Faamatalaga

Ua Faamanuiaina o Matou Olaga e le Liahona

Ua matou faafetai tele ua mafai ona matou maua le Liahona iinei i Vanuatu. E ese le matagofie e faitau ai e uiga i tagata i nofoaga eseese ma le tupuolaola o le Ekalesia i le lalolagi atoa. Ua matou aoaoina le tele o mea mai le mekasini. Ua faamanuiaina ai o matou olaga, ma o le a matou le tumau i le mea e tasi ona o lenei mekasini.

Amos Tarohati Zoro, Vanuatu

O Le Paipa i Totonu o le Vaieli o Vai Mama

I le avea ai ma faiaoga o Mataupu Faavae o le Talalelei i lau uarota, ua ou matua faafetai tele mo galuega maoae ua outou faia i le LDS.org. O le faatagaga e pulea ai ma maua se avanoa i tusitusiga a le Ekalesia i lo matou eria e matua faigata tele. O le maua o le avanoa mo tusitusiga paia ma isi tusi a le Ekalesia i luga o le Initoneti ua pei o le i ai lea o so matou lava paipa i totonu o se vaieli o vai mama. Faamolemole ia silafia o a outou taumafaiga ua faia ai se suiga moni i olaga i aso taitasi o o matou tagata. O se matua vavega lava mo i latou le mauaina o le savali a lo tatou Tama Faalelagi i la latou lava gagana.

Taofia le igoa

O Upu e Mafai ona Fesoasoani i Tagata Uma

Ou te faafetai tele i le mauaina o le Liahona i lou olaga! Ua ou maua ai i totonu ia upu musuia e mafai ona fesoasoani i tagata uma, pe o ni tagata o le Ekalesia pe leai. O le savali mai le Au Peresitene Sili ua faaalia ai lo latou alolofa mo i tatou, ma le vaega O Leo o le Au Paia o Aso e Gata Ai ua tumu i faataitaiga lelei e mulimulitai i ai. Ou te faitauina le mekasini mai le itulau muamua e oo i le mulimuli aua ou te iloa o le a pai mai le Agaga ia te au ma faamalosia au pe a ou faia. Ou te iloa e ala atu i lenei mekasini o le a pai atu ai le Malamalama o Keriso i tagata, ma ou te faafetai ia te outou uma ua faia mea ua mafai ai.

Cristophe Jaime, Potukale

O Le Liahona o se Uo

Pe a ou faitau i le Liahona, ou te iloa lou faamanuiaina i le avea ai o se vaega o lenei galuega tele a le Alii. Ua fesoasoani le Liahona ia te au e avea ai o se tagata lelei o le Ekalesia. Ou te iloa o le Liahona e mafai ona avea ma se mea faigaluega maoae mo le galuega faafaifeautalai. I le avea ai ma tagata o le Ekalesia e mafai ona tatou faaaogaina e fesoasoani ai i isi e o mai ia Keriso. O le Liahona o se tasi o au uo lelei.

Galsanjamts Dashdavaa, Monokolia

E i ai o Tatou Uso ma Tuagane

Ou te matua faafetai tele sa fesoasoani mai le Tama Faalelagi ia ou maua Lana Ekalesia ma avea ai ma tagata auai. Ua ou aoaoina le tele o mea moni, avea o se tagata lelei atu, ma ua ou sauniuni mo le ola e faavavau. Ua faapea ona ou fiafia ai ona o lou aiga o se vaega o le Ekalesia a Iesu Keriso o le Au Paia o Aso e Gata Ai ma e le o tuua na o i matou—o loo i ai o matou uso ma tuagane. O le Ekalesia ua avea ma o matou malosiaga i tausaga faigata. Ua matou faafetai tele i le Tama Faalelagi ma Iesu Keriso e faapea foi i perofeta ma aposetolo, o loo auauna mo i tatou.

Susanna Martirosova, Aremania