Taimi o Fetufaaiga
O Le a Avea Au ma Ana Auauna
“O le mea lea, o outou o e o atu i le galuega a le Atua, ia outou auauna atu ia te ia ma o outou loto atoa, ma mafaufau atoa, manatu atoa, ma le malosi atoa, ina ia mafai ona outou tutu ma le le pona i luma o le Atua i le aso gataaga” (MFF 4:2).
Sa alu atu Amona o se faifeautalai maoae o sa Nifae, i le aai o sa Lamana ina ia “talai atu le afioga a le Atua” (Alema 17:12). Ina ua taunuu atu Amona i le aai, sa saisai o ia e sa Lamana ma aveina atu o ia i le tupu. Sa fesili atu le tupu ia Amona pe manao e nofo ai i le aai. Sa talosaga atu Amona i le tupu pe mafai ona avea o ia ma ana auauna.
Sa auauna Amona ma lona loto, mafaufau, manatu, ma le malosi atoa i le tupu. Sa ia faaali atu le alofa i tagata. Sa ia faaaogaina lona malosi e puipuia ai mamoe ma auauna a le tupu. Sa ia faaaogaina lona mafaufau e aoao ai le talalelei ma faasoa atu i le tupu. Sa ia faaaogaina lona malosi ina ia tumau ma mausali i le ola ai i le talalelei. (Tagai Alema 17–18.)
O upu o le pese a le Peraimeri “O Le a Ou Lototoa” (Tusi Pese a Tamaiti, 85) e faamanatu mai ai ia i tatou ia avea faapei o Amona.
E manaomia e le Alii,
Ni ana auauna totoa,
O e mulimuli ia Iesu,
Ma auauna ma le alofa,
E mafai ona tatou aoao e auauna atu i isi e pei ona faia e Amona. E mafai ona tatou faaali atu le alofa ia i latou o loo tatou faatasi, aemaise lava o tatou aiga ma uo. E mafai ona faaaoga lo tatou malosi e faia ai mea lelei, e pei o le agalelei po o le fesoasoani. E mafai ona faaaoga o tatou mafaufau e aoao ai le talalelei e ala i le faitauina o tusitusiga paia ma faalogo i o tatou matua ma faiaoga. E mafai ona tatou filifili e tumau ma mausali i le faia o le mea e sao.
O le a ou auauna,
Ma tausi poloaiga
Ou te tau mo le mea tonu,
O lou Alii Iesu.
Gaoioiga
Ia ‘oti’oti lio nei pei ni polo lakapi, ma faapipii faatasi feuai ia pito i tua. Ia ‘oti faatafafa e fa, ma gaugau faa’afa, ma faapipii pito i tua ina ia maua ai ni sikuea. ‘Oti le lio faalapotopoto mo le pito i luga o le telefoni feaveai ma faia ni pu e pei ona faaalia atu. Faapipii se ata pe tusi sou lava ata i totonu o le faavaa faataliolio. Ia faia se pu i le pito i luga o le faavaa o le ata faataliolio ma sikuea taitasi e fa. Faaaoga se manoa po o se vulu e faaatoatoa ai le telefoni feaveai. Faatautau le telefoni i se mea e faamanatu ai ia te oe ia auauna i le Alii ma isi.