O Lo Tatou Avanoa

I luga o le Uepi: Fesoasoani e filifili ni pepa lautetele o i ai ni savali pito i lelei e faaaoga i masina o loo mulimuli mai. Alu i le liahona.lds.org e te palota ai. Ma ao e i ai iina, e mafai foi ona e fautuaina mai ni ulutala po o ni manatu mo pepa lautetele o i ai ni savali mo le lumanai.

O Le Mau e Sili Ona Ou Fiafia i Ai

“Afai tou te o mai ia te au, e maua e outou le ola faavavau. Faauta ua faaloaloa atu lo’u lima alofa ia te outou, ai se sau, ou te talia o ia; Amuia i latou o e o mai ia te au” (3 Nifae 9:14).

O se tasi lenei o mau e sili ona ou fiafia i ai, aua o le mau lenei na aumaia ia te au se molimau o loo soifua Keriso ma e finagalo tatou te mulimuli atu ia te Ia.

Olivia K., 15, Heves, Hanikeri

O Tatou o Faifeautalai I Aso Nei

O le tusiga ia Mati 2007 Liahona “O Auala e Saunia ai e Avea ma se Faifeautalai Lelei” ua aumaia ai ia i tatou se savali taua. Tatou te le tau faatali seia 19 ina ia avea ma faifeautalai. Leai o i tatou o faifeautalai i le taimi nei lava.

Na ta’u mai ia i tatou e tatau ona tatou saili ma manatunatu loloto i tusitusiga paia ma tatalo e le aunoa ina ia mafai ona tatou faatoilaloina Satani. E ao ona tatou faatuatua e le aunoa i le Faaola o Iesu Keriso.

Melissa N., 18, Samoa

O Loo Lelei Mea Uma

Ou te manatua ma le manino le po na ou iloa ai le maoae tele o lo’u tulaga faaletonu faaleagaga. Sa ou agai atu i le inisitituti ae amata loa ona ou lagona le osofaia o au. Sa lagona le fenumiai o lo’u mafaufau. Sa le mafai ona ou fai atu na ou iloa le moni o lo’u faatuatua. Sa lagona lou le toe mautonu i soo se mea. Sa ou lagona le lotovaivai ma le maasiasi ma tatalo loa mo le malosi.

Ina ua ou taunuu atu i le falelotu, sa lofituina au i le faanoanoa. Sa ou manava tele i totonu ma ulu atu loa i le fale. Ina ua ou oo atu i le falelotu, sa ou lagona atu le pese “O mai, O mai, Outou o le Au Paia” (Pese, i. 17) o usu mai e o’u uso ma tuagane. Sa vave lava ona ou lagona le laveai na oo mai mai le Atua e ala i le Agaga Paia.

O le lagona o le filemu na matuai maoae lava na le mafai ai ona tatali o’u loimata. Na faailoa mai e le Alii ia te au o le a lelei mea uma ma o loo ou saogalemu. Na ou iloa na taumafai le mana o le pouliuli e faaleaga mea lelei uma na ou aoaoina peitai o le alofa o le Atua e saogalemu ma mafanafana. Na ou malamalama e moni le Atua ma o lo tatou sulufaiga ma le malosi. Na ou aoaoina foi e mafai ona tatou faatoilalo tofotofoga ma faaosoosoga pe afai tatou te faaaogaina le faatuatua i le Atua ma saili e le aunoa Lana taitaiga e ala i le tatalo.

E tumu lenei lalolagi i tofotofoga, ma e tatou te le iloa lava le mea o le a oo mai. E manaomia lo tatou talitonu atoatoa i le Atua, faateleina lo tatou faatuatua e ala i le suesueina o tusitusiga paia, ma tatou ola e tusa ai ma Lona finagalo.

Ivonete S., 19, Bahia, Brazil

“Aua foi e te tutu mai la’u lamepa: e faamalamalamaina lo’u pouliuli e Ieova lo’u Atua” (Salamo 18:28).

O Lou Avanoa Lenei

O au itulau nei—lou avanoa e faasoa atu ai i isi talavou le uiga o le talalelei ia te oe. O mea ia e mafai ona e tulimatai i ai e faitauina i nei itulau ma meae mafai ona e faasoa mai.

• O aafiaga po o malamalamaaga na fesoasoani ia te oe e te malamalama ma ola lelei ai i le talalelei.

• O se ata saunia lelei na e pueina ma se mau e fai ma faamatalaga faasino.

• O se aafiaga lelei na e oo i ai ao e galue i le Tiute i le Atua po o le Alualu i Luma o le Tagata Lava Ia.

• O ou manatu e uiga i se mau na musuia ai oe. Ia aofia ai ma lou ata pe a e manao ai.

• Manatu faaalia e uiga i le Liahona: o a tusiga na e fiafia e faitau?

I-meli mai lau tala, ata, po o fautuaga i le [e-mail]. Faamolemole ia tusi mai ai “O Lo Tatou Avanoa” i le laina o le mataupu autu, ma ia aofia ai ma le faatagaga a ou matua (faamatala mai i le i-meli) e faasoa mai ai le mea o loo e auina mai ia i matou. E mafai ona toe iloiloina tusiga e auina mai mo le uumi po o le manino.

Taumatau: Ata na saunia e Craig Dimond.