SEFULUAI MA TAULAGA
E Sili ai ia te Au Faamanuiaga!
Ia totogi ma le naunautai se sefuluai atoa. Ia e auai i faatalanoaga o le sefuluai. Usitai i le tulafono o le anapogi.
Sa talanoa le autalavou o le Au Paia o Aso e Gata Ai i Guyana, o se atunuu o loo i le vaega i matu o Amerika i Saute, e uiga i Sefuluai ma Taulaga.
“E sili ai ia te au faamanuiaga!” o le fai mai lea a Simeon Lovell, e 14, i le taimi o le lesona a le seminare i le falelotu i Prashad Nagar i Georgetown. Faatoa faitau lava e le vasega le Malaki 3:8–12, lea o loo fautuaina mai ai o i latou o e faoa mea a le Atua e ala i le le totogiina o sefuluai o le a malaia ae ua folafola mai o i latou o e totogiina sefuluai o le a maua faamanuiaga o le a le mafaitaulia.
“Sei vaai i nei mea uma ua folafolaina mai,” o le fai mai lea a se tasi o le vasega o Xiann Kippina, e 16. “O le a puipuia oe. O le a e uluuluola. O le a tatala mai faitotoa o le lagi ia te oe.”
Sa faapea mai Clint Callender, e 17, o le Paranesi Lua a Garden Park (e i totonu foi o Georgetown), “O mea uma o loo i luga o le fogaeleele e mai le Tama Faalelagi. Ua na o sina vaega itiiti o loo Ia finagalo e toe avatu, e fesoasoani ia i tatou e faaalia ai lo tatou agaga faafetai. O lea ou te fiafia ai e totogi le sefuluai. Ua ou fiafia e taitasi i le masina ona ou anapogi ma foai atu e tausi ai e matitiva. Ma pe a ou vaai i mea uma ua faia e le Ekalesia pe a i ai ni galulolo, afa, po o isi faalavelave tutupu—o lavalava uma ma sapalai o meaai ua saunia e le Ekalesia—ua faapea ona ou fiafia e mafaufau e mafai ona avea au o se vaega o lena foai atu e ala i lo’u matamau i a’u taulaga.”
I se isi vaega i le Misiona a West Indies, sa faamalamalama atu ai e Curfew Ali e 17 tausaga le matua o le Paranesi a Arima i Port o Spain, Trinidad ia Mark Mangray, e 17 foi, e ui lava o loo ia mauaina sina vaega tupe laitiiti, ae na te totogiina le 10 pasene o ana tupe maua o se sefuluai ma foai atu foi i le taulaga anapogi. “I lena auala, ua ou iloa ai ua mafai e le Alii ona faamanuia mai ia te au,” o lana tala mai lea. Sa ia talanoa atu ia Mark e uiga i le faatalanoaga o le sefuluai ma le lagona fiafia i le mafai ona folafola atu ua ia totogiina atoa le sefuluai.
Sa tilotilo atu Mark i se pepa o foai e lei faatumuina, ma faitau i ai, ma faapea mai, “E sao oe, Curfew. “O le a aumai lau sefuluai i le lotu a taeao.”