Fesili ma Tali
“O matou ma au uo e i ai le faafitauli o le faitatala. O le a se mea ou te faia ina ia taofia ai ma fesoasoani ai ia i latou ina ia taofia?”
E mafai ona e faatoilaloina le faitala i le mulimuli i le fautuaga o loo i totonu o le Mo Le Malosi o le Autalavou e uiga i le faatoilaloina o le palauvale: “Fesoasoani i isi o loo siomia ai oe, ina ia latou faaaogaina gagana mama e ala i faataitaiga ma uunaia faalelei i latou e filifili nisi upu. Ia savali ese ma le faaaloalo, pe sui le mataupu [e talanoa ai] pe a faaaoga gagana leaga e i latou o loo outou faatasi.
“Afai ua e amatalia le amio masani o le fai upusa [po o le faitatala], e mafai ona e taofia. Ia amata i le faia lea o se faaiuga o le a suia. Tatalo mo se fesoasoani. A e amata faaaogaina upu e te iloa e sese, ona e filemu lea pe fai atu le mea lena e te fia fai atu ai i se isi faaupuga.”
O loo faamalamalama mai foi i le tusi le mafuaaga e taua ai le tautala lelei mo isi: “Ia tautala faalelei ma agalelei i isi, ina ia mafai ai ona e faataunuuina le poloaiga a le Alii ia fealofani. Pe a e faaaogaina le gagana lelei, ua e valaaulia le Agaga e mafuta ma oe” (“Gagana” [2001], 22–23).
O le agalelei i au fesootaiga o se tulaga faa-Keriso ma o le a fesoasoani ia te oe e faaleleia sootaga ma e maua ai se faalogona lelei ia te oe lava ia.
O Le Tulafono Faaauro
O le faitatala e tupu pea ia i tatou i aso uma, ma e matua tiga lava. Atonu e foliga mai o se mea masani le faasalalau “o se tala fou” i au uo, ae ia e mafaufau e uiga i le tagata o loo e talanoa agai i ai. Pe e te tauina atu ea mea ia o loo e tauina pe a na fai o i ai o ia iina? Pe sa fai atu ea lea tagata ia te oe e te tauina atu i isi tagata? Mafaufau po o le a sou lagona pe afai o se tasi o loo faia tala e uiga ia te oe. “O mea uma foi tou te loto i ai ia faia e tagata ia te outou, ia faapea lava ona outou faia ia te i latou” (3 Nifae 14:12). Afai o loo faitatala au uo, ia suia i se uiga migao le mataupu e talanoa i ai.
Jessica J., 16, Arisona, ISA
O Le Vailaau e Togafitia ai le Faitala
E tolu ni vaega e aofia ai i le faitala; o tatou, o i latou e faalogologo, ma tagata o loo tatou talanoa agai i ai. Ia faia se tautinoga e tuu le faitala, ona fai loa lea. O nisi ia o vailaau e togafitia ai le faamai o le faitala: (1) Ia suia le mataupu e talanoa i ai pe a amata ona faitatala au uo. (2) Ia e nofo filemu ona leai lea o ni tagata e talanoa i ai. (3) Tau manino atu ia i latou ia “aua tou te fefaiupuai” (Iakopo 4:11).
But A., 22, Phnom Penh, Kemupotia
Aloese mai le Faia o Faamatalaga Sese
O le faitala e i ai se malosi taufaaleaga ma e mafai ona faamanualia ai lagona o tagata. Pe a tatou faitatala, ua tatou tatalaina le faitotoa mo le fili e faaleagaina se tulaga o se isi tagata. Ina ia foia lena amioga leaga, soo se faamatalaga faitio e uiga i le olaga o soo se tagata e tatau ona aloese mai ai. Pe a tatou faalogo i ni mea faapena, pe moni pe leai, e tatau ona tatou taumafai e taofi. Afai latou te faaauau pea, e tatau ona tatou o ese ai (tagai Mataio 12:36).
E mafai ona tatou fesoasoani i a tatou uo e ala i le fautua ia i latou ia aua lava nei aafia i ia ituaiga talanoaga ma faamalosiau i latou, i le avea ai ma tagata o le Ekalesia ma o nisi e mulimuli ma le faatuatua ia Keriso, e tatau lava ona saili e puipuia le mea moni ma le amiotonu, ia avea pea ma faataitaiga ma faaviivii i isi (tagai Mataupu Faavae o le Faatuatua 1:13).
Ismael S., 18, Sāo Paulo, Pasila
Mafaufau i Mea Nei
Ina ia aloese mai le faitala, e tatau ona tatou aoaoina se mau e pei o le Levitiko 19:18 lea o loo aoao mai ai i tatou ia alolofa i o tatou tuaoi e pei o i tatou lava ma taulotoina i totonu o o tatou mafaufau i taimi uma o le a amata ai ona tatou faitala. E mafai foi ona tatou aoaoina se pese e pei o le “O Loo Ou Taumafai e Avea e Pei o Iesu” (Tusipese a Tamaiti, 40–41) ma peseina i totonu o o tatou mafaufau. O se isi manatu o le tau atu lea o ni mea lelei se lua e uiga i le tagata. I lena auala o le a galo ai ona faaletonu ma faapea ona iloa ai lelei o lena tagata.
Rhodora M., 19, Luzon, Filipaina
Vaai mo le Lelei i Isi.
O le faitala e mafai ona faigata ona foia. Ae ou te manatu afai e te manatua ona alofa i ou tuaoi, atonu o le a e toe mafaufau faalua ao lei faia se faamatalaga e te toe faanoanoa ai. E le o tatou e faamasinoina isi. Ou te manatu o le vaai mo mea lelei i tagata e mafai ona fesoasoani nai lo le matauina o faaletonu.
Haylee B., 15, Iuta, ISA
E Manaomia ai le Lototele
Ua fai mai nisi “ua tatou fausia pa vaeloto i le va o i tatou ma e pele ia i tatou e ala i o tatou gutu.” Ou te talitonu ina ia taofia lenei mea, tatou te manaomia le tele o le lototele faaletagata ma le faaleagaga. Afai tatou te malamalama moni i le talalelei, o i tatou ua avea ma tagata o le Ekalesia e tatau ona aua le faitala aua ua aoaoina i tatou e le Atua e tatala o tatou gutu e folafola le talalelei i le lalolagi atoa, ae le o le faitio po o le faitala e uiga i isi.
Vanessa P., 19, Tahiti, Farani Polenisia
Tatalo mo se Taitaiga
Ia manatua o le faitala e mafai ona tuua ai se aafiaga loloto ma le umi i isi. Taumafai e tuu oe i o latou tulaga, ma mafaufau po o le a sou lagona pe afai e faia e nisi ni tala le lelei e uiga ia te oe. O se manaoga amiotonu mo oe le suia o lenei amioga. O le a faamanuiaina oe e le Alii i le malosi ma le loto ua suia ao e saili atu ma le faamaoni mo Lana taitaiga e ala i le tatalo.
Brittney H., 12, Iuta, ISA