AUAUNA ATU I ISI
Ia e auauna atu i isi i lou tofiga faale-Ekalesia ma lou aiga, o le aoga, ma le alalafaga. Saili atu i aso taitasi mo le taitaiga a le Agaga Paia, ia e iloa po o ai e auauna atu i ai ma pe faapefea foi ona taulimaina o latou manaoga.
Sa aoao mai le Tupu o Peniamina, “Pe a i ai outou i le galuega a o outou uso ua na ona i ai outou i le galuega a le Atua” (Mosaea 2:17). E tele auala e auauna atu ai i isi, ae o le naunautai faamaoni ma le alofa o ki ia. O nisi nei o nai manatu ma fautuaga i le auala e auauna atu ai:
-
Aua nei galo e faamuamua lava le auauna atu i lou aiga.
-
Ia faia lau auaunaga ia fetaui ma manaoga o le tagata. Mafaufau e uiga i se mea e fiafia i ai, manao i ai, pe moomia e le tagata.
-
Ia tausia gaoioiga auauna atu i le faigofie, ma ia faaauai isi i le fuafuaina ma le faatinoina.
-
O le mata ataata, o uiga fiafia, o le faalogo, o le faamalosiau faamaoni, o le faatinoga iti o le agalelei o ni auala taua ia o le auauna atu.
-
Ia manatua e faaaoga le fautuaga o loo tuuina mai i le Mosaea 4:21. Ia fetufaai ma le alofa ma isi.