Uo i le Uo
Saunia mo se Misiona
“Sauniuni atu o outou loto ia Ieova” (1 Samuelu 7:13).
Mo le tele o tausaga talu ona maea le papatisoga o lo matou aiga, o aso uma lava e fai aiga ai i le aoauli faifeautalai i lo matou fale. Sa ou aoao ai ia alofa i faifeautalai, ma sa ou manao e faapei o i latou.
Ina ua 11 ou tausaga, sa valaauina au e lo’u epikopo mo se faatalanoaga i lona ofisa. Sa ia fai mai, “Ulisese, ua oo mai le taimi e amata ai au sauniuniga e alu i se misiona.” Sa ou tei aua faatoa 11 o’u tausaga! Ae sa ia fai mai, “Ua tatau ona ta amataina lena faatulagaga i le taimi nei.”
Sa fai mai lou epikopo, “O le a ou faatalanoaina oe mai lea taimi i lea taimi ina ia iloa ai pe o faapefea le faagasologa ua e i ai.” Ona ia tuuina mai lea ia te au o ni taiala. Sa ia aoao mai ia te au e uiga i poloaiga, o le perisitua, o le agavaa, ma le faamaoni. Sa matua faagaeetia au aua sa ia vaai mai i ou mata ma faapea mai, “O le a e auauna atu i se misiona pe afai e te mulimuli i taiala ua ou tuuina atu ia te oe.”
Ou te manatuaina pea ana upu, aemaise lava pe a ou faafeagai ai ma luitau. Mo se faataitaiga, i se tasi taimi na tuuina mai ai e lo’u tina se tupe ou te alu ai i le faleoloa e faatau mai ni fualaau aina. Sa tuu mai e le faatauoloa ia te au se tupe e sili atu nai lo le tupe na ou tuuina atu ia te ia e totogi ai fualaau aina. Sa amata ona ou savali agai i le fale, ae ina ua tatala lo’u lima, sa ou iloa ai ua sili atu le tupe o loo i ai nai lo le aofai sa ou amata ai.
Sa taumafai Satani e faatalitonu au e mafai ona ou tuuina le tupe mo au lava ia. Sa ou mafaufau, “Ua ou maua se tupe e fai ai mea ou te manao ai lava au ia, ae o le a ou tuuina atu i lo’u tina le sui sao o le faatau.” Ae sa ou toe mafaufau, “Leai, e le o le mea lena sa fai mai ai le epikopo ia te au. I le avea ai ma faifeautalai e tatau ona ou faamaoni.” Sa ou lagonaina le Agaga i lena taimi ma toe foi atu i le faleoloa ma toe faafoi le tupe. Sa ou maua se faalogona lelei i lo’u loto. Sa ou mafaufau, “Ua ou faamaoni, ua ou usitai i poloaiga, ma ua ou saunia mo la’u misiona. O le a avea au ma faifeautalai, ma e manaomia lo’u faamaoni.”
A o ou auai i le aoga maualuga, sa ou galue e teu se tupe mo la’u misiona. O ou matua e lima vaivai ma e le gafatia ona la totogiina mea uma. E le tele se tupe ou te maua, ae a uma ona totogi la’u sefuluai, ona ou filifili lea e faatau se ofu se tasi i le masina mo la’u misiona. I se tasi masina sa ou faatauina ai se ofutino, o le isi masina o se fusiua, o le isi masina o se isi ofutino. I lena taimi o le tolu tausaga, sa lava le tupe sa ou teuina e faatau ai mea uma sa ou manaomia. Sa lava le tupe na ou teuina e totogi ai la’u misiona. Sa ou aoaoina le mataupu faavae o le faaputuputu. Sa ou aoaoina le mataupu faavae o le usiusitai i le tulafono o le sefuluai ma le tele o faamanuiaga tatou te maua pe a tatou totogi ia sefuluai.
O la’u misiona o se aafiaga sili aua sa fesoasoani ia te au ia malamalama i mataupu faavae o le olaga ma le auala e faaaoga ai le talalelei i au gaoioiga i aso taitasi.
Tama ma teine, ia saunia mo se misiona lelei ma se olaga lelei. O loo faatalitali le Alii e tuuina mai ia i tatou faamanuiaga uma tatou te manaomia.