TOMAI E FILIFILI AI MA LAU MATAFAIOI E TE TALI ATU AI MO OE LAVA
I Luga atu o Ao
Ia e filifili le amiotonu ma le fiafia, tusa lava pe o le a le tulaga e te i ai. O lou tiute le taliaina o taunuuga o au filifiliga. Atiina ae ou tomai ma taleni, ma faaaoga mo le lelei. Aloese mai le paie ma ia e naunau e galue malosi.
E lei leva tele atu sa ou maua ai le avanoa e lele ai i se tamai vaalele. Ao matou sauni e o atu i totonu o le vaalele, sa fesili se tasi o le au malaga i le pailate po o le a le maualuga o le a matou felelei ai. Sa ia faailoa mai o le a matou felelei i le 9,500 futu (2,900 m). Sa ia faapea mai, “O lena tulaga o le a tatou oo atu ai teisi lava i luga o ao.” Ona ia faamalamalama mai lea, “Afai tatou te felelei i lalo ifo o ao, o le a fai lava si sousou o la tatou faigamalaga. Ae peitai, afai e mafai ona tatou felelei atu i totonu o ao ma oo atu i luga, o le a sili atu le saogalemu o la tatou malaga.”
O se manatu sa faamaonia. Mo i matou sa i totonu o lena vaalele, sa manaomia sina taumafaiga laitiiti, o sina faateleina laitiiti o le penisini, o sina fesouaiga laitiiti ao alu atu ai i totonu o ao. Ae peitai, ina ua matou tea atu i luga mai fesouaiga, sa tele lava ina saogalemu le faigamalaga. E ui lava sa i ai ni nai fesouaiga pupuu na manaomia ai ona taulai atu le pailate i tulaga o le faigamalaga, ae sa sili atu ona matua lagolelei la matou malaga.
Mulimuli ane sa ou mafaufau e uiga i upu a le pailate: “Afai e mafai ona tatou felelei atu i totonu o ao ma oo atu i luga, o le a sili atu le saogalemu o la tatou malaga.” Sa ou mafaufau i le tele o vaega e faatatau i ai lena mea i le olaga lava ia. A o tatou ola ai i se olaga faitino, o loo tele mea mataga ma mea eleelea e tatau ona tatou o atu ai i luga pe afai tatou te ola ai i se olaga o se tasi o le Au Paia o Aso e Gata Ai. Ona tatou maua lea o le Agaga e faatasi ma i tatou, ma lagonaina le filemu o loo i ai iina e tatou te fiafia ai. E manaomia se taumafaiga, e manaomia se naunautaiga malosi, e manaomia le lototele, ma e manaomia le faia o ni filifiliga sao mo i tatou ina ia oo atu ai i luga atu o fesouaiga o loo siomia ai i tatou. O na fesouaiga e aofia ai mea eleelea o loo siomia ai i tatou i ala o faasalalauga. E aofia ai le lotovaivai, faanoanoa, ma isi luitau uma o le “tagata o le lalolagi” (Mosaea 3:19).
Ae peitai, afai tatou te faaaogaina tatau lo tatou saolotoga, afai tatou te ola ai i tulaga faatonuina ua tuuina mai ia i tatou e le Au Peresitene Sili i totonu o le Mo Le Malosi o le Autalavou, ma afai tatou te faia se taumafaiga naunautai i lea aso ma lea aso ina ia faatoilaloina mea o le lalolagi, o le a sili atu ona saogalemu la tatou malaga i lenei olaga. O le a mafai ona tatou lagonaina le filemu ao agai ai i luga o le ala, ma o le a mafai ona tatou taunuu ma le saogalemu i le faaiuga o la tatou malaga.
E le faapea o le malaga o le a leai ni mea e tutupu ai ma o le a atoatoa le filemu. E lei folafolaina mai lava lena tulaga, aua o le a i ai luitau i luga o le ala, ma o le a moomia ona faaeteete ma mataala i luga atoa o le ala. Ae peitai, o le filifili ia i ai i le itu a le Alii, e mafai ona tatou sili atu ai i luga o faaosoosoga o lo tatou olaga faitino, ma o le a tatou mautinoa ai le maua o le filemu ma le fiafia i lenei olaga e faapea foi i le olaga a sau.