AIGA

Fai lau vaega ina ia atiina ae ai se aiga fiafia. Ia e ava i ou matua, ma faamalolosia a outou sootaga ma ou uso ma tuafafine.

Ua folafola mai e le Au Peresitene Sili ma le Korama a Aposetolo e Toasefululua: “E maua le fiafia i le olaga faaleaiga pe a faavae i aoaoga a le Alii o Iesu Keriso. O faaipoipoga ma aiga manuia, e faavae ma tumau i mataupu faavae o le faatuatua, tatalo, salamo, faamagaloga, faaaloalo, alofa, agalelei, galuega, ma gaoioiga faafiafia tuufaatasi.”¹

O le mea e ofo ai, o nei mea moni faigofie, o loo maua i le fuafuaga o le fiafia a lo tatou Tama Faalelagi, ae o ni mea e faateia ai le lalolagi i nisi o taimi. Ae o se suesuega talu ai nei sa maua ai o talavou i fafo atu o le Ekalesia o loo latou maua foi le fiafia faaleagaga ma faapea foi i a latou fesootaiga faaleaiga. I le 2007 e toalua ni faalapotopotoga tetele o tala faasalalau sa faia se suesuega e ala i ni fesili mo talavou e i le 12 e oo i le 24 tausaga, ina ia sailia pe o le a le mea e maua ai e i latou le fiafia.

O lenei suesuega sa tuuina mai ai nei faaiuga, faapea ma isi:

O le autalavou e “faalagolago i matua o se puna sili ona taua mo le saogalemu ma le fiafia.”
“O le a faateleina le sailia e le autalavou o le fiafia e ala i le faaleagaga ma le faatuatua.”
“O se suiga fou o le naunautaiga o talavou i le tulaga faatonuina o le aiga i le tulaga masani o le a faatupuina lona lagolagoina.”
O se tasi o faamatalaga na aoteleina ai le suesuega o loo faapea mai, “E ui o la matou uluai suesuega sa iloa ai o talavou o aso nei e sili atu le tumau i tulaga masani nai lo isi augatupulaga ua mavae, ae sa matou ofo i le iloaina lea o le maualuga o le tulaga naunautai o le autalavou i ni a latou lava faaipoipoga ma aiga ma le olioli tele.”²