Savali a Faiaoga Asiasi
Ia Ola Faalagolago Ia te Oe Lava
Ia aoao atu ma le agaga tatalo mau ma upusii nei po o, pe afai e manaomia, se isi mataupu faavae o le a faapea ona faamanuiaina ai uso o loo e asia. Ia molimau atu e uiga i le aoaoga faavae. Ia valaaulia i latou o loo e aoaoina e faasoa mai mea ua latou lagonaina ma aoaoina.
O le a le ola faalagolago o le tagata ia te ia lava?
“‘O le ola faalagolago o le tagata ia te ia lava, o lona uiga o le faaaogaina uma lea o o tatou faamanuiaga mai le Tama Faalelagi e tausia ai i tatou lava ma aiga, ma saili ai ni tali i o tatou lava faafitauli.’ Ua tofu i tatou ma se tiutetauave e taumafai e aloese mai faafitauli a’o lei tutupu ma aoao e faatoilalo ia luitau pe a tulai mai. …
E faapefea ona tatou ola faalagolago ia i tatou lava? Tatou te ola faalagolago ia i tatou lava i le lava o le malamalama tatou te maua, a’oga, ma iloa faitau ma tusitusi, ola maloloina faaletino, puleaina ma le atamai o tupe ma punaoa, o le malosi faaleagaga, saunia mo faalavelave faafuasei ma mea e faafuasei ona tulai mai, ma le maua o le manuia faalevafealoai ma le soifua manuia faalelagona.”1
Julie B. Beck, peresitene aoao o le Aualofa
O Se Tiutetauave Faaletalalelei
“A tatou ola faautauta ma faateleina a tatou meaalofa ma taleni, o le a atili ai ona tatou ola faalagolago ia i tatou lava. O le ola faalagolago o le tagata ia te ia lava, o le tauaveina lea o le tiutetauave mo o tatou lava uelefea faaleagaga ma le faaletino, ma mo i latou ua tuuina mai e le Tama Faalelagi i la tatou tausiga. Seiloga lava ua tatou faalagolago ia i tatou lava ona mafai lea ona tatou faaa’aoa’o i le Faaola i le auauna atu ma faamanuiaina isi.
“E taua ona malamalama o le faalagolago o le tagata ia te ia lava, o se meafaigaluega e ausia ai se sini. O la tatou sini laualuga lava o le avea e faapei o le Faaola, ma e faalauteleina lena sini e ala i la tatou auaunaga lē manatu faapito i isi. E faateleina pe faaitiitia lo tatou tomai e auauna atu ai e ala i le maualuga o i ai lo tatou faalagolago ia i tatou lava.2
Elder Robert D. Hales o le Korama a Aposetolo e Toasefululua.
“O le ola faalagolago o le tagata ia te ia lava o le fua lea o a tatou galuega ma e lagolagoina isi faatinoga uma o le uelefea. O se elemene taua i lo tatou soifua manuia faaleagaga faapea foi ma le faaletino. E faatatau i lenei mataupu faavae, na saunoa mai ai Peresitene Marion G. Romney [1897–1988]: ‘Ia tatou galulue mo mea tatou te manaomia. Ia tatou faalagolago le tagata ia te ia lava ma ia tutoatasi. E leai lava se isi mataupu faavae e mafai ona maua ai le faaolataga. O le faaolataga o se mataupu patino i le tagata lava ia, ma e tatau ona tatou galueaiina lo tatou lava faaolataga i mea faaletino faapea foi ma mea faaleagaga.’ …
“Na toe aoao mai foi Peresitene Spencer W. Kimball [1895–1985] e uiga i le faalagolago o le tagata ia te ia lava: ‘O le tiutetauave o le tagata lava ia mo le soifua manuia i fegalegaleaiga, faalelagona, faaleagaga, faaletino, po o le tamaoaiga ua pau muamua atu lava lea i ona luga, lona lua o lona aiga, ma lona tolu o le Ekalesia pe afai o ia o se tagata faamaoni.’”3
Peresitene Thomas S. Monson