O Mai e Faalogo i le Siufofoga o se Perofeta
E Faapefea Ona Foai Atu
Mai le “Foai Atu ma le Olioli,” Liahona, Tes. 1996, 11–14.
O se aso o le taumafanafana. Na maliu lo’u tina i le aoauli. Sa matou agai atu ma lo’u tama, ma lo’u uso, agai i le fale mai le falemai, e na o matou lava e toatolu. Na vave lava le tapenaina o si a matou tamai meaai; ona matou talanoa ai lea ma e na asiasi mai. Ua fai si leva, ma ua oo mai le pogisa, ona ou manatua ai lea e lei kiina lava o matou moli.
Sa tali e Tama le logo i le faitotoa. O Aunty Katerina ma Uncle Pili. Sa mafai ona ou iloa atu le fagu sieli o loo uu mai e Uncle Pili. O loo mafai pea lava ona ou iloa atu sieli mumu, toetoe a lanu viole ma le tapuni iila o le fagu. Sa ia fai mai, “Atonu o le a outou fiafia i ai. Ailoga ua aia sa outou meaai suamalie.”
E leai. Sa matou nonofo i le laulau i le umukuka, asu ni sieli ia matou ipu, ma aai loa a o tapena ese e Aunty Katerina ma Uncle Pili ia ipu.
I se tulaga e aupito latalata e mafai ona ou tauina atu, o le foai atu ma le mauaina o se meaalofa sili, e tolu lava ona vaega. Ma o vaega la nei na faapupulaina mai e lena sieli na faameaalofa mai.
Muamua, ou te iloa na lagona e Uncle Pili ma Aunty Katerina le mea sa ou lagonaina ma faagaeetiaina ai. Atonu na la lagonaina ua matou vaivai tele ma o le a le mafai ona matou sauniaina ni mau meaai. Atonu ai na la lagonaina o se pesini o sieli e gaosia i le fale o le a matou lagonaina ai mo sina taimi o loo i ai so matou aiga. Ou te le manatuaina le suamalie o sieli, ae ou te manatuaina sa i ai se tasi na ia iloaina lo’u loto ma sa manatu mai.
Lona lua, sa ou lagonaina o le meaalofa e lei faatauina. Sa ou iloa na filifili lava Uncle Pili ma Aunty Katerina e aumai se meaalofa. Na foliga mai o le meaalofa sa maua ai e i laua le olioli i le foai atu.
Ma lona tolu, sa i ai se osigataulaga. Ou te iloa na tuuapa e Aunty Katerina na sieli mo lona aiga. Atonu latou te fiafia tele i sieli. Ae ua ia aveeseina mai lena fiafiaga mai ia i latou, ae aumai ia te au. O se osigataulaga lena. Ma na ou iloa mai ai lenei mea moni matagofie talu lena mea: na foliga mai sa sili atu le fiafia o Uncle Pili ma Aunty Katerina pe a ou aia ia sieli nai lo latou.
O meaalofa sili e tuuina atu e aofia ai mea e tolu: e te lagonaina le mea o loo lagona e le tasi, e te tuuina atu e aunoa ma se tau, ma e te faitauina le osigataulaga o se fetuutuunaiga.
Na auina mai e le Atua le Tama Lona Alo, ae tuuina mai e Iesu Keriso ia i tatou le Togiola—o meaalofa e le gafatia lona loloto ma lona tau mo i tatou. Na tuu mai e Iesu Lana meaalofa e aunoa ma le faalavelavea, ma le naunautai ia i tatou uma. O se tasi o faailoga moni o se tagata ua na taliaina le meaalofa o le Togiola a le Faaola o le naunautai lea e foai atu.