O Le Lomiga o Mati 2008: O Se Lipoti

Lua tausaga i le fuafuaina ma le gaosiga.

E silia ma le 2.3 miliona kopi e tufatufaina i gagana e 51.

E lua isi lolomiga faaopoopo e moomia ina ia taulimaina ai le mananao [o tagata].

E silia i le 340,000 tagata asiasi i le Uepi Saite faapitoa.

E ui i se lelei e pei ona i ai, ae o fuainumera e le faamatalaina ai le tala. O le taua o le lomiga o Mati 2008 o le mekasini o le Ensign ma le Liahona, “O Le Alii o Iesu Keriso,” e pau lava le ala e iloga ai, pe afai lea e vaaia e se tasi ia aafiaga i olaga o tagata.

I se Tulaga Patino

O le valaaulia e faasoa mai lagona ma aafiaga i le lomiga o Mati 2008, ua toatele ai tagata o le ekalesia na tusi mai e faamatala mai le ala na aafia ai o latou lava olaga. Mai Filipaina, na tusia ai e Maria Felina Ferrer: “Mo le taimi muamua lava i le 29 tausaga ua ou ola ai e tautala ma tusitusi e uiga ia te Ia, ua ou lagonaina le moni aiai o le Faaola i lo’u olaga. O Ia ua le na o se autu, ua le na o se tala. E moni o Ia… . Na afua ai se suiga maoae ia te au. Soo se mea ou te alu i ai ma soo se mea ou te faia i le taimi nei, ua ou [manatunatu] totoa ai i le Alii o Iesu Keriso, i Lona mana uma, e iloa ai au ma o loo tu mo au. O lena mea moni ua ou manao ai e avea o se tagata e sili atu le lelei.”

Fai mai Tom Kunz o Magnolia, Texas, ISA: “Sa ou lagonaina lava le fiafia tele ina ua uma ona ou faitauina le mekasini ma sa ou manao ai ia sili atu lo’u lelei i itu uma o lo’u olaga… . Na ou lagonaina le alofa o le Faaola mo au ma le matagofie o le Togiola i se auala e sili ona patino.”

Faasoa Atu i Isi

Sa o Linda Buysse-Vergauwen, o le o loo faiaoga i le aoga tulagalua i Peleseuma, ma sana uo i se malaga suesue ma sa ia tuuina atu ai ia te ia se kopi o le lomiga o Mati, faatasi ai ma se faamatalaga faapitoa ma se valaaulia e sau e faalogologo i lana tautalaga i le Aso Sa o le Eseta. Na sau le uo ma maua ai se aafiaga lelei. “O le lomiga faapitoa o le Liahona na ou maua ai le avanoa e tuu ai si fatu itiiti i le loto o la’u uo,” o le tala mai lea a Sister Buysse-Vergauwen.

I Kalefonia, ISA, na alu ai Lori Larson ma ave lana lomiga o le Ensign o Mati i le faleteu ulu ma sa faagaeetia ai lava. Na mafaufau lava o ia o le a matuai manaia lava le faasoa atu i se tagata o se isi faatuatuaga, ma le auala o le a faamalamalamaina ai ni manatu sese e uiga i le Ekalesia. Ona fesili lea o lana teu ulu e uiga i le mekasini sa ia faitauina. E oo ane i le taimi na maea ai le fuafuaga ma le talanoaga, ua talosaga ane le teu ulu ina ia asiasi atu faifeautalai ia te ia.

Na faatauina e Telma Chacón o le Aai o Kuatemala, i Kuatemala, ni kopi faaopoopo se 12 o le Liahona ma faaaoga le fuafuaga o le Eseta e fetufaai atu ai mekasini ma lana molimau i ona tuagane ma uso. Na auina atu e Patricia Hegedus o Cardston, Alberta, Kanata, se kopi i se ulugalii Siamani sa la faauo i ai ma lona toalua i ni tausaga na muamua atu. Sa laua tauaaoina ma le agaga faafetai ma se folafolaga o le a faitau i ai. Na faatau e le aiga o Allan Harvey i Krugersdorp, Aferika i Saute, isi kopi faaopoopo e 12 ma tufatufa atu i aiga o lo latou auala.

Taumafaiga a Uarota ma Siteki

Na maua e iunite o le Ekalesia ni tufatufaga o kopi maua fua o le Ensign po o le Liahona e faaaoga i galuega faaaumea, galuega faamalosi, ma galuega faafaifeautalai. I Egelani, na faatulagaina ai e le siteki a Chorley se konaseti faapitoa o le Eseta lea sa valaaulia ai uo, tuaoi, tagata le toaaga o le ekalesia, ma Malo Faaaloalogia. Na maua e malo taitasi se Tusi a Mamona ma se kopi o le Ensign o Mati 2008.

I Nigeria, na asiasi ai tuafafine o le Aualofa o le itu a Ile-Ife, o se vaega o gaoioiga e faailoga ai le aso fanau o le Aualofa, i le falepuipui i le lotoifale ma tufatufa atu kopi o le lomiga o Mati. Na faamautinoa e le siteki a Newcastle-Under-Lyme i Egelani ua tofu aiga uma o le sieki ma se kopi ma se valaaulia e auai i se sauniga faamanatuga faapitoa i le Aso Sa o le Eseta. O se tasi o taunuuga, o se uso o le sa le toaga ae lei leva ona papatisoina i le vaitaimi o le 1980 na ootia ai ma ua toe olioli nei i faamanuiaga o le talalelei i lona olaga.

Ioe, o I Tatou o Kerisiano

E toatele na tusi mai e tau mai le ala na fesoasoani ai le lomiga e uiga i le Faaola e faamanino nisi o manatu sese e uiga i le Ekalesia a Iesu Keriso o le Au Paia o Aso e Gata Ai. Na lipotia mai e Barbara Mayes o Flagstaff, Arisona, ISA, se faamatalaga mai se tamaitai e tapenaina lona fale: “Ua tele mea ou te matauina e tau atu i le manatu e faapea e te talitonu ia Iesu. E faapefea lena mea? O oulua o Mamona. O oulua o ni Kerisiano?” Na tuu atu ia te ia e Sister Mayes se kopi o le Ensign o Mati ma amata ai loa ona la talatalanoa. “A o faitau o ia, sa faaauau ona ia fesiligia ni fesili taua, ma na tatalaina ai se loto na tapunia,” o le tala lea a Sister Mayes.

Na faia se pati a le aiga o Mike ma Shaz Kramer o Garwood, New Jersey, ISA, i le amataga o le tausaga lenei lea sa faapea ona valaaulia ai nisi o aiga e le o ni Au Paia o Aso e Gata Ai. Na i ai se aiga na vave taunuu atu ina ia mafai ona fesili atu le tama i se fesili e uiga i le Ekalesia. Na faailoa atu e sana uo faifeau e faapea, tatou te le talitonu ia Iesu Keriso. Fai mai Brother Kramer, “Sa na ona ou aapa atu lava ma aumai le Ensign o Mati o loo i ai le ata o Keriso i lona faavaa, ma fesili atu i ai, ‘Pe o foliga ea nei o se ekalesia e le talitonu ia Iesu?’” Na alu le tamaloa ma ave le mekasini ma talanoa ai ma faifeautalai i se taimi mulimuli ane o lena vaiaso e fai atu ai nisi fesili.

O Se Savali e Faavavau

O le lomiga o Mati 2008 o le Ensign ma le Liahona o loo maua lava pea i le faletusi a le Ekalesia. O lana savali paia e uiga i le Faaola ua taua mo le faasoaina atu e le gata i vaitau o le Kerisimasi ma le Eseta o loo lumanai, ae o soo se taimi foi e mananao ai tagata o le ekalesia e tuuina atu le faamafanafanaga, e aoao atu aoaoga faavae moni, ma faasoa atu i isi se molimau mausali e uiga i le Alii o Iesu Keriso. O loo i ai lava le faamoemoe iina mo le faaootiaina o le tele o nisi olaga.