Manatu Faaopoopo mo Taimi o Fetufaaiga, Oketopa 2008

O manatu faaopoopo nei e mafai e taitai o le Peraimeri ona faaaogaina faatasi ma le Taimi o Fetufaaiga o loo lomia i le Liahona o Oketopa 2008. Mo le lesona, faatonuga, ma le gaoioiga e o faatasi ma nei manatu, tagai “O Le A Avea Au ma Ana Auauna” i le itulau U4 ma le U5 o le vaega a tamaiti o le lomiga lenei.

A o lei oo i le taimi o fetufaaiga, aumai ni ata o le Au Peresitene Sili ma le Korama a Aposetolo e Toasefululua o loo i ai nei. Tuu ata i luga o le laupapa sioka po o le laupapa paepae. Fai ni fasipepa o o latou igoa, ma tuu i autafa o le laupapa.

Amata i le fesili atu i tamaiti e faafetaui igoa o le Au Peresitene Sili ma le Korama a Aposetolo e Toasefululua ma o latou ata. Fesoasoani i tamaiti e tuu ia ata i le faasologa sao o valaauga ma le umi i tofiga.

Mai le konafesi aoao aupito lata mai, pe mai isi lomiga o le Liahona, filifili ni saunoaga mai le Au Peresitene Sii ma le Korama a Aposetolo e Toasefululua o loo faapea ona taulai atu i le auauna atu. Ia fefaasoaai i nei savali ma talanoa i ni auala e mafai ai e tamaiti ona faatatau mea ua latou aoaoina e fesoasoani ai ia i latou a o latou auauna atu i isi. Tagai i le Mataupu Faavae ma Feagaiga 4:2 e faamanatu atu ai i tamaiti ia tatou auauna atu ma o tatou loto atoa, manatu atoa, mafaufau atoa ma le malosi atoa. Usu se pese po o se viiga e uiga i perofeta. Ia molimau atu e uiga i faamanuiaga o le i ai o perofeta, tagatavaai ma talifaaaliga, o e aoaoina i tatou e ala i a latou upu ma a latou faataitaiga o le auala e auauna atu ai le tasi i le isi.
Tusi le mataupu faavae o le talalelei faalevaiaso i le pito i luga o le laupapa: “Talu ai o loo auauna mai isi ia te au, o lea ou te manao ai foi e auauna atu.” Ia tofi tamaiti e usu ni pese e iloa ai poo ai e auauna atu i ai. Ona tuu atu lea ia i latou e usu ni pese po o viiga e uiga i le Faaola, perofeta, aiga, uo ma isi lava. Fai se lisi o i latou na ta’ua i pese po o viiga i lalo o le fuaitau Talu ai o loo auauna mai isi ia te au.

Faatusatusa le Mataupu Faavae ma Feagaiga 4:2 ma le 59:5. Fesoasoani i tamaiti e sue ia upu loto, manatu, mafaufau, ma le malosi i mau uma ia. Ia faailoa atu e tatau ona tatou alolofa ma auauna atu i lo tatou Tama Faalelagi faapea ma isi, ma o tatou loto, manatu, mafaufau ma le malosi atoa. Ia saunia mea e manaomia mo tamaiti e faauma ai le telefoni feaveai o loo i le itulau U4.

A uma ia telefoni feaveai, fai i tamaiti e usu ni pese e iloa ai auala e mafai ona latou auauna atu ai. Ona usu lea o ni pese po o viiga e uiga i le auauna atu. Tusi tali latou te mauaina i pese ma viiga i lalo o le fuaitau ou te manao ai foi e auauna atu. Molimau atu e uiga i faamanuiaga e oo mai mai le auauna atu i isi ma mai isi e auauna atu ia te oe.