ISULUSULU KEI NA IRAIRAI
Na Laki Volivoli
Me rakorako na nomuni isulusulu mo ni rokova kina na Kalou kei iko talega. Kakua ni dau isulusulu vakatani. Kakua ni samuqawe se cula na yagomu.
Keirau a volivoli tiko kei tinaqu kau raica sara e dua na liku loaloa me sa noqu. Au a dara na liku ka vakaraitaka vei tinaqu. Oti vakalailai a qai kaya mai, “Becky, au vakabauta ni lekaleka,” Au a sauma ni sega ni lekaleka kau tukuna vua ni ra dara tale tu ga o ira na goneyalewa e koronivuli—eso e lekaleka sara. Au a saga tikoga me taleitaka o koya na liku.
A vakadeitaka tale mai o tinaqu, “E lekaleka sara ga. Daru na sega ni volia. Laki veisautaka.”
Au sega ni kila na vuna me yalodredre kina vaka o ya, vakabibi niu sa gone yalewa ka meu vakatulewa ga ena noqu isulusulu. E ca sara ga na neirau volivoli o ya, ka keirau veigaluvi lesu i vale.
Sa qai vosa mai o tinaqu: “Becky, na vuna au sega ni volia kina vei iko na liku baleta ko na rairai kina vakatani. Sa rui lekaleka sara ga na liku ka sega ni kemu irairai dina o ya. O iko e dua na luvena yalewa na Kalou.”
Na ivakamacala nei tinaqu e vakavulica vei au e dua na ivakavuvuli kau na nanuma tikoga. Au luvena yalewa na Kalou, na noqu itovo kei na noqu isulusulu sa rokataka na noqu bula kei na noqu lomana na Tamaqu Vakalomalagi kei na noqu iVakabula.
E dau dredre na vakaisulu rakorako, ia au vakavinavinaka niu sega ni vakatanitaka na noqu ivakatagedegede. Au kila ni gauna eda na kila vakavinaka kina ni da sa luvena na Kalou, eda na vorata rawa noda domona tiko na isulusulu vakavuravura.