O Le a Lelei Mea Uma
Tala lata mai: O le suesuega lata mai nei o Sister Coston, i le valu tausaga talu ona faailoa mai lona mai, ua faaalia ai le leai o ni faailoga o le kanesa.
Sa faatumuina ou mata i loimata ao ou agai atu i le falemai mo nisi foi suesuega. Sa faailoa mai ua ou maua i le kanesa i le maea ai o le fanau mai o lau tama teine i le lua tausaga talu ai. Sa faia lo’u taotoga ma faapea ona faia togafitiga, ma ua toeitiiti ona ou iloa lea po o aoga nei togafitiga. “Le Tama e o i le Lagi, ua ou aoaoina le tele o mea mai lenei aafiaga. Faamolemole, ia aveese atu lenei tofotofoga mai ia te au. Ou te manao ia tausi i la’u tama teine, ma ia auauna atu i se aso ma lo’u toalua i se misiona. Faamolemole, faamalolo au.”
Sa tafe ifo loimata i lalo i ou foliga. Sa faafuasei ona suia lau tatalo i upu o le pese “O Le Tatalo a se Tamaitiiti.”1 Sa i ai se mea sa faamalosia au ina ia faaleoina upu ae le na o le mafaufau i ai.
Ole ia te Ia;
Na te faafofoga.
Oe lona atalii;
E alofa ia te oe.
Na te faafofoga i au tatalo.
Sa oo mai se lagona maoae o le alofa i ou luga. Sa ou lagonaina e silafia au e le Tama Faalelagi ma o loo popole ia te au ma o loo faafofoga mai ia te au. Sa ou lagonaina o le a lelei mea uma.
Sa ou mauaina le taunuuga o togafitiga i le aso e sosoo ai. O suesuega sa faaalia ai ua leai ni faailoga o le kanesa. Sa ou lagona le aveeseina atu o se avega mamafa mai ia te au. Ae peitai, o le aso na sosoo ai, sa valaau mai ai lau fomai ma faamalamalama mai, e ui o faaiuga o suesuega ua i ai nei ua mama mai faailoga o le kanesa, ae o suesuega o le toto o loo faaalia ai o loo i ai pea gaoioiga e tele o le kanesa. “E faapefea ona i ai lena mea?” sa ou fesili ai. Afai o le mea moni lava lenei o loo tupu, aisea sa ou lagonaina ai ua taliina e le Tama Faalelagi la’u tatalo?
Sa ou taumafai e tuuese ou masalosaloga ao ou toe foi atu mo nisi suesuega. O le taunuuga o nei suesuega e le gata ua faaalia ai o loo maua pea au i le kanesa a ua faapea foi ona sosolo atu le kanesa i isi vaega o le tino. Sa le mafai ona aveesea lou toe tomanatu e uiga i le mea na ou aafia ai ao ou i ai i le taavale. Sa le mafai ona ou faafitia le mea sa ou lagonaina, ae peitai sa amata ona ou masalosalo i lau faaliliuga o ou lagona.
O nei faamatalaga fou ua matua mamafatu ma ua faatupuina ai se iloiloga loloto. Sa ou lagona o loo ou manaomia pea le aoaoina o se mea mai lenei tofotofoga. Ao ou mafaufau loloto i ai, sa ou iloaina o loo ou faia mea e aunoa ma le mafaufau i ai o se tagata toaga o le Au Paia o Aso e Gata Ai, ae peitai, ua ou faia mea ona o se amio masani ae le ona o le naunautaiga. Ou te le o i ai i se tulaga faaleagaga lea ou te manao e tatau ona ou i ai. E manaomia lou toe foi i mataupu faavae autu, o lea sa amata ai ona ou tulimataia vaega e mafai ona ou latalata ai ia Iesu Keriso. Ua ou manaomia Lona malosi ina ia ou gafatia ai ou tofotofoga.
Ao ou tuuina le tele o taumafaiga i mataupu faaleagaga, sa faateleina lou faatuatua ia Iesu Keriso ma Ana fuafuaga mo au. Sa ou iloa ai o lou aafiaga ao ou alu atu i le falemai, o se tali moni lava i le tatalo. Ao ou iloaina ma taliaina lena tali (o le a lelei mea uma), sa ou iloa ai o le Tama Faalelagi, e le masani ona ia faailoa mai po o afea o le a faataunuuina ai mea uma. Atonu o le a le faamaloloina atoatoa au faaletino, ae ua ou aoao ina ia talia Lona finagalo. E moni lava o lou ola o loo i Ona aao.
Ua fitu tausaga ua tea talu ona faailoa mai ua ou maua i le kanesa. Ua tele ou taotoga ma togafitiga ua faia, ae o loo maua pea au i le kanesa. Ae ui i lea, o le olaga e faaauau lava, ma ou te faafetai ai mo lena tulaga. I le i ai o ou tofotofoga ua oo mai ai faamanuiaga, e aofia ai ma se isi tama teine lona lua. Ae o le mea taua lava, o le tali a le Alii “o le a lelei mea uma” o loo faamafanafanaina ai pea au.