O La’u Miti Ofoofogia
I se faalavelave i luga o le auala i le tele o tausaga talu ai, sa ou afaina ai i ni manuaga se tele, o le manuaga sili ona leaga lea sa ou le iloa ai se mea mo le tolu masina. O faamanuiaga o le perisitua, faatasi ai ma le lagolago mai a lo’u aiga, sa mafai ai ona ou mauaina lenei mea ua taua e se tasi o au fomai “o se toe faasaoina ofoofogia.”
Ae o ou manuaga i le ulu ua faavaivaia ai lo’u toe manatuaina o ni mea na tutupu lata mai, ma sa le mafai ona ou toe manatuaina ni au miti. O le tele o taimi ou te ala ai ma mafaufau. “Oi, sa ou miti,” ae i lena taimi, ua leiloa atu le miti mai lo’u mafaufau e le toe manatua.
I le sefulufitu tausaga talu ona tupu lena faalavelave, sa valaauina ai au o se epikopo o la’u uarota. I se fonotaga mulimuli ane a le aufono a le uarota, sa fautuaina mai ai e le peresitene o le Peraimeri ina ia valaauina se tasi o ulugalii e aoaoina le vasega o le FMT. Sa vave ona matou fetilotilofai ma ou fesoasoani.
O le tuafafine e auai mai i sauniga, e ui lava e le o taimi uma, ae o lona toalua e lei auai mai lava mo le tele o tausaga. Ae ui lava i lea, sa matou lagonaina uma e tatau ona laua maua le avanoa ina ia filifili ai i le valaauga.
I le po ae matou te lei talanoa ma le ulugalii, sa ou faia ai se miti manino lelei. Sa ou ala ae i le taeao e sosoo ai ma manatuaina atoatoa. O le miti e faatatau atoa lava i le mea e tatau ona tau atu i le faatalanoaga ina ia laua taliaina ai le valaauga e auauna ai. Sa ou lagonaina le faateia i le manatuaina o lau miti muamua i le 17 o tausaga, ae e sili atu i lena, o mea uma e aafia i le miti ua faafiafiaina ai au ma ou lagonaina ai se malosiaga lelei.
I lena afiafi sa sau lo’u fesoasoani ma piki au i lana taavale. A o ma malaga atu i le faatalanoaga, sa ia fai mai, “Epikopo, o le a ou tuuina atu ia te oe e te faia uma le faatalanoaga.” Sa ou manatuaina lou ataata ma le toafilemu aua ua ou lagona ua uma ona faatulagaina e le Alii la’u faatalanoaga.
I le faatalanoaga, sa ou toe tauina atu atoatoa le miti, ma sa taliaina e le ulugalii le valaauga. A o ma malaga atu i le fale, sa faapea mai lo’u fesoasoani, “Ua ou lagonaina ua pei faatoa aoaoina au e se faiaoga faapitoa.” Sa ou toe ataata aua ua ou iloa e moni lava—o i maua uma ua aoaoina e le faiaoga faapitoa.
Sa faataunuuina e le ulugalii o laua tiute i le Peraimeri ma le atoatoa, ma faapea ona toaaga i laua i totonu o le uarota. I le lua tausaga mulimuli ane sa faamauina ai i laua i totonu o le malumalu.
E oo mai i le taimi nei, o lena miti patino e na o le pau lea o se miti ua ou manatuaina mo le 28 tausaga ua mavae. Ua ou lagona ma le mautinoa na silafia lava e le Tama Faalelagi ua talafeagai lelei le taimi mo lenei ulugalii. Ona o lea tulaga, sa Ia musuia ai le peresitene o le Peraimeri ma, i le po e tasi, sa faamanuiaina lo’u manatuaina ina ia galue atoatoa. Ua faapea ai foi ona ou iloa o loo i ai le Alii i le faatumutumuga o lenei Ekalesia “aua e alualu pea le finagalo faavavau o le Atua, seia faataunuuina ana folafolaga uma lava” (Mamona 8:22).