IA AGAI I LUMA MA LE FAATUATUA
O Loo Vaai atu le Lalolagi ia te Oe
Ia e faamaoni i le Alii ma Lana Ekalesia. Tatalo e le aunoa na o oe i se mea lilo ma faitau tusitusiga paia. Tausia au feagaiga ma faalogo i musumusuga a le Agaga. O le a fesoasoani atu le Alii ia te oe e faafetaiaia ou tofotofoga ma luitau.
O le taimi lenei e agai atu ai i luma ma le faatuatua. O se taimi e tatau ai ona tausia poloaiga a le Atua. O le taimi e faatino ai lou faatuatua i le agaga tatalo ma le usiusitai. A o e faatinoina lou faatuatua i le mulimuli ai i nei tulaga faatonuina i le mea e mafai ai, o le a e iloa o le a e fiafia ma maua le tele o avanoa e fetufaai atu ai i isi le talalelei ma ou talitonuga. O le ola ai i nei tulaga faatonuina o le a e maua ai le saolotoga, ae le taofiofia ai oe.
Ao e agai atu i luma ma le faatuatua, o le a e seleseleina faamanuiaga folafolaina ma o le a liligi atu e le Alii Lona Agaga i ou luga. Faatasi ai ma Lona Agaga e taitaiina oe, o le a e iloa le mea e tatau ona fai ma pe faapefea ona e tali atu i mea uma e tutupu mai, ma o le a e tausiaina lau feagaiga o le papatisoga ina ia manatua pea o Ia.
O taitai talavou i vaega o tausaga eseese uma ua fautuaina ia faatinoina o latou faatuatua ma usiusitai ma le tatau ai. Sa galulue ma le faatuatua ia Nifae, Iosefa Samita, Ruta, ma le toatele o isi e pei ona latou usiusitai ai i le Alii ma Ana perofeta.
O outou o talavou o le tupulaga filifilia, o se tupulaga mamalu, ma o se tupulaga o le folafolaga. O lo outou faatuatua o le a faia ai se suiga tele i le lalolagi o loo saili mo se lelei ma le malamalama. O loo vaai atu le lalolagi ia te outou mo ni faataitaiga ma le taitaiga. O le mea lea, “Ia pupula atu lo outou malamalama i luma o tagata, ina ia latou iloa la outou amio lelei, latou te vivii atu ai i lo outou Tama o i le Lagi” (Mataio 5:16).