Sa i ai Lo’u Faatuatua ae Leai se Tupe
I le faaiuga o le 1988 sa ou fiafia lava i lou valaauga o se fesoasoani lua i le au epikopo i Ciudad Ojeda, i Venesuela, ae sa i ai sou popolega tele. Ua sili atu ma le tausaga talu ona avea au o se tagata o le Ekalesia, ae ou te lei mauaina lava ou faamanuiaga faalemalumalu.
I se tasi aso na asiasi mai ai se uo mai le aai e sosoo ai o Maracaibo. E lei umi, ae oo le ma talatalanoaga e uiga i mataupu faaleagaga.
Sa faafuasei ona musuia lau uo e fai mai, “Le uso Troconiz, ou te talitonu o loo manao le Tama Faalelagi ia te oe e te alu i le malumalu, ma maua faamanuiaga e faavavau ua Ia folafola mai i Ana fanau.”
“E le mafai ona ou alu,” sa ou tali atu ai. “E leai se malumalu iinei i Venesuela, ma o se malaga e alu i fafo atu o le atunuu e matuai taugata lava. E leai sau tupe.”
Sa ia mafaufau i lenei mea mo sina minute ona ia faapea mai lea, “Afai e moni lou manao e te alu i le malumalu, o le a saunia e le Tama Faalelagi se auala mo oe e te alu ai.”
Sa ou tali atu, “Afai e saunia e le Tama Faalelagi lena ituaiga fesoasoani, o le a ou alu!”
Mai lena lava taimi sa faatumuina au i le faatuatua ma le faamoemoe o le a mafai ona ou alu atu i le malumalu. I le aso na sosoo ai, sa ou valaau ai i taitai o le siteki ma sa tauina mai ia te au, o loo fuafuaina se malaga i le malumalu i Lima Peru ia Ianuari, o le malumalu pito i lata mai lea i lena taimi. O le malaga e 16,500 polivare (tala Venesuela) lona tau, ma e aofia ai le pasese o le vaalele, meaai, ma le nofoaga e faamautu ai.
Ua tuanai atu le tele o aso, ma o le aso mulimuli mo le totogiina o le tupe ua vave lava ona oo mai. Sa ou taumafai e saili le tupe, ae sa le taitai ona latalata i le mauaina o le mea ou te manaomia. Ae ui i lea, sa le faavaivai ai lo’u faatuatua. Sa ou mautinoa lava o le a saunia e le Tama Faalelagi se auala.
Ae lei oo i le taimi e faagata ai, sa ou mauaina se valaau mai le mea sa ou faigaluega ai muamua. O le tagata sa valaau mai, sa ta’u mai lo’u igoa ma faapea mai, “Sa faafaigaluegaina oe e lenei kamupani suauu i le lima tausaga talu ai. Ina ua e tuua le galuega, sa le sa’o ona faamaumauina au faamanuiaga tau tupe e maua. Faamolemole malaga mai ma avatu le siaki ua matou faia i lou igoa.”
Sa ou alu atu e aumai le siaki i le aso e sosoo ai. Ina ua ou vaai atu i le aofai, sa ou ofo i le mea na ou vaai i ai. O le aofaiga o le siaki na faia e 16,500 polivare (tala)!
Ia Ianuari 17, 1989, sa ou ulufale ai i le Malumalu i Lima Peru ma mauaina ou faaeega paia o le malumalu. Ua sa’o lelei lau uo. Na saunia e le Tama Faalelagi le auala mo au ou te alu ai i le malumalu. E pei ona folafola mai e Nifae, “E mafai e le Atua ona faia mea uma … mo le fanauga a tagata, pe afai latou te faatuatua ia te ia” (1 Nifae 7:12).