FAAFIAFIAGA MA ALA O FAASALALAUGA

Filifili faafiafiaga e faagaeetia ai oe. Aloese mai soo se mea e faatufanua, e le mama, e faatupu vevesi, pe faatiapolo i soo se itu. Ia e faia se tautinoga e tausia tulaga faatonuina a le Atua.

I le i ai o le tele o ituaiga o faafiafiaga o loo siomia ai i tatou, e ono mafai ona faafaigata le filifiliga. O nisi nei o taiala e fesoasoani ia i tatou e filifili ai faafiafiaga faagaeetia:

1. A o lei taaalo i se taaloga vitio pe matamata i se ata, ia saili lona faatulagaga ma mea o loo i ai i totonu.

2. Fesili ifo ia te oe lava pe o i ai ni mea e le talafeagai i lena taaloga po o le ata, e tusa lava po o le a lona faatulagaga. Ia aloese mai soo se mea e aveeseina ai le Agaga.

3. Afai o i ai ni mea e le talafeagai, o se mea lelei tele le savali ese, tape, po o le tuuese foi.

4. Vaai mo taaloga e faagaeetia ai, ata, ma musika e faapena foi ona faagaoioi ai le mafaufau.

5. Ia suesue le lalolagi e ala i le alu o se savaliga, tietiega uila, aoaoina o se isi tomai fou, po o le aoao e uiga i isi aganuu nai lo le televise, telefoni feaveai, ma komepiuta.

6. Ia fiafia i gaoioiga e faatupuina ai le matala o lou mafaufau ma malosi ai lou tino.

O a tulaga faatonuina a le Atua e mafai ona taitaia ai i le filifilia o ala o faasalalauga? “Afai o i ai nisi mea mama, matagofie, ma tauleleia, matou te saili ia mea uma” (Mataupu Faavae o le Faatuatua 1:13).