I TALA FOU

Ua Fofogaina e Peresitene Monson le Malumalu Fou Lona Tolu i Arisona

I totonu o se masina, ua fofogaina ai e Peresitene Thomas S. Monson ia fuafuaga e fausia ni malumalu fou se tolu i Arisona, ISA. O le faasilasilaga aupito lata mai na oo mai i le aso 24 o Me, 2008, lea sa faapea ona folafola mai ai e le perofeta ia fuafuaga mo le fausiaina o se malumalu i Phoenix.

O le aso 28 o Aperila na ia faasilasilaina ai fuafuaga mo le fausiaina o malumalu i Gilbert ma Gila Valley, Arisona.

“O faamanuiaga o le malumalu e faavavau,” o le saunoaga lea a Peresitene Monson i se tusi i tagata o le au paia. “O i latou o e o mai i lenei maota paia o le a lagona ai le alofa o le Atua mo Lana fanau ma maua ai se malamalamaaga sili atu i lo latou lava tupuaga paia ma gafatia o ni Ona atalii ma afafine.”

O malumalu fou o le a atoa ai le lima o le aofai atoa o malumalu i Arisona, ma o le a tuuitiitia ai le pisi tele o malumalu o le setete o loo faaaoga nei i Mesa ma Snowflake.

O le Malumalu o Mesa Arisona, na fausia i le 1927, ma o loo auai atu i ai le tele o tagata o le ekalesia nai lo se isi lava malumalu o le lalolagi i fafo atu o Iuta, o loo tautuaina ai tagata o le ekalesia mai siteki e 74, o le tala mai lea a le Matagaluega o Malumalu a le Ekalesia.

E leai se taimi atofaina ua faatulagaina mo le fausiaina o malumalu fou e tolu, lea ua atoa i ai le 140 o malumalu o loo faagaoioia pe fuafuaina i le lalolagi atoa.

Faapaia e Peresitene Monson le Malumalu, Feiloai ma le Sui Peresitene o Pasila

I le vaiaso o le faapaiaga o le Malumalu o Curitiba Pasila, e faitau afe tagata o le Ekalesia na faapotopoto e faalogologo ia Peresitene Thomas S. Monson mai nofoaga eseese i Pasila i saute ma Pasila tutotonu.

Na auai faatasi ai ma Elder Russell M. Nelson o le Korama a Aposetolo e Toasefululua ma Elder Charles Didier o le au Fitugafulu, na faapaiaina e Peresitene Monson le malumalu o Curitiba i ni sauniga se fa i le Aso Sa, 1 o Iuni, 2008.

O le po na muamua atu, na faatumulia ai se malae soka i tagata o le ekalesia mo se faafiafiaga faaleaganuu na auai atu i ai le perofeta.

O le malumalu o Curitiba o le malumalu lona lima lea i Pasila, lea ua faapea ona oo atu ai le faitau aofai o tagata o le ekalesia i le tasi le miliona. E silia i le 42,000 tagata na asiasi atu i le malumalu i le taimi na tatala ai mo maimoaga. O le malumalu lona ono a Pasila ua fuafuaina mo Manaus.

I le Aso Gafua, 2 o Iuni, na malaga atu ai Peresitene Monson i Brasilia, Pasila, e feiloai ma le sui peresitene o Pasila, o Jose Alancar. Faatasi ai ma Elder Nelson ma Elder Didier, na tauaao atu ai e Peresitene Monson i le Susuga ia Alancar se faatusa laitiiti ua faatusaina i se aiga ma se kopi ua faavaaina “O Le Aiga: O Se Folafolaga i le Lalolagi” (Liahona, Oke. 2004, 49).

Ina ua mavae lea, na auai atu ia Elder Nelson ma lona faletua o Wendy, faatasi ma Peresitene Monson e saunoa atu i le pe tusa ma le 8,000 o tagata o le ekalesia mo se afiafi faaleaiga a siteki tuufaatasi.

Fesoasoani Atu Tagata o le Ekalesia i Hong Kong i Tagata Na Aafia i le Mafuie

I aso o le mafuie tele lea na luluina ai le itumalo o Saina i Sichuan ia Me, e silia i le 600 tagata o le Ekalesia mai Hong Kong na malaga atu i se falegaosi oloa i Shenzhen, Saina, e tuufaatasi ni afifi se 10,000 o fesoasoani faavavave mo i latou na aafia i le mafuie.

O afifi taitasi na i ai ni masi, susu pauta, aano manufasi tuuapa, saimini, fasimoli, pulumu ma kulimi fufulunifo, solo, o se ofu faatimu, o se palanikeke, ma vaiinu.

O Galuega Alofa a le Au Paia o Aso e Gata Ai, o se lala o fesoasoani alofa a le Ekalesia, na faatulagaina le galuega faatino, o se vaega o taumafaiga fesoasoani e sili atu ona toatele na faagaoioia mo i latou na aafia i le mafuie. Na aofia ai le tusa ma le 5,000 o faleie, ma le 4,000 o ato moega faatasi ma fala.

E faaopoopo atu i sapalai o fesoasoani, na tauaaoina foi e taitai o le malo ma le Koluse Mumu a Shenzhen se siaki mai Galuega Alofa a le Au Paia o Aso e Gata Ai. O le tupe na aumai mai foai a tagata o le Ekalesia i Hong Kong ma le lalolagi atoa.

O le susuga ia Bruce Lai, o se alii fai pisinisi i Hong Kong ma o se tagata o le Ekalesia, na faaavanoaina lona falegaosi oloa i Shenzhen mo lea fuafuaga.

O loo tufatufaina atu e le Faalapotopotoga Agaalofa a Saina ia sapalai i nuu ma alalafaga o le itu na aafia i le mafuie.

Feiloai Peresitene Uchtdorf ma le Au Paia Europa

Na feiloai ia Peresitene Dieter F. Uchtdorf, Fesoasoani Lua i le Au Peresitene Sili, faatasi ma tagata o le Ekalesia ma malo valaaulia i le taimi o sana malaga taamilo i Egelani, Siamani ma Farani, i le faaiuga o Me ma le amataga o Iuni 2008.

I le taua ai o talafaasolopito o Siamani ma Farani, sa ia tau atu ai i tagata o Paris o e na auai i se sauniga i Versailles e faapea “e ui lava ina sa tele taua i le va o atunuu e lua, ae ua avea nei i tatou o ni uo ma ni tuaoi lelei. O loo i ai i le talalelei a Iesu Keriso le mana e faia uma ai i tatou o ni tagata e sili atu ona lelei ma e leai se eseesega i atunuu po o lanu.”

Sa faaauau lana saunoaga: “Ua tatou tasi nei, o ni uso ma ni tuafafine uma. O le talalelei o le tali lea i luitau o le olaga, i fesili uma e feagai ma aiga, nuu, ma atunuu.”

Na avea Peresitene Uchtdorf ma se tagata o le Ekalesia i Siamani a o laitiiti. Na valaauina o ia o se Fesoasoani i le Au Peresitene Sili ia Fepuari o le tausaga nei.