Mauaina o Lo’u Faatuatua
I le gasologa o le tele o masina, sa tele taimi na valaaulia ai au e faifeautalai ina ia ou papatiso, ae sa ou tali atu pea i ai e leai.
I se tasi po i le vaitaimi o lou tausaga muamua i le kolisi i le 1989–90, sa ma feala ai ma se tasi o au uo i le leva o le po e fai a ma meaaoga mo suega.
Sa faafuasei lava ona fesili mai Matt ia te au i se fesili ua faapea ona avea ma se taimi manino o lo’u olaga. “O le a se manatu o lau ekalesia e uiga i le Atua? O le uiga o la’u tala, o le a sou manatu e faape’ī Ona foliga?”
Sa leai sa’u tali mo ia. O lona faaaloalo i lo’u tulaga, sa ia suia ai ma le filemu le mataupu. Ae sa le mafai ona ou faagaloina. Sa ou i ai i se tulaga le mautu: o au o se Porotesano o loo auai i le Iunivesite o Polika Iaga, e ui sa i ai ni o’u masalosaloga e uiga i lo’u lava faatuatuaga ma la’u lotu i se tulaga lautele, ae sa le i ai so’u faamoemoega e suia la’u lotu. Nai lo lena, o le tausaga atoa lava sa ou faia ai ma le faaeteete se puipuiga faaleagaga mo au lava ia e ala i le teenaina o talanoaga faalelotu. Ae o lenei fesili faigofie, na mafai ai e la’u uo ona tatalaina se avanoa laitiiti i totonu o lo’u loto.
Sailiga mo le Faatuatua
I le tele o masina na sosoo ai, sa ou fesili ai pea ia te au lava ia, “O le a le mea ou te talitonu i ai? Ae o le mea na sili atu lona taua, pe ou te talitonu ea? Pe i ai moni ea se Atua, ma, afai e i ai, pe faapefea Ona foliga? Pe mafai ea ona ou iloa o Ia? Pe na te taliina ea au tatalo? Pe mafai ona ou maua le faatuatua e pei ona i ai i au uo o le Au Paia o Aso e Gata Ai?”
E le faapea e lei i ai se avanoa ou te manatunatu muamua ai i nei fesili ua tutupu ae; mo le tele o tausaga o nisi o au uo sili ona lelei o ni tagata o le AAG. O nei fefaauoaiga ua faapea ona taitaiina ai au ou te auai i le BYU. Ae e toetoe lava o le tele o taimi ou te teenaina ai a latou taumafaiga e faasoa mai le talalelei. O nai taimi laiti sa ou feiloai ai ma faifeautalai, sa ou le faalogo ma se mafaufau matala.
Sa ou fefe tele i ni suiga e ono manaomia, ni suiga e ono faaeseina ai au mai fegalegaleaiga po o lagona o lo’u aiga. Sa ou le manao ou te talitonu ua ou sese pe faapea ua le sao au tu ma aga masani. Sa ou le talitonu e mafai ona ou maua faaaliga mai le Atua pe mafai foi e isi ona latou mauaina. E foliga o se mea e le mausali, e le mafai ona lelei sona taunuuga, ma o se mea foi ua uiga ese, le faaali atu o le Atua i le taulealea o Iosefa Samita, o le a Ia faaalia mai ni tusitusiga paia fou, ma ua na o le tasi le lotu ua maua le taitaiga mai le lagi mo lona faavaeina e avea ma Ekalesia moni.
O le mea faigata, sa ou masalomia le moni o ekalesia uma, e aofia ai ma la’u lava ekalesia. E ui sa i ai lo’u agaga ua tumu i le alofa mo aiga ma uo, o se agaga sa faananau mo ni tali, ae a oo mai loa i musumusuga a le Agaga, sa ou le manao ou te taliaina.
Ina ua maea lo’u tausaga muamua sa ou toe foi i lo’u aiga i Kentucky ma faaauau ai la’u aoga. O au uo o le Au Paia o Aso e Gata Ai sa faapea ona malaga atu e auauna faamisiona, ma sa ou lagonaina le tiga o le tuua toatasi ona o lo latou toesea. Sa ou manao ina ia ou maua nisi o talitonuga lea sa musuia ai i latou e ofoina atu le lua tausaga o o latou olaga. Ae i le taimi lava lea e tasi, sa faaauauina pea ona faapopoleina au ona ou te lei mauaina lava se tali o le fesili a Matt. Sa ou manao ou te iloaina le mea moni mo au lava. Ae ui i lea, o le tele o tusi mai au uo ma faamalosiau mai ai au ia matou feiloai ma faifeautalai, sa ou faatoilaloina ai loa le fefe ma le faatuai ae taliaina loa.
Fuafuaina o le Liuaina
Ae ui i lea, sa i ai ni ou lagona le mautonu e faapea e uiga i le manatu o nisi mataupu faavae o le talalelei, e i ai ni fesootaiga e oo atu ai i se tuufaatasiga atoa. O faifeautalai sa talitonu o la laua savali, i lona aotelega, o le moni atoatoa po o le le moni atoatoa, pe a maua la’u molimau o se mataupu faavae e tasi, o le a mafai ona ou taliaina ai faasolosolo isi a la aoaoga uma.
Sa ou le talitonu ia i laua. Sa ou manatu e mafai ona talia le pikiina ma le filifilia o le mea ou te manao ou te talitonu i ai mai se ituaiga o lisi filifilia o mataupu faavae faaleagaga.1 I le taimi lava lea e tasi, sa fesiligia ai e lo’u talitonuga faalemafaufau o loo fesiliga ni faamaoniga e faavae i luga o ni mea na tutupu, ae le o se liliu e faavae i luga o le faatuatua.
Ae paga lea, o o’u manatu le faavaea na faapea ona tuua ai au i le le fiafia ma le le faamalieina. O finauga uma faafilosofia sa ou mafaufau i ai na avea o ni manatu feteenai le mautonu ua tuuina mai ai le leai o ni tali moni. Sa ou manaomia se mea e sili atu, se mea e fesootai ma lou fatu e pei o le ala sa faamatalaina mai e au uo ma faifeautalai i le fesootai ai ma le Agaga Paia. Sa ou auai i talanoaga ma faifeautalai ma le faamoemoe o le a ou ono maua ai le iloa o mea sa laua tauina mai e moni, po o le mea sili ona faatauvaa, o le mauaina lea o se faamalieina i le iloa ai e sese.
Sa onosai ma lototetele faifeautalai. I le gasologa o le tele o masina, sa laua aoaoina au i le tele o lesona ma valaaulia au i le tele o taimi ina ia papatisoina, ae sa ou tali atu pea i ai e leai. Sa ou faatali mo se mea iloga ma le ofoofogia e tuuina maia ia te au se molimau ae ou te lei naunau e talia la laua valaaulia. Sa ou le mauaina lena ituaiga o molimau, ma sa faaauau pea ona ou le taliaina la laua valaaulia.
I se tasi aso sa faitauina ai e faifeautalai se mau mai le Tusi a Mamona: “Aua le fefinauai ai ona ua le vaaia e outou, aua e le maua e outou se mau, seia uma le tofotofoina o lo outou faatuatua” (Eteru 12:6). Ona la fai mai ai lea, “Iosua, o taimi uma lava ma te valaaulia ai oe ina ia papatisoina, e te fai mai lava e leai. O le mea e tatau ona e faia o le fai mai ioe, ona faamaonia atu ai lea e le Agaga ia te oe.”
I se isi faamatalaga, ou te lei mauaina se molimau ona ou te lei tofotofoina lo’u faatuatua. Ou te lei mafaufau i le fesili atu, ma le talitonu o le a ou maua e aunoa ma le taumafai (tagai MFF 9:7). Sa ou mafaia lelei ona taofia le Agaga mai le mafai ai ona molimau ia te au talu ai ona o lo’u le naunau e laa atu i le isi sitepu. O le mea e tatau ona ou faia o le faia lea o se filifiliga i luga o le faatuatua ona maua ai lea o le molimau. O le faamaoniga o le molimau o le a oo mai pe a maea ona ou tofotofoina lo’u faatuatua, ae le o le maua muamua o se molimau.2
Sa ou mafaufau muamua lava ua taumafai faifeautalai e faatosina au ina ia ou papatiso. Ae sa oo mai ia te au i le taimi lava na ou tali atu ai e leai i le valaaulia mo le papatisoga, o se mea laitiiti lava sa tuua lo’u agaga. O se lagona toafilemu, malie, ma le itiiti o le filemu ua faamalosiau mai ia te au ia mulimuli i le fautuaga a faifeautalai, ae ou te lei lagonaina lona faatasi mai sei vagana ai ua alu ese atu, ma tuua ai au ma le le mautonu, lē fiafia, ma le faanoanoa.
Sa ou mafaufau pe o lea lagona tau le iloa o le Agaga ua tuua au ma pe o le mafuaaga lea o lo’u le mautonu ona o lo’u loto le talitonu ua tuleieseina o Ia. I le leai o se isi auala, sa ou filifili ai e faataitai le lu’i a faifeautalai. O le a ou tali atu ioe i le valaaulia le maalofia, ma afai o le a ou lagonaina le Agaga e pei ona laua folafolaina mai ia te au, o le a ou faataunuuina le papatisoga. Ae i le isi itu, afai ou te le lagonaina le Agaga, ua ou saunia lelei lava e ta’u atu i faifeautalai ua na o sa’u mea ula.
Suesueina o le Fatu
O le afiafi o le isi a matou feiloaiga sa matou matamata ai i le vitio fou a le Ekalesia, O Le Atalii Faamaumau Oa. Sa i ai se lagona faapitoa i totonu o le potu; sa matuai ootia lava faifeautalai, sa lilofia o la fofoga i o la loimata.
Ina ua maea le ata, sa matou faitauina nisi o mau mai tusitusiga paia. Sa faapea loa ona liliu mai Elder Critchfield ia te au ma fesili mai, “Iosua, pe mafai ona e papatiso i le Aso Toonai, 10 o Novema, i le 4:00 i le afiafi?”
Sa ou faatuatuai ona ou tali atu lea, “Ioe.”
Sa taia au e le Agaga i se tulaga malosi lea sa pei ai e mogea uma lo’u tino, ma na toeitiiti lava o’u tagi. Sa le mafai ona toe i ai lava se masalosaloga ua oo mai se molimau e aveesea lo’u le talitonu. Sa ou tofotofoina lo’u faatuatua, ma sa ou iloa e aunoa ma lo’u masalosalo ua tatau ona ou papatiso.
Ua ou mauaina se molimau o le lelei o le fatu e tasi o le faatuatua, ae ou te lei vaai ua tupu ma fua mai (tagai i le Alema 32:35–36), ma ou te lei mauaina foi se faamaoniga o ni molimau o isi mataupu faavae o le talalelei. E lei maea ou tofotofoga o le faatuatua.
E lei leva ona uma ona ou papatiso ma faamauina, ae tutupu mai ni masalosaloga i lo’u mafaufau. Sa ou lagonaina le feteenai o le aafiaga patino sa ou mauaina ina ua ou filifili e papatiso ma ou mafaufauga tuai, lea e le taliaina ai le faatuatua e faalagolago i le atamai.
E lei umi ae ou toe lagonaina le lagona sa oo mai soo o le le mautonu ma le faanoanoa, ma ua ou le iloa po o fea e talitonu i ai. Ae ui i lea, sa ou faia se tautinoga, ma sa ou naunautai ina ia ou tumau i le Ekalesia ma faaaoga mataupu faavae sa aoaoina ai au, seia oo ina ua foia e le tofotofoina o lo’u faatuatua ou feteenaiga i se auala po o se isi mea.
Mauaina o Lo’u Faatuatua
E lei tuuina au e le Alii ou te feagai na o au ma ou tofotofoga. Sa tuuina mai se valaauga e auauna faatasi ma faifeautalai, ma sa matou o e talai i vaiaso taitasi, ma o faifeautalai sa faaauau ona aoaoina au. O ou faiaoga o aiga sa faatuatuaina. O lau soa o faiaoga o aiga sa toaga ma tumau. O le toatele o tagata o le uarota sa atiina ae ni faigauo ma au e ala i lo latou faaaofiaina o au i o latou olaga, i le valaauliaina ai o au i o latou aiga mo ni taumafataga o le afiafi ma afiafi faaleaiga. Sa latou tatalo faatasi ma au, ma sa tatalo foi mo au. Sa vaai au e le epikopo ma lona aiga ma latou faamalosiau mai ia te au. Sa ou iloaina le faamaoni o faamoemoega o o latou loto, ma o na tulaga sa faamalosia ai lo’u taumafai.
I se tasi aso, i le tuanai ai o ni nai masina, sa ou iloa ai o taimi uma lava ou te faitau ai i le Tusi a Mamona, ou te faalogoina ai se lagona itiiti, se lagona masani o le filemu, lea sa pei ona ou lagonaina i taimi o lesona ma valaaulia o le papatisoga. Sa ou mauaina se lagona faafuasei o le manino: o le Agaga lenei. Ao ou mafaufau i upu—“Afai o le Agaga lenei, o lona uiga o lenei tusi e tatau ona moni”—o lena lagona itiiti sa tupu i totonu o lo’u loto, ma o lo’u faatuatua ua liliu atu i le malamalama faaleagaga o lena mataupu faavae.
A o faaauau ona maua e lo’u loto le “momomo” ma lo’u agaga ua faateleina le “salamo,” sa faapea ona mulimuli mai ai ma isi aafiaga faamaonia (tagai Eteru 4:15). Na oo mai le taimi na suia ai ou masalosaloga i le talitonu. Ua ou iloa o loo soifua le Atua, o Iesu o le Keriso, o Iosefa Samita o le perofeta a le Atua, e le ona o lo’u lava atamai po o se faatosinaga a nisi, ae ona o le faatasi ai ma le le teena o le Agaga ua talanoa mai i lo’u agaga. O le fuaiupu ma le fuaiupu ua matala i lo’u mafaufau (tagai 2 Nifae 28:30). A o atiina ae nei aafiaga faamaonia o le tasi i le isi, sa faalauteleina lo’u malamalama o le talalelei, ma na vave oo mai lo’u malamalama faaleagaga. O nei aafiaga taitasi e manaomia ai le maumaututu, o le naunautaiga e faalogo ma mulimuli, ma le naunautai e usitai i le musumusuga a le Agaga (tagai Mosaea 3:19).
E mafai ona ou fai atu i le taimi lenei e moni le talalelei, ona ua ou aoaoina lenei mea mo au lava. Sa i ai se taimi sa foliga mai ai le talalelei e ese ma lē mautonu; o lenei ua masani i ai ma ua matagofie ia te au. O mataupu faavae o le talalelei ua faapea lava ona fesootai uma i se tulaga atoa e tasi. E ui lava e laitiiti le malamalama i mataupu faavae, ae o le avea ai o se faifeautalai e mafai ona ou molimau atu i le moni o nei mea. Ao faalauteleina lo’u malamalama i mataupu faavae, o le a faapena foi ma la’u molimau.
O la’u molimau i mataupu uma o le talalelei e galue ma le faaeteete ma faafaileleina pea mo le puipuiga e faasaga i faafitauli. E lagolagoina au i taimi o luitau ma te fetaiai, aemaise lava taumafaiga leaga a le na te luluina fatu o le masalosalo e uiga i mea ua uma ona ou maua i ai ni tali (tagai MFF 6:22–23). Pe a ou lagonaina le vaivai, pe a oo mai le masalosalo, pe a oo mai tiga, ou te faaaogaina lava le alafua e tasi lea sa maua ai fua mai le aso muamua sa ou mauaina ai se molimau: ou te toe tomanatu i aafiaga taitasi sa ou maua i le fausiaina o lau molimau, ou te faateleina au taumafaiga o le faatinoina o mataupu faavae sa aoaoina ai au, ma ou faalogo ma le totoa ao toe faamautuina mai e le Agaga lo’u faatuatua.
E moni le talalelei, o mea uma lava, ma o loo matala ia i latou uma e mafai ai, i le maualalo o o latou loto, ia tofotofoina lo latou faatuatua e ala i le laasiaina lea o le sitepu o le faatuatua i faigata. O le malamalama o le Alii o loo i ai iina, o loo natia i lo tatou le naunautai e sailia. Atonu o le a i ai le tele o taimi faigata i o tatou olaga po o taimi e luitauina ai a tatou molimau. Ua ou mauaina o loo faatalitali mai le malamalama o le Faaola ia i tatou pe a tatou naunautai e saili atu ia te Ia, ma o lena malamalama, pe afai tatou te sailia pea, o le a taitaiina atu ai i tatou i le liua.
FAAMATALAGA
1. Tagai Glenn L. Pace, “Mulimuli i le Perofeta,” Ensign, Me 1989, 26.
2. Tagai Boyd K. Packer, “O Le Tusi a Mamona: O se Tasi Molimau ia Iesu Keriso—O Mea Malamalama ma le Taua,” Liahona, Me 2005, 8.