa yaco meu “yaloraramusumusu” ka “yalobibivoro” cake vakalevu (raica Ether 4:15), era sa qai yaco mai na veika e veivakadeitaki. Sa yaco me yali yani na lomalomarua kau sa vakadeitaki au. Au sa kila ni bula tiko na Kalou, ni sa Karisito o Jisu, ni sa parofita ni Kalou o Josefa Simici, e sega ni noqu vakasama ga se nodra veivakayarayarataki eso, ia ena kaukauwa ga ni Yalotabu ni sa vosa ki yaloqu. E dolava na noqu vakasama na vunau ena vunau (raica 2 Nifai 28:30). Ni ra veicevacevai mai na veivakadinadina kece oqo, sa rabailevu sara na noqu kila na kosipeli, ka sa yaco vakatotolo mai na kila vakavinaka vakayalo. Sa gadrevi na vuku ena veika e sotavi vakayadua, me tiko na yalo vakarorogo kei na talairawarawa, kei na gagadre ni vakayacora na veivakauqeti ni Yalotabu (raica Mosaia 3:19).
Au sa rawa ni kaya nikua ni sa dina sara na kosipeli, niu sa kila vakaiau na ka oqo. Ena gauna o ya a vakatani se rogorogo cala kina na kosipeli; ia oqo sa matata ka totoka dina vei au. Na ivakavuvuli ni kosipeli era sa umanaki mai mera laki cokoti vata. E dina ga niu daukaulotu ka lailai wale na noqu kila vakaivolanikalou, au rawa ni vakadinadinataka na veika dina oqo. Ni sa rabailevu cake na noqu kila vakaivolanikalou, sa na vakakina na noqu ivakadinadina.
Sa duri tu na noqu ivakadinadina taucoko oqo me dua na isasabai kaukauwa ka tudei me tarova kina na veika butobuto. E tokoni au meu qaqa ena bolebole au sotava, vakabibi na sasaga ni vuni meca me kaburaka mai na sorenikau ni lomalomarua me baleta na veika sa vakadeitaki oti vei au (raica V&V 6:22–23). Niu dau malumalumu, niu dau lomalomarua, ni yaco mai na mosi ni yalo, au dau vakayacora ga na veika e kauta mai na veika vinaka ena imatai ni siga au a taukena kina e dua na ivakadinadina: Au dau vakasamataka na veigauna a tarai cake kina na noqu ivakadinadina au sa ciqoma, au dau vakabulabulataka na noqu bulataka na ivakavuvuli au sa vakavulici kina, kau dau vakarorogo matua sara ni dau vakadeitaka na noqu vakabauta na Yalotabu.
E dina na kosipeli, taucoko sara, ka sa dolavi tu vei ira kece, sa yaloraramusumusu, ka ra vakatovolea na nodra vakabauta ni ra kalawa yani ena vakabauta ena loma ni butobuto. Sa tiko mai kina na rarama ni iVakabula, e vunitaki ga ni sega ni yaloda meda vakasaqara. E dau yaco mai na veisiga butobuto ki na noda bula se na veigauna ena bolei kina na noda ivakadinadina. Au sa kila rawa ni sa waraki keda tu na veivakararamataki ni iVakabula ni da vakasaqarai Koya vagumatua, ia na veivakararamataki o ya, ni da vakasaqara tikoga, ena muataki keda meda saumaki mai ki na lotu.