Savali a Faiaoga Asiasi
O Le Kenera (Tulaga Tane po o le Fafine o le Tagata) o se Uiga Moomia mo le Faasinomaga ma le Faamoemoega e Faavavau
Ia aoao atu mau ma upusii e fetaui ma manaoga o uso o loo e asia. Ia molimau atu e uiga i le aoaoga faavae. Ia valaaulia i latou o loo e aoaoina e faasoa mai o latou lagona ma
mea ua latou aoaoina.
O Le Au Peresitene Sili ma le Korama a Aposetolo e Toasefululua: “O tagata soifua uma—tane ma le fafine—ua foafoaina i le faatusa o le Atua. O i latou taitoatasi o se atalii po o se afafine faaleagaga faapelepele a ni matua faalelagi ma, o lea ua tofu ai i latou taitoatasi ma se natura ma se taunuuga paia. O le tulaga tane po o le fafine (o le tagata,) o se vaega taua lea o le muai olaga, olaga faitino, ma lona faamoemoe e faavavau” (“O Le Aiga: O Se Folafolaga i le Lalolagi,” Liahona, Oke. 2004, 49).
Aisea e Taua ai le Kenera?
Elder David A. Bednar o le Korama a Aposetolo e Toasefululua: “O le [Kenera] i se tulaga aoao, e faamanino ai pe o ai i tatou, pe aisea ua tatou i ai i lenei lalolagi, ma pe o le a foi le mea e ao ona tatou faia ma avea ai. Mo faamoemoega paia, o agaga tane ma le fafine e eseese, e tulaga ese, ma e faafeagai ma fetaui lelei… . O le tuufaatasiga tulagaese o malosiaga faaleagaga, faaletino, faalemafaufau, ma lagona o le tane ma le fafine, sa manaomia ina ia faataunuuina ai le fuafuaga o le fiafia” (E Taua le Faaipoipoga i Lana Fuafuaga Faavavau,” Liahona, Iuni 2006, 51).
Julie B. Beck, peresitene aoao o le Aualofa: “Ina o avea ma afafine agaga o le Atua, ‘sa aoaoina i latou i a latou uluai lesona i le lalolagi o agaga ma saunia e o mai’ (MFF 138:56) i le lalolagi. O i latou o nisi o ‘tagata tautaua ma le maoae’ (MFF 138:55) sa ‘alalaga fiafia’ (Iopu 38:7) i le foafoaina o le lalolagi, aua o le a latou maua ai o latou tino faitino faatasi ai ma le avanoa e faataitai ai i se lalolagi faitino (tagai Aperaamo 3:25). Sa latou moomoo e galulue faatasi ma alii amiotonu, e faataunuu sini e faavavau, ia e le mafai ona maua taitoatasi. E lei amataina le matafaioi a tamaitai i le lalolagi, ma e le muta ai foi iinei. O se tamaitai na te faatauaina le tulaga faatina i le fogaeleele, o le a ia faatauaina foi le tulaga faatina i le lalolagi a sau” (“O Se ‘Fatu Faatina,’” Liahona, Me 2004, 76).
O Le a Le Mea e Mafai Ona Ou Faia Ina ia Faataunuu ai La’u Matafaioi i le Fuafuaga a le Tama Faalelagi?
Margaret D. Nadauld, sa avea muamua ma peresitene aoao o Tamaitai Talavou: “O tamaitai o le Atua e le mafai lava ona faapei o tamaitai o le lalolagi. Ua lava tamaitai i le lalolagi e malovale; tatou te manaomia ni tamaitai e agavaivai. Ua lava tamaitai e amio paaa; tatou te manaomia tamaitai agalelei… . Ua lava tamaitai ua lauiloa ma mauoa; tatou te manaomia ni tamaitai faatuatua” (O Le Olioli i le Tulaga Faatamaitai,” Liahona, Ian. 2001, 18).
Elder M. Russell Ballard o le Korama a Aposetolo e Toasefululua: “O natura i le muai olaga ma le olaga faitino o tane ma fafine, na faapatino e le Atua lava Ia… . [E afua ona fesili tamaitai i nisi taimi]: ‘Pe o le faatauaina ea o le fafine e faalagolago atoa lea i lana matafaioi o se ava ma se tina?’ E faigofie lava le tali ma manino: E leai… . E tofu lava alii ma tamaitai amiotonu ma se matafaioi e faatatau i le faatupulaia pea o le malo o le Atua… .
“… Ou tuafafine pele e, matou te talitonu ia te outou. Matou te talitonu i lo outou lelei, ma o loo faamoemoe foi i lo outou lelei ma lo outou malosi, … Ma ua matou talitonu foi o le fuafuaga a le Atua, e mo outou ia avea ma masiofo ma ia mauaina faamanuiaga aupito maualuluga e mafai ona maua e se tamaitai i le olaga nei ma le faavavau” (“O Tamaitai o le Amiotonu,” Liahona, Tes. 2002, 36–37).