E Tudei na Noqu Vakabauta ia Au Liga Lala
Ena mua ni yabaki1988 au a marautaka voli na noqu veikacivi vaka-ikarua ni daunivakasala ena matabisopi mai Ciudad Ojeda e Venezuela, ia a dua tiko na noqu leqa. Sa yabaki dua oti na noqu lewena na Lotu, e se bera ga niu taura na veivakalougatataki ni valetabu.
Dua na siga a mai sikovi au e dua na noqu itokani mai Maracaibo na siti toka veitikivi. A totolo sara neirau veiwasei vakayalo.
A vakauqeti o noqu itokani me kaya mai, “Baraca Troconiz, au vakabauta ni sa gadrevi iko na Tamada Vakalomalagi mo lako ki na valetabu ka ciqoma na veivakalougatataki sa yalataka tu o Koya vei ira na Luvena.”
“Au sega ni rawa ni gole,” au a sauma. “E sega na valetabu eke e Venezuela, ka sau levu dina na ilakolako ki na dua tale na matanitu. E sega vei au na ilavo.”
A vakasama o koya ka kaya mai, “Kevaka o via lako dina ki na valetabu, ena vakarautaka vei iko na Tamada Vakalomalagi na nomu ilakolako.”
Au sauma, “Kevaka me na veivuke vakaoqori na Tamada Vakalomalagi, au na lako!”
Sa tekivu mai kea na noqu vakabauta kei na vakanuinui tiko niu na lako ki na valetabu. Na siga tarava au a qiriti ira na iliuliu ni iteki ka tukuni mai ni sa vakarau tiko e dua na ilakolako ena Janueri ki na Valetabu e Lima Peru, na kena e voleka duadua ena gauna o ya. Na isau ni ilakolako e 16,500 na bolivares me isau ni waqavuka, kakana, kei na icili.
Sa totolo sara na gauna, ka sa voleka mai na siga me sa kumuni kina na ilavo. Au saga mai na kequ isau, ia se sega sara ga ni yacova na ilavo e vinakati. Ia a sega ni vakayavalati na noqu vakabauta. Au sa vakadeitaka tikoga ni na vakarautaka e dua na sala na Tamada Vakalomalagi.
Ni sa yaco mai na kena siga lokuci, a qiriti au mai e dua au a cakacaka tu vua e liu. A cavuta sara mai o koya na yacaqu ka kaya, “O a cakacaka tu e liu ena kabani ni waiwai oqo ena lima na yabaki sa oti. Ena nomu vakacegu, e a cakacakataki cala na kemu isau. Kerei mo ni mai taura na nomuni jeke.”
Ena siga tarava au a gole ka laki kauta mai na jeke. Niu raica na kena levu, au sega sara ga ni vakabauta. A volai tu ena jeke na levu ni ilavo e 16,500 na bolivares!
Ena ika 17 ni Janueri, 1989, au a curu ki na Valetabu e Lima Peru ka ciqoma na noqu edaumeni. E a dina o noqu itokani. A vakarautaka dina e dua na sala o Tamaqu Vakalomalagi meu gole ki na valetabu. A kaya kina o Nifai, “Ni sa rawa vua na Turaga me kitaka na veika kece ga … vei ira na luve ni tamata, kevaka era sa vakabauti Koya” (1 Nifai 7:12).