Talalelei i Lo’u Olaga
Fesoasoani e ala mai le Agaga
Na taatia le kamuta i le mea na ia pau ai, i se tulaga lamatia i luga o se laupapa e iva inisi (23 cm) le lautele ae 100 futu (30 m) le maualuga i le ea. Na lavea o ia i se uamea faalava na pau lea na seleia ai se vaega o lona vae ma le lima.
I le avea ai ma se tasi e fesoasoani faafomai i faalavelave faafuasei e soosoo tauau ma Helikopa e Feaveaia Gasegase Tigaina a Yorkshire, e aofia ai se vaega tele o le itu i matu o Egelani, ou te le mailoa lava pe o le a se valaauga faafuasei o le a sosoo ai po o le a foi se tulaga o le a ma feagai ai pe a ma taunuu atu i le nofoaga o le faalavelave.
I lenei tulaga, sa le mafai ona faaminoi ma le saogalemu ia le tagata lavea seiloga ua siaki ona manua. Sa aveina atu au i luga e le siligi i le fata uamea. Ina ua ou oo atu i le tagata manua, sa taofi e le kamuta ia tua o lou taoofu feilafi [reflective jacket], ma na avea ai o se “siligi” tagata e faatagaina ai au ou te minoi saoloto e siaki le tagata manua.
I tulaga faapenei, e aoga ai tausaga o aoaoga, o lea na amataina ai ona ou siakia ia manua o le tamaloa. I lona tulivae sa i ai se fusi sa tuuina i ai e se tasi o le aufaigaluega e vaaia tagata manunua. I tulaga masani lava ou te siakiina ia manua e iloa ai ia tulaga faaletonu ona o tulafono lava na na aoaoina ai i matou ia mulimuli i ai.
Peitai ao ou aapa atu i ai, na uunaia au e le Agaga: “Aua le aveesea le fusi.” O lea ou te lei tago ai i ai. E faatolu lava, ona fautuaina au e isi na aofia ai—o le tagata na muamua tali mai, o la’u soatau sa faatali mai i le laueleele, ma se fomai—e vaai le manu’a o le tulivae, ae na faatolu lava foi ona musuia au e le Agaga e aua nei ou tago i le fusi. O le taimi lava na ma faamautinoa ai le gasegase, sa ma siiina le alii i luga o le tulaga e tuu ai uta, ae tuutuu ifo i ma’ua uma i lalo, ma sa ma aveina atu loa o ia i le falemai.
Sa faatali mai i matou e le vaega e fesoasoani e faatoafilemu lagona atuatuvale, i le itu e togafiti ai gasegase tigaina. Sa aveese vave e se tasi o fomai le fusi na saisai ai lona tulivae. Na matala faafuasei mai se alatoto ma amata ai ona alu malosi le palapala o le manua. I le siosiomaga taulimaina lelei e le falemai, sa vave ai lava ona foia lenei tulaga e lamatia ai le ola. A na faapea na tupu i luga o laupapa e 100 futu le maualuga, semanu e le ola si alii.
O taeao uma lava ou te tatalo ai ma ole atu i le Tama Faalelagi e fesoasoani mai ia te a’u, ia faamanuia au i musumusuga ia ou iloa le ala sili e fesoasoani atu ai i ou uso ma tuafafine o le a manaomia le fesoasoani i lenei aso. I le aluga o tausaga, ua aoaoina ai au i mea e tutupu e faapea, po o le a lava le mea e uunaia ai a’u e le Agaga e fai, ia usitai i ai. O lena foi usiusitai na puipuia ai foi a’u.
Mo se faataitaiga, o se tasi o ou tiutetauave o le avea ma se faasinoala, e taialaina se pailate helikopa i le nofoaga o se faalavelave e tupu. O helikopa mo faalavelave faafuasei e mafai ma e felelei solo i soo se mea, lea e faigata ona latou taunuu vave atu i se nofoaga o tupu ai se faalavelave, ma e vaivai ai lava i latou. Afai matou te felelei i le silia ma le 140 maila (225km) i le itula, e tele lava ina le iloa atu ia uaea eletise ma uaea telefoni. Ma e mafai lava ona faasalaveia se helikopa i se taimi vave.
I se tasi o malaga na matou felelei mai ai e tu laueleele i se nofoaga le lelei. Na faafuasei lava ona tau mai e le Agaga ia te au, “Tuu i lalo lau tamai laupapa kilipa!” Na vave lava foi ona ou toe lagonaina, “Tuu i lalo!” O lea sa ou faalagolago atu ai i luma ma tuu lau laupapa faapipii pepa i le ato i autafa o ou tulivae. Ao ou faia lena mea, na suia lou manatu, ma ou iloa atu ai ia uaea malolosi i lalo ifo tonu lava o i matou. “Uaea! Uaea! Uaea o loo i lalo!” na pau lava lena o se mea na mafai ona ou fai atu ai. Ma e ui lava na matou pa’i tonu i uaea malolosi na mafua ai ona pipio, ae na vave tali mai lava le pailate, ma na aveina atu i luga matou ma faasaoina. O se tulaga aupito matautia tau faalavelave lena na ou oo i ai. A aunoa ma musumusuga a le Agaga, o lena valaauga faanatinati o le a oo i se faaiuga ese mai ai.
Ou te matuai faafetai mo auala alofa a le Tama Falelagi o loo silafia ai o tatou manaoga. O loo leoleoina pea i tatou e le aunoa e le Alii. E finagalo o ia ia tatou tumau i le tulaga saogalemu faaleagaga ma ia toe foi atu ia te Ia, o lea Na te talanoa mai ai e le aunoa ia i tatou e ala i le leo lemu ma le itiiti o le Agaga. Pau lava le mea tatou te faia o le faalogo ma usitai.
Pe a na leai le musumusuga a le Agaga, semanu o lena valaauga faanatinati e oo i se faaiuga e ese mai ai.