IKATINI KEI NA SOLI KA

E Vinaka Cake Meu Vakalougatataki!

MAI VEI RICHARD M. ROMNEY

Mekesini ni Lotu

Mo sauma na ikatini ena yalomu dina. Mo tiko ena veidutaitaki ni nomu ikatini. Muria na lawa ni lolo.

Era sa veivosakitaka tiko na ikatini kei na isolisoli ni lolo o ira na itabagone Yalododonu Edaidai mai Guyana, e dua na matanitu e toka ena vualiku kei Sauca Amerika.

“E vinaka cake meu vakalougatataki!” a kaya o Simeon Lovell, 14, ena lesoni ni semineri ena valenilotu mai Prashad Nagar e Georgetown. Era a wilika na kalasi ena Malakai 3:8–12, ni o ira era butakoca na Kalou ni ra sega ni sauma na nodra ikatini era na cudruvi ia sa yalataki tu vei ira era sauma tiko na nodra ikatini ni ra na kalougata vakalevu sara ka sega ni taqeya rawa.

“Raica mada na veika kece sa yalataki tu,” e kaya o Xiann Kippins, 16, na itokani ena kalasi. “Ko na taqomaki. Ko na tiko sautu. Ena dolavi vei iko na katuba ni lomalagi.”

E kaya o Clint Callender, 17, mai na iKarua ni Tabana o Garden Park (tiko talega e Georgetown), “Na veika sa tu e vuravura sa mai vua na Tamada Vakalomalagi. E vinakata ga o Koya e dua na tikina lailai, me vukea meda vakaraitaka kina na noda vakavinavinaka. Au marautaka kina na sauma na noqu ikatini. Au marau meu lolo vakadua ena veivula ka soli me baleti ira na dravudravua. Ni gauna au dau raica kina na veika e cakava na Lotu ni sa yaco e dua na sunami, cagilaba, se so tale—ni sa lolomataka na Lotu na isulu kei na kakana—au dau marau niu vakasamataka niu sa tiki talega ni ka o ya niu solia na noqu isolisoli.”

Mai na Tabana ni Kaulotu e West Indies, e vakamacalataka vei Mark Mangray, yabaki 17 o Curfew Ali, yabaki 17 talega mai na Tabana e Arima mai Port of Spain e Trinidad, ni dina ga ni takiveiyaga na kena isau, e dau sauma ga o koya na nona ikatini ka solia na nona isolisoli ni lolo. “Au na kila kina, ni sa vinakata na Turaga me vakalougatataki au,” a kaya. A tukuna vei Mark na veidutaitaki ni ikatini kei na vakacegu ni yalona ni sa sauma vakadodonu tiko na nona ikatini.

A vakaraica ka wilika sara o Mark na rasiti ni ikatini ka kaya, “E dina o iko, Curfew. Au sa na kauta yani na noqu ikatini ki lotu ni mataka.”