TAUSIA O LE ASO SAPATI
O Fea e Tatau ona Ou I Ai?
Faaaoga le Sapati e tapuai ai i le Alii, auai i le lotu, mafuta ai ma lou aiga, ma fesoasoani ai i isi. Aua lava nei sailia ni faafiafiaga pe faaalu ni au tupe i le Sapati. Afai e mafai, ia aloese mai lou faigaluega i le Aso Sa.
Pe i ai ea ni Aso Sa e te lagonaina ai ua e le fia alu lava i le lotu? O le mea moni sa ou maua ai, i se taimi lata mai. Sa faatoa ou siitia atu lava i se uarota fou i totonu o Cape Town, i Aferika i Saute. E le faapea ona o tagata o le uarota e le lelei pe le fia faauoai. Ae ona e le o i latou o au uo mai lo matou nuu.
I le maea ai o lou vaiaso muamua i totonu o le uarota sa faia ai loa sau filifiliga mautu i lo’u mafaufau—e amata atu nei o le a na o sauniga faamanatuga ou te alu i ai. I le vaiaso na sosoo ai, sa tuai ona ou alu. Ao ou savali atu i le faitotoa o le falesa, sa faafeiloai au e nisi o nai tagata ma ou nofo loa i lo’u nofoa. Ao ou nofo ai iina, sa ou lagonaina le manatu tele i lo’u aiga. Ona pau lava le mea sa ou manao i ai o la’u uarota tuai, o fofoga fiafia latou te iloaina au.
Ona tulai lea o le failauga muamua ma amata lana lauga. Sa pei o loo talanoa mai ia te au. Sa talanoa mai i le lagona tuulafoaiina i totonu o se aai fou, ma sa ou iloa ai e le na o au se tagata o i ai i lea tulaga. Ona faasoa mai ai lea e le failauga lona lua se isi savali sa patino lava lona taua ia te au. Ao lei faamaeaina le sauniga, sa tulai mai le epikopo ma tau mai ia i matou le tele o lona alofa ia i matou taitoatasi. Sa ia fai mai ua ia iloaina o loo i ai tagata o loo faalagolago ia te ia mo le vaaia ma le tausiaina o i latou.
Ao ou usuina le pese faaiu, sa ou iloaina o iinei le mea e tatau ona ou i ai. Ou te lei lagonaina lava se filemu faapea mo se taimi umi, ma sa ou iloa na sau mai le Tama Faalelagi. E na te silafia i tatou taitoatasi ma o tatou manaoga. Sa Ia tuuina mai ia te au le mea sa ou manaomia i lena aso, ma sa ou iloa afai ou te faaauau ona ola ai i Ana poloaiga, o le a Ia faapea lava ona faia.