O Le Faatuatua e Taofia ai se Lolovai
O se aso o le tau totogo i Helsinki, Finelani. Sa susulu malosi le la, ma sa vave ona liusuavai le kiona. Mo ni itula sa matou galulue ai ma la’u fanau tama, o Juha e valu, ma Hannu e ono, e taumafai ia taofia le kiona ua liu suavai ina ia le lolovaia ai le potu pito i lalo o le matou fale. O le alavai lea e tatau ona tafe i ai le vai o loo matua malo lava i le kiona.
Ina ua alu lo’u toalua e faigaluega i lena taeao, sa ia fai mai ia i matou ia mautinoa ua matou taofia le vai mai le oo atu i le potu pito i lalo. Sa matou galulue malosi seia oo i le aoauli, ina ua oo i le taimi e o atu ai i le Peraimeri. (I na vaitaimi sa fai ai Peraimeri i se aso o le vaiaso.) Ae peitai, sa ou fai atu i la’u fanau tama o le a la misia le Peraimeri ina ia laua fesoasoani e taofia le vai mai le tafe atu i totonu o le potu pito i lalo. E le gata i lea, o lo’u toalua e le o se tagata o le Ekalesia, ma e le malamalama o ia po o le a le taua o le Peraimeri i le ma fanau tama.
I lo la fai mai uma i le taimi e tasi, sa faamautu mai ai e Juha ma Hannu ia te au afai matou te o i le Peraimeri, o le a faamautinoa e le Tama Faalelagi ia le oo atu le vai i le potu pito i lalo. Sa ou vaai atu i le isi itu ma le isi itu, i le faaputuga vai faapea foliga faatumuina i le faatuatua o la’u fanau tama. Sa faapea mai se vaega o lo’u tagata, “E le mafai ona e alu aua e leai se malosi e mafai ona taofia le vai mai le tafe atu i le potu pito i lalo.” Sa ou ole atu i le Tama Faalelagi ma le tatalo i totonu o lo’u loto. Ona ou faia loa lea o se filifiliga faigata.
“O le a tatou o atu i le Peraimeri i le taimi nei!” sa ou faailoa atu ai ao ou tuuina i lalo le pakete. Po o le a lava le mea e tupu, o le a ou le faia se mea e faamanu’a ai le faatuatua o la’u fanau.
Sa matua fiafia la’u fanau tama i le Peraimeri. Ae, a o matou agai atu i le fale ina ua uma le Peraimeri, o lo matou latalata atu lava i le matou fale, o le faateteleina foi lena o lo’u fefe. Ina ua matou taunuu i le lotoa, sa tamomoe faavave atu la’u fanau tama i le faitotoa o le potu pito i lalo. I le vaai atu ai i lalo, sa laua tauvalaau mai ai ma le fiafia, “Tina, o le a le ma tala na fai atu ia te oe?” Sa ou faateleai atu i ai. E le mafai ona ou faagaloina le vaaiga sa vaai i ai ou mata. Sa matuai matutu lelei lea vaega atoa, e foliga sa solo faamago e se isi. Sa leai se foliga o se vai i soo mea. E oo mai lava i lenei taimi, ua 40 tausaga talu ai, o loo faigata ia te au ona talitonu i le mea sa ou vaai i ai.
O le malamalama na susulu mai i foliga o la’u fanau tama sa faaalia ai le fiafia ma le faatuatua i le Tama Faalelagi. Fiafia—ma le loto faafetai—sa faatumuina ai foi lo’u loto!
E leai se malosi i le lalolagi e mafai ona faatoilaloina le faatuatua o se tamaitiiti. O loo faapea mai tusitusiga paia afai tatou te talitonu ma le leai o se masalosalo, e mafai ona tatou aveesea mauga (tagai Mataio 17:20). O lena aso, o le malosi o le faatuatua o la’u fanau na taofia ai le lolovai.