MANATU MO AFIAFI FAALEAIGA

O nei fautuaga faaleaoaoga e mafai ona faaaoga i potuaoga faapea foi i le aiga. E mafai ona e fetuunaia nei manatu ina ia fetaui i lou aiga po o lau vasega.

“Mauaina o Lo’u Faatuatua,” i. 8: Talatalanoa po o le a le uiga o le molimau. Faamatala le tala ia Iosua. Faitau le Eteru 12:6, ma fesili po o le a le uiga ia te ia o lea mau. O faapefea ona tofotofoina lo tatou faatuatua ina ia faatupuina ai a tatou molimau? Sa faapefea ona faateleina le faatuatua o Iosua ina ua maea lona papatisoga? Valaaulia tagata o le aiga ina ia fetufaai a latou molimau.

“O Auala e 18 e Tulai Malosi Ai,” i. 25: O lenei tala e mafai ona faaaogaina mo le tele o nisi afiafi faaleaiga. Ia tusia tulaga faatonuina e 18 i ni fasi pepa. Ia sei se fasi pepa se tasi, ma faitau lena vaega o le tala. Ia talanoaina pe faapefea ona faatatau le tulaga faatonuina i lou aiga. Ona toe sei lea o se isi fasi pepa, ma faaauau ai pea le faiga lea i le umi e manaomia ai. Ia faamamafa atu le taua tele o nei taiala mo le olaga. Ia faia se sini ina ia mulimuli i fautuaga o loo tuuina mai ai. Ia faaiu i le faitauina o le vaega “Ia Agai i Luma ma le Faatuatua.”

“Ia Faaeteete i Solofanua Laupapa,” i. 38: O loo nanaina e Satani le tele o solofanua laupapa i o tatou aso nei. Faitau le tala i le solofanua malosi mai le tusiga, ma mafaufau i le faaaogaina o tusi, musika, ma ata o loo i totonu o lou aiga. Ia faia se taaloga e faaigoaina “Pe Mafai ona Faasaoina Lenei Mea?” Ia faasaoina na o musika ma tusi e mama, matagofie, logoleleia, ma tauleleia (tagai Mataupu Faavae o le Faatuatua 1:13). Ia faaiu i le faitauina o le Mosaea 5:15 ma le Mataupu Faavae ma Feagaiga 45:32.

“Fesoasoani ma Ia Fiafia,” i. U10: Ia avea lenei avanoa e faailoa atu ai pe faaauauina ai se siata o galuega e fai a lou aiga. Ia lisiina nisi o galuega (e talafeagai ma tausaga o le fanau), ma fai atu i tagata taitoatasi ina ia filifili se galuega e tasi e faia. Faitau le tala, ma faamatala pe aisea e taua ai mo tagata taitoatasi ona fesoasoani atu. Ia faia se sini ina ia auauna atu i isi i le vaiaso a sau.

“Saunia mo se Misiona,” i. U14: Fai atu i lou aiga e faalogologo mo auala na saunia ai Elder Ulisses Soares mo lana misiona. Faitau le fautuaga sa tuuina atu ia te ia e lona epikopo. Ia talanoaina ia auala e mafai ai e tagata taitoatasi o le aiga ona saunia e avea ma faifeautalai.