Tatalo mo se Tali
O nisi taimi e te tatalo ai mo se fesoasoani, ae faatoa oo mai lava tali pe a maea ona tofotofoina lou faatuatua.
I se tasi aso ao faia se suega o le matematika, sa ou le manatua pe faapefea ona fai le isi numera. Sa ou saunia mo lenei suega, ae ua ou le manatua po o le a le mea na ou suesue ai i le fale. Peitai, na ou maua le faatuatua e mafai ai ona ou fesili i lo’u Tama o i le Lagi mo se fesoasoani.
Na ou filifili o le a ou talia le uunaiga muamua lava ou te lagonaina. Ina ua uma le tatalo, sa ou lagona e mafai ona ou faia le numera i se auala faapitoa. Ae na amata ona ou le mautonu ona e foliga e ese lava lea auala o le a fai ai le numera. Ona ou faia lava lea e a’u ia i le mea ou te mafaia.
Ina ua maea ona aoina pepa suega, sa matou talanoaina le suega ma lo matou faiaoga. Na ou iloa o le lagona na ou mauaina ina ua maea le tatalo semanu e oo atu ai i le tali sa’o, peitai sa ou le’i faalogo.
Mulimuli ane, ao faia suega faaiu, na ou iloaina foi ou te le iloa fai se tasi o numera, e ui lava sa ou faia lea lava numera i le fale.
Sa ou manao ou te fesili atu i le Tama Faalelagi mo se fesoasoani, ae na ou manatua lo’u teenaina o Lana fesoasoani. O lea la sa ou lagonaina le ma e ole atu ai. Peitai ona sa le mafai ona ou mafaufau i se isi lava auala, o lea sa ou tatalo ai pea mo se fesoasoani.
Na ou toe fesiligia foi le uunaiga na oo mai; ma sa sili atu foi lo’u le mautonu nai lo le taimi muamua. Peitai na ou folafola atu i le Alii o le a ou faalogo. O lea sa ou pupunia loa le le mautonu ma faia loa le mea na musuia ai a’u e tatau ona ou faia.
Ina ua maea ona togi suega, na ta’u mai loa e lo matou faiaoga o matou togi. Sa ia faia faamanaia e ala i le amata mai i togi maualalalo seia oo i togi sili ona lelei. Ina ua ia le faalauina mai lo’u igoa i le 3—o se togi maulalo—sa ou fiafia o le a ou maua se 2, o le togi aupito lelei lea faatoa ou mauaina lava i le matematika. Peitai ina ua ia le faalauina foi lo’u igoa i le 2, sa ese lava o’u lagona. Sa ou matuai mautinoa lava e le mafai ona ou maua se 1, o lea na amata ai ona ou fefe atonu na matua leaga lava la’u suega i le vasega atoa.
Peitai na valaau mai lo’u igoa i le vaega o le 1. Na pei e i ai se mea i lo’u faai ina ua ou iloa le aao o le Alii i lenei mea ma iloa Lona alofa ma le onosa’i mo a’u. Ina ua fai mai nisi o la matou vasega, “Na maoae lou taumafai!” Sa na o le lue atu lava i ai o lo’u ulu. Na ou manuia ina ua na ona ou mulimuli i musumusuga.
Ata pue na tusia e John Luke