Kata o Fesili ma Kata Mo Le Malosi o le Autalavou

AISEA TATOU TE LE INU AVA MALOSI AI PE ULAULA?

Sa poloaiina e le Tama Faalelagi Lana fanau ina ia tausi faalelei o latou tino. E tatau ona tatou aai i meaai e maua ai le soifua maloloina, ia faia e le aunoa faamalosi tino, ma ia lava lau moe. Pe a tatou faia nei mea uma, ona tatou saoloto lea mai mea e fai ma mausa, ma tatou pulea lelei ai o tatou olaga. Tatou te maua faamanuiaga o se tino maloloina lelei, o se mafaufau mataala, ma le taitaiga a le Agaga Paia.

O le ava malosi ma le tapaa e faaleaga ai o tatou tino ma o tatou agaga. E matautia ma o le a faatamaia ai o tatou tino, faavaivai ai la tatou faamasinoga poto ma le loto pulea, ma faapuupuu ai le ola. Talu ai tatou te mananao ia tatou malolosi faaletino, faalemafaufau, ma le faaleagaga, ua tatou le inu lauti ai po o le kofe po o le soona faaaoga ma le le tatau o soo se fualaau oona po o vailaau.

O LE A SE MEA E SESE AI LE PALAUVALE?

O se tasi o Tulafono e Sefulu o loo faapea mai o le a le faasaoina e le Alii soo se tasi na te ta’u fua Lona suafa, o lea ua tatou faaaogaina ai suafa o le Atua ma Iesu Keriso ma le migao ma le faaaloalo. O le palauvale, upu masoa, po o gagana ma taga leaga, e faapea foi ma tausuaga eleelea, e le lelei i le Alii ma isi.

O lau tautala e tau atu ai lou ituaiga tagata. O se gagana mama ma le atamai, o se faailoga lea o se mafaufau matala ma le atoatoa lelei. Tatou te faaaogaina gagana e faamalosiau ma faamalo atu ai i isi ina ia mafai ai ona tatou faataunuuina le poloaiga ia fealofani. Tatou te faamalosiau atu i isi ina ia faaaoga foi gagana mama.

AISEA TATOU TE LE TAFAFAO FAAMASANI AI A O LEI ATOA LE 16?

O faiga uo e lelei tele, ae o le vave ona tafao faamasani e mafai ona taitai atu ai i le legavia, faaitiitia ai le tele o isi tupulaga talavou e te feiloai atu i ai, ma taofia ai oe mai aafiaga o le a fesoasoani ia te oe e filifilia ai se tasi o le a e faaipoipo atu i ai. E le faapea e tatau ona tafafao faamasani tupulaga uma pe faapea foi latou te mananao uma i ai. Ae peitai, tatou te mafaia ma e tatau ona atiina ae tulaga lelei faaleuo i vaitausaga uma taitasi.

A amata ona tatou tafafao faamasani, ia tatou tafafao faamasani i ni vaega e taitoatele ni paga e tafafao faatasi po o ni paga se toalua, ma fuafua gaoioiga e lelei, e le taugata, ma fesoasoani ia i tatou e iloa ai e le tasi le isi. O se alli talavou ma se tamaitai talavou e o i se tafaoga faamasani e tatau ona fesoasoani le tasi i le isi ia tausisia tulaga faatonuina ma puipuia le mamalu ma le mama o le tasi e le isi.

PE NI KERISIANO EA MAMONA?

Tatou te talitonu o Iesu Keriso o le Alo o le Atua ma o le Foafoa. A o soifua Iesu i luga o le fogaeleele, sa Ia soifua i se soifuaga atoatoa ma sa aoao atu e ala i fetalaiga ma faataitaiga i le ala e tatau ona tatou ola ai faatasi i le alofa. Tatou te talitonu e mafai ona faasaoina i tatou mai a tatou agasala e ala i le Togiola a Keriso a o tatou mulimuli ai ia te Ia.

I vaiaso taitasi i le lotu tatou te aai ai i le faamanatuga, tatou te faafouina la tatou folafolaga ina ia manatua pea o Ia ma tausi i Ana poloaiga.

Tatou te alolofa ia Iesu Keriso. Tatou te tapuai ia Iesu Keriso. O Ia o lo tatou Faaola ma le Togiola.