Mo Le Malosi o le Autalavou
Faataunuuina o lo Tatou Tiute i le Atua
Tomai e Filifili ai ma lau Matafaioi e te Tali Atu Ai Mo oe Lava
Ia e filifili le amiotonu ma le fiafia, tusa lava pe o le a le tulaga e te i ai. O lou tiute le taliaina o taunuuga o au filifiliga. Atiina ae ou tomai ma taleni, ma faaaoga mo le lelei. Aloese mai le paie ma ia e naunau e galue malosi.
Loto Faafetai
Ia e maua se agaga o le faafetai i mea uma e te faia ma upu e te tautala atu ai. Faafetai atu i le Atua mo ou faamanuiaga, ma ia faaalia le agaga talisapaia i tagata e fesoasoani atu ia te oe.
Aoga
Sauniuni ina ia avea oe ma se faatosinaga mo le lelei i le lalolagi. Ia maua tulaga faaleaoaoga, ma ia naunautai e aoao. Ia e auai i le seminare.
Aiga
Fai lau vaega ina ia atiina ae ai se aiga fiafia. Ia e ava i ou matua, ma faamalolosia a outou fegalegaleaiga ma ou uso ma tuafafine.
O Uo
Filifili uo e tutusa mea tou te faatauaina. Ia agalelei ma faaaloalo i tagata uma. Ia valaaulia au uo mai isi lotu i a outou gaoioiga faale-Ekalesia. Aapa atu i uso fou faatoa liliu mai, ma i latou ua le toe toaaga mai.
Ofu ma Foliga Vaaia
Fai faalelei ou lavalava ina ia faaalia ai lou faaaloalo i le Atua ma oe lava. Aua lava nei tuuina i se tulaga maualalo le faiga o ou ofu mo soo se mea e fai. Aua le faaleagaina lou tino i le taina ai o pe’a po o le faapupuina foi e tatui ai meateutino.
Faafiafiaga ma ala o Faasalalauga
Filifili faafiafiaga e faagaeetia ai oe. Aloese mai soo se mea e faatufanua, e le mama, e faatupu vevesi, pe faatiapolo i soo se itu. Ia e faia se tautinoga e tausia tulaga faatonuina a le Atua.
Musika ma Siva
Faalogologo i musika e fesoasoani ia te oe e te latalata atili atu ai i le Tama Faalelagi. Aua e te faalogologo i musika e uunaia ai le ola le mama, faaviivii i faiga malolosi po o le faatupu vevesi, po o le faaaogaina foi o gagana mataga. A e siva, ia aloese mai le fepa’ia’i o tino po o ni taga e tosina ai amioga feusuai.
Gagana
Ia faaaoga le gagana e faagaeetia loto, faamalosiau, ma faamalo atu ai i isi. Ia faaaoga ma le migao ma le faaaloalo suafa o le Atua ma Iesu Keriso. Aua e te faaaogaina le palauvale, upu masoa, po o gagana ma taga faatufanua.
Tafaoga Faamasani
Aua e te faia ni tafaoga faamasani vagana ua le itiiti ifo i le 16 tausaga lou matua. Tafafao faamasani ma na o i latou e maualuluga o latou tulaga faatonuina. A amata ona e tafao faamasani, ia taitoatele pe o foi ma nisi paga taitoalua. Ia fuafua ni gaoioiga o le a fesoasoani ia te oe e tumau ai lou mafuta vavalalata ma le Agaga o le Alii.
Mama Atoatoa i Tulaga Feusuai
Ia tausisia oe lava i le mama atoatoa mai tulaga feusuai. Aua lava nei e faia ni sootaga feusuai ae e te le i faaipoipo. Aua nei e auai i ni talanoaga po o ni gaoioiga e faaosofia ai lagona feusuai. Aua nei e auai i ni gaoioiga faatauatane ma faatauafafine. Saili atu mo se fesoasoani pe afai ua aafia fua oe ona o faiga fai faamalosi po o le tosoteine, mataifale po o le toe ui o matua i fanau, po o isi faiga feusuai faatautala.
Salamo
O le Togiola a le Faaola, e mafai ai ona e maua le faamagaloga ma faamama ai mai au agasala pe a e salamo. Ia tautau atu au agasala e le aunoa i le Alii ma i latou ua e nofo sala ai. Afai e matuia au agasala, e tatau ona e tautau atu i lou epikopo.
Faamaoni
Ia e faamaoni ia te oe lava, o isi, ma le Alii. Aua nei e fetuunaia faapea e sao le le faamaoni.
Tausia o le Aso Sapati
Faaaoga le Sapati e tapuai ai i le Alii, auai i le lotu, mafuta ai ma lou aiga, ma fesoasoani ai i isi. Aua lava nei sailia ni faafiafiaga pe faaalu ni au tupe i le Sapati. Afai e mafai, ia aloese mai lou faigaluega i le Aso Sa.
O Sefuluai ma Taulaga
Ia totogi ma le naunautai se sefuluai atoa. Ia e auai i faatalanoaga o le sefuluai. Usitai i le tulafono o le anapogi.
Soifua Maloloina Faaletino
Ia tausia le Upu o le Poto. ‘Ai meaai e maua ai le soifua maloloina, ia faia e le aunoa faamalosi tino, ma ia lava lau moe. Aua le faaaogaina fualaau faasaina, o ava malolosi, kofe, lauti, po o mea e gaosia mai tapaa. Aua le faaaogaina ma le le tatau ia fualaau ma vai e tusia mai e fomai po o vai foi e mafai ona faatau e aunoa ma se pepa mai le fomai.
Auauna atu i Isi
Ia e auauna atu i isi i lou tofiga faale-Ekalesia ma lou aiga, o le aoga, ma le alalafaga. Saili atu i aso taitasi mo le taitaiga a le Agaga Paia, ia e iloa po o ai e auauna atu i ai ma pe faapefea foi ona taulimaina o latou manaoga.
Ia Agai i Luma ma le Faatuatua
Ia e faamaoni i le Alii ma Lana Ekalesia. Tatalo e le aunoa na o oe i se mea lilo ma faitau tusitusiga paia. Tausia au feagaiga ma faalogo i musumusuga a le Agaga. O le a fesoasoani atu le Alii ia te oe e faafetaiaia ou tofotofoga ma luitau.