TALA PUPUU O LE LALOLAGI

Aulotu Lona 100 a le AAG ua Faatuina i Taiwan

I le sosoo atu ma le faatulagaina o le Paranesi a Mingchien ia Me 2008, ua atoa nei le 100 o aulotu a le Ekalesia i Taiwan. O Mingchien o se taulaga laitiiti lava i le ogatotonu o Taiwan. O iunite e 100 ua tautuaina ai le faitau aofai o tagata o le ekalesia lea ua lata atu i le 50,000.

Na taunuu atu uluai faifeautalai i le faaiuga o le vaitaimi o le 1950, ma sa masani ona tofia ia faifeautalai e taitai i aulotu. O le taimi nei o taitai e le totogia e o mai mai tulaga o tagata i le lotoifale.

Faatalanoaga ma le Au Faasalalau i Farani ua Fausia ai Sootaga, Faasalalau Atu ai le Talalelei

Na faatulaga e taitai o le siteki i Lyon, Farani, se faatalanoaga ma le au faasalalau e uiga i vaega fou o le FamilySearch. Sa latou faaaogaina le fuafuaga i le aso 13 o Me, 2008, e aumaia ai aoaoga faavae o le Ekalesia ina ia iloa e le au tusitala i le lotoifale faapea ma taitai o alalafaga a o latou faamatalaina le taua o talafaasolopito o aiga i olaga o tagata o le Ekalesia ma le mataupu faavae o aiga e faavavau. “Sa matuai fiafia lava i ai i latou na auai ai,” o le tala lea a Daniel Mocellin, o le peresitene o le Siteki a Lyon Farani.

Maua Tusitusiga Paia Fusitolu a Tanisi, Take ma Hanikeri i le Initoneti

Ua maua nei lomiga o tusitusiga paia fusitolu a Tanisi, Take ma Hanikeri i le initoneti i le http:// scriptures.lds.org. O le tusi fusitolu i le initoneti o loo maua ai faamatalaga pito i lalo, fesoasoani mo suesuega, faafanua, ma ata, ma le mafai e faailoga ai mau. Ina ia fesoasoani atu i ni tagata se toatele ia maua ia tusitusiga paia, na tuuina muamua ai e le Ekalesia i le initoneti ia lomiga o le tusi fusitolu i le faaPeretania, Farani, Siamani, Italia, Potukale ma le faaSipaniolo. O loo faaliliuina i le taimi nei ia tusitusiga paia a le AAG mo le faaaogaina i le initoneti i gagana e silia ma le 24.

Faaalu e le Aualofa le Faaiuga o le Vaiaso e Auauna Atu Ai

Na faaaluina e le Aualofa a le Siteki a Fountain Colorado i Colorado Springs, Colorado, ISA, le faaiuga o le vaiaso lona lua o Me i le iliina, sanipepaina, suiina, ma le auauna atu. Ina ua uma ona foai atu ni toto i le fale tuitoto i le lotoifale, ona tuufaatasia lea e uso o le Aualofa ni afifi se 200 ma nonoalima ni palanikeke mafanafana se 40 mo le Koluse Mumu i le lotoifale.

Sa latou foai atu foi le silia ma le 500 o poloka laupapa meataalo, 25 ie soosoo, ma pepe meataalo e 82 i le Nofoaga Autu o Fesoasoani Alofa a le Ekalesia faatasi ai ma ni aitema se 187 o lavalava fou.

Mo faamatalaga e uiga i le foai atu i le Auaunaga o Fesoasoani Alofa, asiasi i le www.lds.org/ humanitarianservices pe telefoni i le 1-801-240-5954.