VAKAITAU

Kakua ni se vakaitau ni bera ni ko yabaki 16. Me nomu itau ga e dua e cecere na nona ivakatagedegede. Ni ko sa vakaitau, ni lako vakailawalawa se vakayarurua. Vakayacora na itaviqaravi ena vukea mo ni voleka tikoga vua na Yalo ni Turaga.

E vinaka duadua na lako vakaitau e vakarautaki ka rawarawa tu ga vakailavo, ka lasa. Vakayacora na veika vovou; era dau taleitaka na tamata na veimataqali marau ka mera veikilai mada vakai ira ni ra marau tiko. Kere ivakasala vei rau na nomuni itubutubu, itokani, se o ira na iliuliu ni itabagone, me baleta na vakaitau vakailawalawa. Oqo eso na ka me na vukea na nomu tekivu:

• Sikova e dua na vale ni qaqi loli, jisi, se so tale na vanua e taleitaki.

• Vakayacora e dua na kana vata, ka mera vakasaqara mai na veikakana se isaluwaki e gadrevi.

• Sikova e dua na vanua ni gade, era dau vakani kina na manumanu vuka, taubale, qito Frisbee, vodo basikeli, se dua na vakatakakana.

• Sikova e dua na vale ni yaya makawa, taqe ni ika, se valenimanumanu kila. Raica ke tabaki tiko ena niusipepa se Initaneti na ivakamacala ni tikite e sega ni saumi se isau lailai.

• Ni lako vakaitau ka vukea e dua. Samaka e dua na matanivale, sava katuba leka, se vukea e dua e leqa.

• Ke o ni sega ni vinakata na kosakosa, ni gole ki na dua na valenivola se sitoa ni ivola mo ni laki vakawilika kina na veivola eso.

• Kevaka o ni tiko ena dua na vanua ka dau tau vakalevu kina na ucacevata, ni bulia e dua na ivakatakarakara ni tamata. Ke o ni voleka e baravi, ni bulia e dua na valenitui ena nuku (sandcastle) . Se ni dui bulia ga na nona, ka me ra vakatulewa kina o ira na tamata era tasivi ekea.