Na Noqu Tadra Totoka
Au a coqa e gaunisala levu ena vica na yabaki sa oti, au mavoa vakaca kina, ka yaco sara meu sega tu ni vakilai au me tolu na vula. E a vukei au na veimasulaki ni matabete, kei na nodratou veitokoni na noqu matavuvale, ka ra tukuna na vuniwai ni “dua na veivakabulai totoka.”
Ia na mavoa ni uluqu a vakavuna meu dau guiguileca totolo, ka sa sega tale niu kila na noqu tadra. Au sa dau yadra tu ga ka vakasama, “Oi, au a tadra bagi,” ia ena gauna o ya, au sa guilecava vakadua na noqu tadra.
Ni oti e tinikavitu na yabaki mai na gauna au a coqa kina, au a kacivi meu bisopi ena noqu tabanalevu. Ena dua na neitou bose ni tabanalevu, a vakatura mai o peresitedi ni Lalai e dua na veiwatini me rau qasenivuli ena kalasi ni CTR (DND). Keitou sa veiraici sara ena kurabui kei rau na noqu daunivakasala.
E mai lotu tiko o yalewa, e vagauna ga, ia sa vica na yabaki oqo sa sega tu ni mai lotu o watina. Ia, keimami sa duavata ni dodonu ga me soli vei rau na madigi oqo me rau ciqoma na veikacivi.
Na bogi yani e liu ni bera niu veivosaki kei rau na veiwatini oqo, au a tadra. Au a yadra ena mataka kau se nanuma vinaka tu ga. Sa baleta na veika meu cavuta ena veivakatarogi me rawa ni rau ciqoma na veikacivi. Au kurabui dina niu nanuma vinaka tu na imatai ni noqu tadra ena loma ni 17 na yabaki, ia e sega ni koya ga o ya, na lewe ni noqu tadra e vakauqeta ka vakaukauwataki au.
E a mai kauti au o noqu daunivakasala. Ni keirau sa draiva tiko yani, a kaya mai, “Bisopi, o kemuni ga mo ni vosa vei kedaru.” Au nanuma tiko na noqu a matadredredre baleta niu sa kila ni sa tuvanaka oti tu na Turaga na veika meu tukuna.
Ena gauna ni veivakatarogi au a vakayacora na veika kece mai na tadra, ka rau a ciqoma na veiwatini na veikacivi. Ni keirau sa lesu ena bogi o ya, a kaya mai o noqu daunivakasala, “E vaka sara ga sa vakavulici au o ivakavuvuli.” Au a dredre tale niu kila ni ka dina—keirau a vakavulici ruarua mai vua na iVakavuvuli.
Rau a vakayacora ena yalodina na veiwatini na nodrau ilesilesi ena Lalai, ka kaukauwa sara na nodrau lotu ena tabanalevu. Ena rua na yabaki e tarava rau a laki vauci ena valetabu.
Me yacova mai nikua, sa ikoya ga o ya na tadra au a nanuma rawa ena loma ni 28 na yabaki sa oti. Au sa kila vakaidina ni sa kila tu na Tamada Vakalomalagi ni sa gauna donu o ya vei rau na veiwatini oqo. A yaco talega, me vakauqeta o Koya na peresitedi ni Lalai, ka dua na bogi, a vosa vakalougatataki au kina ka me tu vinaka tale na noqu vakasama ka takali na noqu guiguileca. Me vakadua tale, au sa kila tale kina, ni sa iliuliu ni Lotu oqo na Turaga ka “na ia tikoga na cakacaka ni Turaga, ka na vakayacora taucoko na nona vosa ni yalayala” (Momani 8:22).